Sò parechji anni chì u serviziu di i publichi di u FRAC Corsica hà relazione strette cù l’Educazione naziunale, l’Ispezzione regiunale di l’insignamenti artistichi, u rispunsevule retturale di l’insignamenti culturali è i prufessori di arte plastiche.

Issu cuntattu si hè materializatu à l’occasione di u viaghju in Alghero di e sezzione di arte plastiche di i licei di Sartè è u Letizia di Aiacciu.

Chì furtuna pè i ghjovani non solu di visità a Villa Constantino, ma ancu di pudè scuntrà artisti cun quale anu ragiunatu è vistu e so opere.

Un’iniziativa articulata cù u prugrama di e scole di 1^a chì studieghjanu u postu di l’opera in u spaziu è quellu di e Terminale (relazione di u corpu in un’opera).

Tantu più di primura l’eserciziu ch’ellu si fece in talianu.

Cù issa sperienza i ghjovani si sò avvisti chì l’artisti ti avianu listessu estru chè elli è po dinù e stesse riferenze.

Un viaghju propiu riesciutu.

Trà Corsica è Sardegna si mette in ballu un universu artisticu cumunu

Tandu, a mostra aperta à a Villa Constantino in Alghero accuglia una trentina di artisti chì campavanu o travagliavanu in Sardegna o in Corsica o chì stavanu in cuntinente ma avianu fattu un’opera in relazione cù isse isule mediterranee. Un avvenimentu in un prugrama à longu andà purtatu da u FRAC è a regione Corsica. I cumissari eranu trè: Anna Alessandri (FRAC), Giuliana Altea (critica d’arte prufessora in Sassari) è Cristofanu Domino (criticu d’arte in Parigi).

Cullaburazione corsusarda

L’artisti di issa operazione si ritruvonu nantu à trè parolle: rilievu, dubitu è minaccia. Pè Anna Alessandri, isse parolle sò più un versu chè un tema, un spiritu mossu cun Giuliana è Cristofanu quand’è no avemu scontru issi artisti chì in cumunu anu solu issa leia, di primura o di una stonda, cù u spaziu puliticu, culturale è storicu cumplessu è riccu di treminduie l’isule.

Tensione è identità doppie, incertezza, interrugazione, penseru... trà e pratiche varie vistu i puntelli (stallazione, pittura, videò, ritratti, dissegnu...) è i scopi, l’opere accolte sò ligate da isse parolle maestre è ne piglianu un versu di sumiglia in issa mostra.

À l’ultimu u prugettu vulia unisce l’artisti è schjarisce in un certu modu u spaziu geugraficu è simbolicu di l’opere, issu locu chì spicca trà spechju, dubitu è minaccia.

Issu inseme di mostre hè statu pensatu da u FRAC Corsica è da a CTC cù a Regione Sardegna, a Pruvincia di Sassari è impuntellatu da un prugrama INTERREG IIIA.