ETNA

Eranu passati i mesi, e stagione è l’anni. Avia fighjulatu milioni di fronde sculurite, spaperse da u ventu à u calà di u sole. Eranu scappati fora di e nostre mente millaie di discorsi è e so voce, lebie lebie, ci eranu passate sopra senza calà ci penseru. Ci avianu messu l’affannu à dossu centinaie di dulori, è centinaie di gioie avianu suminatu alegria in e nostre vite. Mille cose amare è mille altre cuntrarie mi avianu cutratu u core ; un giovanu u mi avia scaldatu. Ellu è ellu solu. Per mesi è mesi, è stagione, è annate dinò.

Ad ogni cosa di soiu avia fattu l’inzecca di cultellu è marcatu à ferru rossu ogni fattu in mè stessa : u so curagiu, u focu di a so giuventù generosa, u so amore per mè è per ella.

Ella, qual’era quessa? Ella era sempre custì, alta alta è tremenda, di pudenza mustruosa, a Muntagna, tribulu è cuntentezza di a nostra vita, cù i so fiumi di lava infucata chì scendenu da e bocche è si perdenu diventendu tanti serpulelle russicce, cù e pitricelle, a cennera è a rena chì ingutuppanu è facenu annirisce tuttu, mentre un fumulicciu scuru esce cumu s’ellu fussi un nulu maiò maiò, è sempre più maiò, è chì si prepara à piove : un spetaculu chì à chì u vede da veru ùn ci pò crede ! Ne escia pazzu per ella, ne escia ! Vulia solu chè caminà è sempre attippà... è cuntimplà è rispirà... è sente è tuccà l’Etna chì d’invernu diventava, cù a so neve una bella signora bianca bianca... Ed eiu li dumandava : perchè ?

Perchè ti ci hè vulsutu à cumbatte cù tutti... per ella ? È cù a so risposta aghju vistu tuttu u mare mossu di a so vita : ciò ch’ellu avia passatu, ciò ch’ellu passava è ch’ellu avia torna da passà per ella, u grande amore cuntrastatu... è (u mo core si hè strintu) vidia ancu a timpesta chì l’avia da annigà...

Perchè ti ci vole à lascià la... per via di tutta a to famiglia ? Perchè era una famiglia di capitani di marina, da bapu à figlioli, sempre ghjente di mare... mai,  chì ne sò eiu ? un muntagnolu, o unu chì li piacia a neve per u schì o magaru per quelli più giovani, qualchidunu chì facia l’escalata o, puru una semplice passighjata a dumenica... aùh ! Mare, è battelli, solu mare, è marinari, è sempre è torna mare. È cusì, quand’ellu disse à u bapu ch’ellu vulia studià i vulcani è i terramoti, u terramotu u fece stalvà u so bapu l’amirale... chì ancu à pena ne cascò seccu di un attaccu... è li rispose (ùn vi dicu è ùn vi contu cù chì tonu di voce) ch’ellu si ne pudia scurdà subitu. È surtì fora... dimu... assai frasturnatu...

Ma siamu ghjusti ! si pudia aspettà, issu omu, chì u figliolu si stessi zittu senza apre a bocca, senza fà nunda, senza sbundà e porte è sciappà i vetri ? Era una zitelluccia nucente, chì cridia sempre à e fate ed e principesse, i rè è e regine, ma sapia ch’ellu nè vulia nè pudia fà ciò chì u bapu avia vulsutu per ellu... Innò u so bapu ùn lu pudia fà spiccà d’ella... è puru u spiccò da tuttu : da ella, da mè, da sè stessu, da tutti i mari di u mondu, una volta è po pè sempre...

Era una matinata chjara ; ellu a si spassighjava quassù in muntagna... ùn sò cum’ellu hè statu, ma a mi possi figurà... Era tantu addisperatu chì forse mancu fighjava duv’ellu mittia i pedi... ed hè sguillitu caschendu in una fossa fundia, u ghjornu prima di parte pè Livornu.