Di L’Acquatella, dopu i studii in Bastia è in Ecchisi hà ottenutu a maestria di lingua è literatura taliana. Direttrice di Centru Suciale è animatrice in parechje discipline di cumunicazione, hà passatu u CAPES di corsu ed hè oghje prufessora di Lingua è Cultura Corsa.
Patrizia hè stata trà e prime alleve di i corsi di lingua corsa di l’anni 1975. Subitu subitu si hè fatta rimarcà da e so qualità di equilibriu, d’armunia trà a cultura corsa di a tradizione è una ricerca cuntinua di mudernità creativa.
Artista à l’anima, animatrice di u teatru di Scola Corsa è Scola Aperta, era zitella quand’ella fece u so primu discu cù dui tituli turnati emblematichi « Tribbiera » è « U Mulinu ». Dapoi, ùn hà più spustatu è cù l’amica Patrizia Poli anu creatu u gruppu « E Duie Patrizie » chì dete slanciu à a puesia è cantu feminile di l’anni 1970. Dopu fù « Fola fuletta », furmazione di teatru è cantu di l’anni 1980, è po « Ottobre », è oghje « Les Nouvelles Polyphonies Corses », cù Patrizia è Lidia Poli, è po « Soledonna » chì unisce cù successu ricerca è tradizione pulifonica.
Un percorsu d’incantu duv’ella ci hà un bellu postu u teatru (cù u persunagiu di a ninfa Ribombu ch’ella crea ind’è U Labirintu di G.Thiers, ci hè da sbillicà si !), ma ancu a scrittura, a puesia. Hà ricevutu u Premiu di u Libru Corsu di 1998. Andate à leghje A Paglia è u focu/ La Paille et le feu, cullezzione « Architecture du verbe », Les Belles Lettres, 1999, da truvà un estru forte è una spressione estetica esigente propiu.