Giosué Calaciura hè natu in Palermu in u 1960. Hè giurnalistu in Roma. I so primi scritti sò esciuti ind’è riviste :Il Sole 24 Ore, Lo Straniero, Nuovi Argomenti… è antulugie cume Luna nuova, è Sud : Racconti dalla frontiera, presentata da Giovanna de Angelis (Einaudi, 2000).

Malacarne (1998) hè esciutu traduttu in Francia in u 2007

Malacarne, issu primu rumanzu di Giosué Calaciura si presenta cumu un monologu di un sbirru maffiosu chì spieca à un ghjudice u so parcorsu in a Cosa Nostra. Ma ùn ci vole à cuntentà si di firmà in issa storia. Ùn si tratta solu di a cunfessione di un pentitu. A so lingua và propiu fora di quella chì puderia esse di unu natu in un carrughju miseru è poveru. U libru ùn hè di quelli fatti à usu di cronaca giurnalistica. Si tratta piuttostu di una biugrafia per cusì « archetipale » duv’elli si tessenu inseme elementi di un ridiculu sprupusitatu è aspetti duv’ella affacca a fatalità, u tragicu di l’esistenza è di a morte. Hè una trappula, capace à inguantà ognunu chì li passa à tiru. O chì u si surpa trà mezu à crimine murtale, assassiniu pensatu, arrubecciu è trafficu di ogni cosa è droga pè u più chì a cosa riporta... sterminiu, vindette, guerra di territoriu, rapimentu è racket. È u culpevule-niscentrone ùn ne finisce più di allistinà tutte e malfatte chì u fullettu criminale u si ingutuppa, mettendu li in faccia una mascara cambiarina: sgaiuffu malfattore, puverettu, schjavu o boia, assassinu capimachja o tenistaffa, è à l’ultimu, girghi cum’ella girghi, falerà a cuglittina! Issi gira è volta chì portanu à l’abbacinu, Calaciura i dice in un versu baroccu è fine. Un’eleganza da mette a nubiltà di a distanza stilistica trà u rozu di u dettu è u garbu di a scrivitura. Puesia è fatti orrendi si intreccianu in un ghjargalu discursivu chì si porta via, bulichendu adisperu è comicu bughju, in un lampu cuntinuu è à volte ancu surrealistu. Si sà, dapoi l’American Psycho di Bret Easton Ellis, quant’ellu si pò fà libri à successu mundiale, cun pagine di deliriu. Ma ùn si tratta di quessa in Malacarne. Ùn hè psicoticu sfrenatu Malacarne, ma zitellone spapersu è duminatu da pudenze suciale piatte è chì l’anu fattu schjavu. Pagliacciu distinatu à fà male è à fà ride à tempu. Ma di una risa chì vi mette u fretu à dossu. Daretu à issu nucente-culpevule l’autore ci face affaccà l’ombra di una sucetà maffiosa sì, ma cum’ellu sarà ogni inseme umanu duv’elli sò ligati pudere ufficiale è pudere in sottu sottu.