Antoni ARCA hè natu u 6 di maghju di u 1956 in Sardegna à L’Aligheru induv'ellu ci campa è ci face u so mistieru d'insignante co i zitelli.
Si prisenta in quantu chè scrivanu dramaticu. Hà scrittu è messu in scena parechje pezze di teatru in talianu, sardu, è catalanu. In quelle lingue, ha publicatu dinù regulare scritti in versi è in prosa. Operaiu culturale cunnisciutu, hè statu unu di i "mediterranei" chì cutteghjanu è custruiscenu u territoriu culturale di e nostre discursate paghjese.
Antoni ARCA hè licenziatu in lettere è in pedagugia, spezialistu di lingue è di literature iberiche. Insegna da u 1980 è hè statu incarigatu di corsi in Scenze di l'Educazione à l'Università di Sassari in l’anni 2000-2006. Da u 1997 a u 2003 hè statu in capu di u settore lingua è didattica di u Centru di Servizii Culturali Sucietà Umanitaria d'Alghero. In l’anni ’90 hè statu dinù membru di a redazzione di u settore libri per i zitelli ind'è EDES (Sassari) è Condaghes (Cagliari).