INTERVISTA DI IGNAZIO LUTRI

Ignazio LUTRI dice chì in Sicilia cume in Italia hè rara di truvà un veru  spaziu è una primura per l'Architettura Contemporanea, è chì  ancu l'attività di ristauru hè vista in generale in modu cunservatore. Li pare à ellu ch’ellu ci hè trè cose da ammintà: A sperienza di Gibellina, (ricustruzione di a cità distrutta in u terramotu di ul Belice di u 1968, da parte di certi trà i principali architetti è artisti taliani di l'epica). Una sperienza chì hè stata un fiascu, ma chì avia ideali alti. Oghje hà prudottu ruine nove di architettura muderna.

E maghjine sò quelle di i resti di a vechja Gibbellina “sugillati" cù u cimentu di Burri chì hà fattu un’intervenzione artistica straurdinaria

Gibellina, da l'arabu جَبَل = Gebel (muntagna) et Zghir (chjuca) hè stata posta nantu à cinque cullettule versu 300 prima di G.C.

A vechja Gibellina avia 6930 abitanti quand’ella fù lampata in pianu da u terramotu di ghjennaghju 1968. Funu distrutte Gibellina, Poggioreale, Salaparuta è Montevago, cun più chè quattrucentu morti mille feriti è più di centumila ghjente senza tettu..

Dapoi tandu u situ anzianu hè statu abandunatu da l’abitanti. Oghje hè diventatu un memuriale dedicatu à e vittime. L'opera architetturale di ricordu l’hà fatta l’artistu Alberto Burri. Hè u Grande Cretto edificatu trà u 1985 è u 1989.

Hè un esempiu tamantu, munumentale di land art, rializatu cun blocchi di cimentu. Si presenta sottu forma di un stratu tamantu postu nantu à u latu sudeste di a muntagna. Hà a forma di un quatrilateru irregulare di trecentu metri via quattrucentu.

In u cimentu l’architettu hà fattu zuccà trancee prufonde 1,60 m è larghe da 2 à 3 m. À chì vene à visità issu munimentone, pedieghja cusì longu à u tracciatu di i carrughji di l’anziana cità! Una manera di ammintà l’idea di a cità prima di u terramotu...