BIENNALE DI PROSA DI L’ISULE

Si tratta di una struttura di prumuzione di a creazione literaria in catalanu, corsu, sardu è sicilianu. L’affare hè principiatu in u 1995 cù un’iniziativa corsusarda, è dopu si hè allargata à e Baleare (1997) è po in u 1999 cù a Sicilia. Hè un cuncorsu gestitu è purtatu da quattru ghjurie cumposte in ogni situazione da persone cunnisciute in i so lochi pè a so attività à prò di a spressione literaria. Tutti i dui anni, isse ghjurie pruchjamanu i vincitori di a so isula è l’annu dopu si publicheghja l’intertraduzzione è a publicazione di i testi premiati. Cusì si hè pussutu fà Vicini (Albiana,1997) è Scunfini (Albiana,1999). E quattru ghjurie si sò accolte in Corti è anu preparatu inseme l’edizione di u libru (in versione corsa è francese) di i raconti premiati in u 2001 (intitulatu Des nouvelles d’Imédoc, 2002). Da issu mumentu custindi a relazione hè cuntinuu nantu à issu territoriu apertu à u barattu di e lingue è literature.