GIUSEPPE BONAVIRI SCRITTORE È CARDIOLOGU

Si saria pussutu piantà di scrive cù u so primu libru, un racontu pueticu nantu à a figura paterna Il sarto della stradalunga, s’ellu ùn avessi avutu à core d’andà aldilà di una testimunianza affettiva o suciale. Funu trè scrittori à sente in issu libru un versu novu , una dimensione literaria mai vista è un caratteru nuvatore. Italo Calvino truvò u so linguaghju inventivu sempre, Elio Vittorini ci sentì « un sensu fine è cosmicu » è Leonardo Sciascia apprezzò "issa descrizzione favulosa di una vita cutidiana povera è amara”.

Dopu à issu primu libru cuntinuò cù una scrittura delicata è creativa, prufonda è generosa, viva è piena à fantasia, pigliendu postu è ispirazione nantu à e so sperienze di a vita, lette è risentute per mezu di u so mistiere di medicu. Aghjunse dinù a scrittura puetica è l’attività critica in e so cronache.

A cultura siciliana mai l’hà cappiatu. Trà i so ultimi rumanzi spicca , Il vicolo blù, duv’ellu hà fattu rinasce a so zitellina ma, aldilà, l'universu fantasticu duv’elle sbucciavanu usanze è cridenze pupulare di u rughjone di Mineo, vicinu à Catania. Ma ùn si hè mai limitatu à trascrive issi usi. A so persunalità literaria creativa sempre sempre mettia u so scrive trà ricordu è fizzione, traspunendu issu fondu patrimuniale cù u cuntattu è l’inseti di a so cultura literaria è a so cultura multiforma, andendu da u racontu filosoficu, a scenza finta è è e scuperte genetiche. Ne facenu testimunianza Martedina, ,Dolcissimo, u racontu filusoficu Il dormiveglia, L'incredibile storia di un cranio.

Era avvezzu à apparagunà a so cità nativa cù u cosimu sanu sanu. A cultura siciliana, era cuscente quant’ella avia inghjuttitu influenze varie (greca,araba, nurmanda…); dunque li piacia à ficcà in i so raconti persunaghji di tutte e mitulugie. Li permettia cusì di passà da un versu intimistu (La contrada degli ulivi) à una spezia di nubiltà visiunaria, è ancu dispettosa (Notti sull’altura, La divina foresta, o Il fiume di pietra). L’umanità, ellu era cunvintu ch’ella era solu una forma trà tante di a vita universale, è micca sempre quella più bona! Li venia spessu a picondria malinconica è tandu pensava a so morte cumu una redenzione assirinata è dolce.