L’idee nove anu cuminciatu à piglià forza. In u mondu sanu si pesanu e minurità etniche, suciale, culturale. In Francia, i studianti di e minurità piglianu cuscenza di e so identità è maghju 68 li darà u dirittu di sprime si è di dì a so rivolta. L’università di Rennes, Toulouse, Montpellier sviluppanu u tema di « rivuluzione etnica », si rivendicheghja a pussibilità di campà in terra soia è s’innalza u principiu di « i diritti di i populi à dispone di sè stessu »; ind’è issu filu e lotte di u 70 piglianu a forma di una lotta di u paese contru à u Statu. I Studianti corsi di Nizza dumandanu un’Università corsa
In u 1969 Farrandu Ettori crea in Ecchisi u primu Centru di Studii Corsi,
In Parigi s’accoglienu intellettuali cum’è Marchetti, Geronimi, Fusina in giru à un prugettu pè a lingua corsa di pettu à l’inazzione di u Statu in quant’à i prublemi di ricunniscenza linguistica è culturale (A lege Deixone ùn si pudia addirizzà à u corsu cunsideratu -cum’è l’alsasianu è u flamandu- lingua allogena, vale à dì dialetti d’altre lingue). Dunque cun l’affaccà di u 70 s’aprenu spazii novi di rivendicazione, s’affermanu i muvimenti regiunalistu è autunumisti, a canzona vole diventà dinù un’arte pupulare à u sensu propiu. Quì o altrò, influenzata da a tradizione più landana è dinù da un currente chì piglia radica in America à a fine di l’anni 60, A folk music : si tratta di fà u novu cù u vechju; hè quessa a differenza cù i gruppi detti fulclorichi, chì sò solu ind’è l’imitazione di a tradizione. Ancu s’elli anu a so parte à ghjucà i gruppi fulclorichi in a cunservazione di un certu patrimoniu, si pò d’altronde salutà u travagliu fattu da Ghjacumu Luciani cù A Mannella chì racolse pè i paesi paghjelle è canti tradiziunali pè interpretà li dopu in scena. Al di là di l’aspettu musicale issu currente hè un modu di campà, di pensà, di luttà contru à tutte l’oppressione. U mudellu hè u Paese, quellu di tandu nanzu à a spalluzzera di u dopu guerra. Issu Paese simbulu di Nazione diventa imblematicu è ne sbuccia una maghjina mitica in e canzone, d’altronde a parolla paisanu hà da definisce l’identità.
Vultà à una musica arradicata, vicinu à u populu, una musica fatta da u populu è pè u populu indetta di sorte da u sistemu gestitu da a cerca di u prufittu è chì si primureghja di più di u spetaculu chè di a vita. Si volta à e veghje è à a cunvivialità duve ognunu trova a so piazza, l’anni 70 sò annate di cerca, di sperimentazione, di rinnovu in ogni duminiu cù una vuluntà di cambià a vita.
Canta u populu corsu, natu in u 73 diventa l’unicu ripresentente pè u cantu di issu currente è riunisce tutti quelli chì ci si volenu assucià pè a difesa di a Corsica. A musica deve esse accessibile à tutti; d’altronde i giovani amparanu à sunà di viulinu o altri strumenti à u cuntattu di l’anziani; diventa a ghitarra u strumentu principale d’accumpagnamentu, una ghitarra chì sona di modu differente chè quella di l’anni 60 .
Ùn si tratta tandu di intravede una carriera di cantarinu; u rollu di u cantadore hè solu militante; u cantu deve solu dì e lotte duv’ellu piglia a so energia. D’altronde e so scene ùn sò altru chè quelle pulitiche è sò l’evenimenti pulitichi à guidà issa pruduzzione: inni imblematichi (Dio vi salvi Regina, U Culombu) mubilizeghjanu a maghjina d’una cumunutà chì vole esse ricunnisciuta.
Issu periodu hè quellu d’una pruduzione artistica è d’una literatura chì sposanu a vita suciopulitica di a cullettività. Ind’è issu versu novu si pò leghje a vuluntà di mette in avanti a specificità ma dinù a particularità di u raportu incun l’altru magiuritariu è duminante. In u 74 a rivista literaria Rigiru riunisce pueti è intellettuali pè u più insignanti è universitarii (Marchetti, Fusina, Muri, Coti, Thiers, Rocchi, Geronimi, Franchi…) chì definiscenu u so prugramu: a lingua chì custituisce u vettore principale di l’identità hè posta à u centru di i dibattiti è diventa una scumessa literaria.
Primurosi di sparghje a literatura, i pueti di u Rigiru furmati ind’è l’università francese è arrimbendu si à u mudellu di a so literatura pensavanu chì ci vulia à fà di più prosa ma anu da truvà, cù u cantu, l’occasione di sparghje a so pruduzzione puetica di modu più largu, fendu li ritruvà u chjassu di l’oralità da mette la in bocca à tutti.
Hè quì ch’ella cumencia una cullaburazione stretta trà pueti è cantarini. Issa canzona intende d’addirizzà si à tutti, rende u discorsu accessibile in a so ricerca d’identità, diventà un strumentu à u serviziu di a sculunisazione. A literatura hà da tene una parte di primura in issu prugettu, chì tocca à i scrittori à pruduce e ripresentazione di l’identità, u mitu naziunale chì hà da funda a Nazione Corsa virtuale.

Spannendu si, stu cantu trova di modu naturale i mezi di a so prumuzione : sò create l’edizione RICORDU duv’ellu hà da pruduce Canta U Populu Corsu un discu à l’annu, da u 74 à l’82 (dui in u 77 è trè 45 giri). Nantu à i stucci i ritratti di i cantarini cù un decoru di citadella o di portu lacanu a piazza à ripresentazione a di una Corsica muntagnola. Di fatti sparisce tuttu ciò chì pò simbulizà e culunizazione (Citadelle, mare, Torre o cità), a muntagna s’innalza cum’è una cunfine, trà a Corsica è u so nemicu. Si pò salutà quì u travagliu di u fotografu Francescu Desjobert chì realizò tutti i ritratti di i stucci di Canta for di Ci hè dinù duv’ellu si trova un disegnu iperrealistu di u plastizianu L Gianninelli ( disegnu d’una Corsica cosmopolita).
I temi sò liati à l’evenimenti, Aleria 75, i Prigiuneri pulitichi, a Lotta clandestina cù e maghjine di u Ribellu, quella di u u Patriottu, u Machjaghjolu, chì s’avvicinanu in un certu modu à quella maghjina di u Banditu ammintatu più sopra ma rimessa in u so cuntestu puliticu, cacciatu li un suppulu di rumantisimu ma micca troppu: s’assumiglianu chì s’impettanu à a lege francese è ch’elli sò for di strada.
U Cantu, a voce, quand’ellu valurizeghja u testu iniziale, porghje à u publicu un’accolta differente, e parolle cù a musica mettendu in ballu l’imaginariu cullettivu, è in issu modu ùn s’hà da accuntentà d’accumpagnà u muvimentu di cuntestazione u cantu, ma hà da ghjuvà propiu di vivaiu, di fonte intellettuale di a rivolta. Cantu è puesia piglianu un versu sempre più indiatu. « A scrittura » dice R Coti in u Rigiru 2/3 in u 75 « hè azzione o ùn hè micca ».
Dopu à un primu discu Eri oghje è dumane solu dedicatu à a tradizione, In u 76 s’apre Libertà u secondu libru cù un puema di Saveriu Valentini chì dà u tonu Suldatu di u populu và sò messi in luce u fattu culuniale, A rivolta, A Prigiò. Segna u principiu di a cullaburazione di u pueta casinchese Ghjuvan Teramu Rocchi cù u gruppu è u chjassu sarà longu: Simu sbanditi è u Mufrinu. » « Hè quasi tuttu di canti è detti novi, dice Geronimi in u Rigiru n8, A lingua è e musiche puru nove facenu a leia stretta cù a tradizione. »*
U listessu annu in Parigi Antone Ciosi s’apre à a literatura settantesca infurmatu da Pasquale Marchetti è nasce in u 77 Musa d’un Populu dedicatu à i pueti. Si presenta cum’è una piccula antulugia di a puesia è di quella d’oghje : sò messi à l’onore A.F.Filippini, D.A.Versini, S.Casanova, P.S.Leca è dinù G.Fusina (Nascita , U to nome) o G.T.Rocchi (Ritornu, Ditemi, U sognu di a mamma…)G.G.Franchi (Notte, Casa, Ma Francescu, Partenze), Sò Corsu (Marchetti) chì dice d’altronde « u discu sti trent’anni hà datu à i Corsi occasione è materia pè cantà in a so lingua è cusì assicurà li a cuntinuezza culturale à le volte senza sapè la ». Mezu à isse puesie, parechje si ritrovanu in a rivista Rigiru. U listessu annu escenu dinù i dischi di P.Gattaceca, è di e Duie Patrizie chì cantanu à Thiers à Fusina o à Franchi ma dinù u so amicu di scola Ghjuvan luiggi Moracchini. E Patrizie cullabureranu d’altronde à u discu Festa Zitellina di CUPC esciutu in u 79. Cristofanu Mac Daniel è Dumè Gallet creanu u gruppu Rialzu ispiratu da a musica Zeul purtata da C.Vander è u gruppu Magma. Esce Rialzu in u 78. S’è a so musica svia di a tradizione, a parolla ella ferma quella di a rivendicazione, canterà D.Gallet u testu fundadore di a Rivista Rigiru scrittu da D.A.Geronimi : U rigiru/hè u naturale/ Sculturatu ind’è l’anellu di u sangue/chì gira cù a vita/à nantu à u chjerchju di a natura/di tondu à u palu. Puru s’ellu avia trovu u so publicu, Cristofanu Mac Daniel è Dumè Gallet ùn stanu tantu à raghjunghje i ranghi di Canta simbulu di u populu in lotta. D’altronde a voce di Dumè cusì particulare è putente hè scelta per interpretà ciò chì oramai sona cum’è un innu « Quandi a terra move » di G Fusina /Poletti (Chjamu a puesia). Corre l’inchjostru, nascenu canzone, u populu e face soie. Sò passi di storia e canzone, da tene à mente ciò chì a scola ùn ampara, l’evenimenti di sicuru ma dinù a memoria di l’omi : Bustanicu di Bartulumeiu Dolovici, L’Acquaviva, À Stefanu (Thiers), …. è tant’altri, chì fecenu dinù a storia di stu cantu: N.Luciani (Cf Canta), l’ultimu discu di Canta duv’elli si truveranu omagi à Dédé Nobili, D.Gallet è A.Nicoli (S Luciani).
Oramai u cantu s’hà riacquistatu i spazii fora di a scena: piazze, caffè, fiere, chjese cum’è un bisognu vitale, u populu canta, a paghjella ripiglia fiatu
È ùn hè per piace à tutti : La voix de la corse toujours française n2 in l’81: « ce n’est pas ainsi que la Corse ira de l’avant… « Depuis quelques années, nous assistons à la naissance de groupes qui tous se disent prétendre chanter « la vraie Corse », plusieurs de ces groupes interprètent des chansons engagées ou nos vieilles paghjelle. Certains repiquent et recueillent tous ces vieux airs monotones, lassant au bout de quelques instants le public. Il est bon de conserver ce folklore ancien, bien que la paghjella ait par sa forme et ses notes trainardes, une connotation arabe. Je dis qu’user de ce chant et se consacrer à celui-ci, c’est se couper de la jeunesse, ces chanteurs tuent la vraie chanson corse ; ce n’est pas ainsi que nous laisserons quelque chose aux générations futures » scrive Charlot Prupià.
S’hè affaccata una generazione nova di cantarini. Frà quessi i giovani chì avianu fattu i so primi passi ind’è Canta, I Muvrini chì publicheghjanu u so primu discu « Ti ringrazianu » dedicatu à Ghjuliu Bernardini in u 79, i Chjami Aghjalesi sottu à a guida di i maiò scrivenu Nantu à u solcu di a storia (79) Patriziu Croce n’hà da scrive i testi nantu à musiche di Saveriu Luciani o Petru Fondacci. Di pettu à a musica, in Pigna A Cumpagnia ci dà a sente « Canti è strumenti antichi è d’oghje » rimettendu à l’onore a cetera, cialamelle o altre pivane. L’interessu pè a cetera hà da sbuccà dinù nantu à u travagliu è l’arregistramenti di Mighele Rafaelli in u 1983. Issu strumentu hà da ritruvà una piazza di primura nantu à e scene o l’arregistramenti : i Muvrini, a Filetta, Diana di l’Alba, Michela cesari, Jackie Micaelli, Caramusa l’adupreranu .
U gruppu Diana di l’Alba esce u so primu discu, Diana di l’alba in l’80, Tavagna publicheghja Chjamu in l’80 A Filetta, gruppu balaninu, face Machja n’avemu un’antra in l’81, nascenu i Surghjenti, gruppu pumuntincu, publigheghjanu in l’81 A me Patria. U cantadore Felì si ne spicca in l’89 per fà u so chjassu da solu è cumincià una longa è bella cullaburazione cun G.T.Rocchi.
Arrimbendu si à e lotte, sempre CUPC tene a so strada, aprendu si à l’altre minurità (Paese bascu, Catalogna) multiplichendu i scambii cù artisti indiati (Paco Ibanes, Maria del Mar Bonnet, Quilappayun), l’ultimu discu Ci hè dinù esce in L’82. Sparitu CUPC da a scena culturale, a pruduzzione si diversificheghja. Poletti è Guelfucci facenu strada da soli è piglia forza a generazione nova di cantarini, è una cullaburazione nova cù l’autori,
Sò nati : E voci di a Gravona in l’86 (Spaventu), l’Albinu in l’87, Ottobre in l’88 (Gattaceca/Mac Daniel), i Mantini è l’Arcusgi, in l’89.
L’anni 80 sò quelli di cambiamenti impurtanti pè a Corsica : amnistia di i prigiuneri pulitichi cù l’avventu di Mitterand, creazione di l’Università, Statutu particulare ma dinù in l’82 creazione di FR3 Corsica è di RCFM in l’84 chì saranu mezi di prumuzione pè a canzona corsa. E prugramazione facenu una piazza impurtante à sta canzona nova. St’anni 80 sò dinù l’anni ch’elli piglianu i gruppi e so distenze di modu diversu di pettu à i muvimenti pulitichi, for di l’Arcusgi chì si definiscenu cum’è un gruppu liatu à u muvimentu Naziunale. Purtendu puru a rivendicazione, i cantarini anu u prugettu d’avanzà di modu indipendente è di prumove u cantu in Corsica ma dinù al di là. Dice Poletti in un’intervista data à u Kyrn Magazine in l’88 : « La Corse est un réservoir vocal extraordinaire, mais le problème pour nous maintenant c’est le un problème de diffusion. Il nous faut exporter la chanson corse. Dans son cadre naturel méditerranéen d’abord, je pense nottamment à l’Italie, il faut bien se décider à travailler en professionnels, ce qui nous apportera la technicité le goût de la chose bien faite, il faut comprendre une fois pour toutes que cela ne nous enlevera pas notre âme ! »