Versione :

Ducumentu
Introitu

Ùn hè faciule faciule di aduprà a parolla “lingua” quand’ellu si tratta di un locu cum’è a Sicilia duve in generale a ghjente dice a parolla “dialettu” da insignà un valore culturale, affettivu, di famiglia per cusì dì.

Tandu ci hè bisognu di qualchì schjarimentu scentificu è descrittivu capace à definisce quant’elle sò particulare è differente e situazione, ancu malgratu e sumiglie. A sapemu in Corsica duve lingua/dialettu insegna più cunflittu chè cuabitazione è spartera senza cunflittu.

Dunque hè quessa ch’è no faremu sentendu duie varietà siciliane (messinese è trapanese), dopu a linguista Elvira ASSENZA, è po Lidia MORFINO, chì conta una passata duve a “lingua” taliana hà pigliatu a suprana nantu à. u “dialettu” messinese.

 

Cum’ellu a ci dice Biagio GUERRERA, a lingua siciliana hà mossu un’ispirazione muderna, oghjinca, chì hà prudottu spressione è opere di grande qualità in u mondu di l’arte visuale è sceniche. Basta à ammintà trè nomi di artisti o cullettivi artistichi: CIPRI è MARESCO, Franco SCALDATI è Spiro SCIMONE chì si pò dì, anu rinnuvatu l’arte ch’elli adopranu à prò di l’estru culturale di a Sicilia. Ma attenti ùn ci sbagliemu chì à e forme tradiziunale, a ghjente ùn ci si oppone, cum’è pè indettu u Teatru di I PUPI.

 

Bella sicura, i generi tradiziunali cum’è a puesia si sò allargati à primure è voce nove, ma senza nuce à e spressione tradiziunale sempre cusì vive è festighjate in e mente, i cori, e piazze è i carrughji!

Da fà la sente, ci ne andaremu à vede i puemi di Biagio GUERRERA è Marco SCALABRINO, ma ancu di Nino DE VITA. Cum’è per quessi, averemu tantu piacè à vede è sente à Sebastiano BURGARETTA chì dice issu splendidu puema in l’onore di IBN-HAMDIS,. È po ci sarà dinù da riflette in quantu à l’eri è l’oghje di a Sicilia è forse ancu aldilà.

 

U cantu è a musica, cusì vivi in a spressione siciliana da u sempre tenenu un postu primurosu in a cultura pupulare ch’ella sia d’estru prufanu o sacra. Ma e forme di l’arte più cuntempuranea ùn stanu alluntanate da a cultura di l’isula è i so rughjoni. È in certi casi spettaculari è tragichi alzanu a voce di a Sicilia. Cum’ellu si vede è sente passendu in i Cretti di Alberto BURRI, in Gibellina.