INTERVISTA BIAGIO GUERRERA

A lingua siciliana si trova in un’epica di grande vitalità espressiva.

Ind’è l’ambiente pueticu spicca u nome di Nino De Vita, Premiu Moravia, chì da a so regione nativa di Cutusio hà strattu e storie, i lochi, a parlata, da custruisce l’alfabetu pueticu sputicu soiu cusì particulare. Di a stessa generazione Sebastiano Burgaretta chì si hè insuchjatu da Avola pè una puesia chì hà un fiatu più ampiu, si allarga à u Mediterraneu sanu, à u mondu Ellenisticu, Arabu, Ebraicu in un solu abbracciu maiò. In a generazione più recente, in più di Biagio Guerrera, ramintemu à Salvo Basso, sparitu troppu prestu. Cun ellu u sicilianu si hè liberatu quasi cumplettamente di qualsiasi eredità ligata à u mondu paisanu. Sò frammenti acuti è dulurosi, quessi di soiu

Ind’è l’ambiente teatrale ci hè stata sti pochi anni una sfiuricciata vera è sputica di autori novi è di scritture dinù. U maestru ricunnisciutu ferma  Franco Scaldati, dramaturgu trà i più maiò in Italia, chì hà reinventatu u so palermitanu in modu pueticu è fantasticu, ancu mettendu lu à u serviziu di certe traduzione di primura, cum’è A Timpesta di Shakespeare. À cantu à Scaldati si sò affirmati parechji autori più giovani, cumè u messinese, Spiro Scimone, chì si hè avvicinatu à u sinemà cun successu, Carmelo Vassallo, catanese. Sempre in Catania Nino Romeo, di u gruppu Iarba o Enzo Alaimo, autore di un teatru di estru civile. Tutti autori chì anu purtatu un suchju novu à a grande tradizione di u teatru in lingua siciliana.

Ancu u sinemà si merita di esse ammintatu. In più di Spiro Scimone citatu prima è chì hà traspostu u travagliu teatrale Nunzio in u filmu Due Amici, i nomi più rapresentativi sò i palermitani Daniele Ciprì è Franco Maresco, chì si sò spressi tanti anni in videò, cù u so Cinico TV è po a li anu pruvata nantu à u scraniu maiò realizendu trè lungumetragi, è trà quessi certi assai cuntestati, ma di grande efficacità puetica. Cù un gustu pè e ruine chì hè propiu sicilianu schjappatu.