À chì vole capì u passagiu da u 19^u à u 20^u seculu Giovanni Verga hè un autore di primura. A ricerca linguistica fatta da u scrittore ci vole à pensà la unica, per via di l’impattu ed a cumplessità à l’internu di u panorama literariu talianu d’issu mumentu.

Giovanni Verga nasce in Catania in u 1840. A so educazione hè fatta in ambienti catolichi è face studii di dirittu ind’è l'università di a so cità. Si interessa subitu à a literatura è, sempre studiente, scrive i primi raconti. Entre in cuntattu cun parechji intelettuali fiurentini è in u 1861 si trasferisce in Firenze, duv’ellu starà sinu à u 1871, chì tandu parterà per Milanu.

A ricerca di Verga hè spressiva cum’ellu ùn ci ne hè statu prima è chì si busca u so sviluppu pienu durante u sughjornu milanese quandu u scrittore entre in cuntattu cun rapresentanti di u muvimentu dettu di “a scapigliatura milanese”.

Ma Verga da issa scola literaria milanese ùn piglia l’elementi macabri è fantastichi, è tene l’elementi linguistichi chì inseriscenu in a struttura di a pagina cadenze di u parlatu è manere di dì dialettale

Un’altra grande influenza nantu à l'opera di u scrittore sicilianu hè stata a literatura francese, in particulare u verisimu chì pè a prima volta mette u literariu in cuntattu cù a realità in tutti i so aspetti, à parte si da quelli più duri è dispiacevuli. L'intenzione hè quella di mette in cuntattu cutidianità è literatura in modu chì l'opera parghi esse si fatta da per ella senza nisun cuntattu cù u so autore.

Verga fighjuleghja l'evuluzione di a sucetà, l'innuvazione strutturale di a nazione cagiunata da e mudifiche ecunomiche è industriale, ma a face mettendu in avanti un puntu di vista chì parte da inghjò, è cunsidereghja sopra à tuttu i  debuli, quelli firmati per istrada.

In u 1881 esce I Malavoglia, capulavoru di u scrittore, sagà chì feghja à u centru una famiglia di piscatori siciliani è e tentative fiascate di un riscattu suciale.  

In u 1884 ci hè Cavalleria Rusticana, cronaca di vindette sempre lucalizata in Sicilia, mentre in u 1896 esce La Lupa, storia d'amore cruda chì mette in scena una trà e prutaguniste feminile più singulare è fosche di a literatura taliana. Verga more in Catania in u 1922.

Giovanni Verga ebbe un raportu intensu cù u sinemà, scrivendu sugetti, elaburendu didascalie, purghjendu idee. È puru u scrittore, cunsiderava u sinemà da arte di secondu pianu, spressione di livellu bassu, è in u scraniu maiò ci vidia solu una fonte di guadagnu rapidu è faciule. A dicenu lettere celebre indirizzate à u pruduttore è regista napulitanu Nino Martoglio, duve Verga, sempre sguaiatu, chere di scrive una storia qualunque à pattu chì u so nome ùn apparissi mai. Ed hè per quessa ch’ùn hè faciule di sculinà a so implicazione diretta in un'opera.

U sinemà talianu spessu hà pigliatu ispirazione da l'opera di Verga, à parte da Luchino Visconti chì gira La terra trema (1948), unu trà i capilavori di ul neorealisimu ispiratu da I Malavoglia, lucalizatu trà i  piscatori siciliani, opera di impattu pudente assai chì stà sempre in cunfina cù u ducumentariu etnograficu. Hè filmatu cù attori non prufessiunali, chì si sprimenu in dialettu strettu strettu à tal puntu chì a pruduzzione hè ubligata à fà esce copie duppiate di issu filmu è cusì, più ammanite pè u publicu.

In u 1953 Alberto Lattuada gira La Lupa traspurtendu l'azzione da a Sicilia di u seculu scorsu, à Matera ind’è l’anni cinquanta. U filmu, interpretatu da l'attrice algeriana Kerima, hè forse l'adattamentu più fidatu cù u spiritu di Verga. S’è Visconti era troppu impegnatu à sequità l'estetica neorealista, Lattuada si concentra nant’à i sentimenti, i raporti viulenti è un pocu malati di una figliola è di una mamma, la Lupa, innamurata di u so ghjennaru, è finiscerà in tragedia cù u suicidiu di l’eruina.

Franco Zeffirelli s’ispira da a Storia di una capinera pè u so filmu di u 1994, ma cappia u rumanzu caccendu implicazione storica è suciale, è tene solu a strada di l’amore sfurtunatu per l’usu di u publicu di i filmetti d’amore

L'ultimu adattamentu di Verga hè di u 1996, un’altra versione di La Lupa diretta da Gabriele Lavia chì si pò permette, grazie à l’epica, una libertà tutale in u ritrattu di l’eruina, l'attrice Monica Guerritore, sempre à l’orlu di l'eccessu, ma chì hà propiu u so limite in a scelta solu sensuale.