I SCRITTORI È A SO SICILIA

In e so opere è dinù in i so cumenti è interviste o discorsi in publicu, i scrittori siciliani affaccanu strappati trà duie brame cuntraditorie. Da una banda, pè un seculu sanu da Verga à Consolo, ci hè issu bisognu di parte fora, da scappà di un’esistenza capita è risentuta cumu una vera maledizzione. È po da l’altra banda, imbattimu nantu à una nustalgia forte è pisante di a so isula chì sempre sempre i riporta à un passatu mitificatu è à tempu ghjistimatu. È tandu, ùn piantanu mai di fà u passa è veni trà e cunfine ed e margine duv’elli si sentianu scartati, è u centru literariu è culturale talianu duv’elli strazionu à sculinà un postu ghjustu è una dignità identitaria da integrà si ci.

Pè unepochi u viaghju ver’di a Sicilia si hè fattu per mezu di una memoria visuale è ancu di più sunora, franchendu u canale da l’isula à l’Italia, è venendu à riguarà materia linguistica è literaria ciuttendu in un fondu naziunale talianu. È li parse chì cusì a Sicilia buscava un mezu di esce di a sulitudine di l’isula è da pudè entre in a storia di u mondu novu, senza cascà da male à peghju.

Spessu si pensa chì u più di a literatura siciliana hè quella spressa è scritta in « dialettu » cum’ellu si dice. A realità in fatti hè altra, ma ùn si andarà micca à cuntradisce ciò ch’ella dice è pensa a ghjente. Bastarà à ammintà certi nomi d’autori chì nimu i puderà cuntestà. Vistu a so pupularità è cum’elli sò cunnisciuti sia in Sicilia stessa, sia in Italia, o dinù pè u mondu sanu...

Dunque amminteremu à a lesta i nomi più grandi cum’è Pirandello, Verga, Sciascia, Vittorini è unepochi, lachendu da cantu e cunsiderazione interessantissime, ma forse à pena troppu tecniche in quantu à l’ispirazione, a rapresentazione literaria di l’isula, di a storia o di l’esiliu, e so cuntradizzione è e varie pusizione di i scrittori...

Daremu una fidighjata forse più precisa è si entrerà ancu in i particulari, da tene contu di u travagliu di barattu è cuuperazione anticipatu da certi prugrama europei ch’ella hà pussutu mette in ballu in u Mediterraneu occidentale l’Università di Corsica è u so Centru Culturale. Di fatti, in u periudu principiatu cun l’anni 1990 issa azzione hà trovu un puntellu maiò cù u “prugettu” IMEDOC, chì vulia accoglie inseme l’isule di u Mediterraneu occidentale per mezu di travagli è operazione purtate in cumunu in varii settori di a vita di l’isule Baleare, di a Corsica, di a Sardegna è Sicilia. Un prugettu –certi diceranu un sognu!- chì hà parturitu cuntatti varii è diviziosi. Ci accuntenteremu à insignà duie realizazione è qualchì scrittu chì a Sicilia ci hè stata indiata. Un accennu dinù à una cuuperazione chì hà datu belli frutti: a Biennale di Prose di Baleare, Corsica, Sardegna è Sicilia. Una cosa da ammintà... è da fà rinvivì un di sti ghjorni forse?

Soca fendu cusì, si averà una fidighjata da mette in suchju à chì ci si avvicina. Cum’è a Sicilia stessa, in fatti, a literatura siciliana hè un mondu diviziosu, variu è sempre in mossa...

(Scusate...Avà piantu chì.. u sentite l’elicotteru? Ci aspettanu... Direzzione: A LITTERATURA SI CILIANA!)