Versione :

Ducumentu
Storia della Sicilia

STORIA DI A SICILIA

 

I primi populi chì ghjunsenu in Sicilia, aghjunti cù e pupulazione di u locu, funu i Sicani e Siculi; dopu, da altre terre, ghjunsenu Elimi è Fenici chì si stabilinu in a parte occidentale di l’isula.

Sicani è Siculi luttonu un bellu pezzu trà d’elli sinu à accurdà si in modu tacitu per stabilì si in zone diverse di l’Isula: à l’ueste i Sicani; à l’este i Siculi.

U fiume Imera (chì in a parte sud, essendu firmatu da acqua salmastra, fù chjamatu Salso) diventò da u cunfine trà i dui populi. È  da issu tempu u fiume separa a Sicilia occidentale da quella orientale.

In l’annu 734 prima di G.C. ghjunsenu i primi culunizatori Grechi: si stabilinu à u pede di una muntagna, duv’ella ci hè oghje a piccula cità famosa di Taormina, è fundonu a prima culunia nant’à issa piaghja:  Naxos.

L’annu dopu, in u 733, altri chì venianu da Curintu, andetenu più à sud  è fundonu à Siracusa.

In pocu anni nascinu numerose culunie longu à a costa orientale è meridiunale di a Sicilia: Zancle, l’attuale Messina (730), Megara Hiblea (728), Catania è Leontini (727).

Durante u seculu dopu, i culunizatori grechi si sparsenu  sinu à l’isule Eolie o Lipari è, in l’annu 680, à nordu di a Sicilia è, in sequitu, longu à a costa meridionale, quella chì feghja ver’di l’Africa, da duve pruvenianu  i Fenici Cartaginesi.

Tra e culunie ramintemu à Gela (688), Selinunte (628), Akrai (623), Camarina (598), Akragas (580).

L’abitanti di Zancle, l’attuale Messina, fundonu à Milazzo è Imera (vicinu à u fiume di listessu nome).

E cità, in issa fasa storica, avianu un guvernu simule à quellu di a “polis” ellenica. E lege eranu fatte è discusse davanti à u populu è ogni cità pudia zuccà a muneta sputica soia. I guvernatori eletti da u populu avianu u nome di “Tiranni”.

In u 452  i Siculi, cù u rè Duceziu, fecenu a guerra à i Grechi.

Duceziu avia stabilitu u so cumandu in Noto: e cità pudente di Agrigentu e di Siracusa si mossenu contru l’armate di i Siculi.

Duceziu, scunfittu, fù esiliatu in Curintu, a cità da duv’elli venianu i fundatori di Siracusa, à cundizione ch’ellu ùn vultessi più in Sicilia. Ma passati cinque anni riturnò ind’è l’Isula, mossu da a previsione d’un oraculu, per fundà nantu à a costa tirrenica a cità di Calatta (oghje Caronìa).

In u 440, Duceziu murì, à solu 48 anni.

Cù a morte di Duceziu l’ellenizazione di a Sicilia ùn scuntrò più ostaculi.

E cità elleniche siciliane, è trà queste soprattuttu Siracusa ed Agrigentu, diventonu ricche è pudente in u Mediterraneu sanu. Messenu à fà a guerra contr’à altri populi, Fenici trà i primi.

Imera fù distrutta à l’iniziu di u quintu seculu, invece Gela, fù abbandunata da l’abitanti, trasferiti in Siracusa per ordine di Diunisiu è scumparse cumplettamente in u 282.

Certi storichi accertanu chì quelli chì a si avianu franca in Gela si spiazzonu ver’di l’occidente è si stallonu nantu à a muntagna Ecnomo, propiu davanti à a foce di u fiume Salso.

Oghje in u situ di Ecnomo spunta Licata, cità chì hà chjappu un’impurtanza maiò in i seculi dopu.

E guerre contr’à i Cartaginesi ùn piantonu sinu à quand’elli ghjunsenu i Rumani à Messina: da tandu si mosse a nimicizia seculare frà i dui populi.

I Rumani avianu ambizione nantu à a Sicilia. In sequitu à e guerre contru à i Cartaginesi è contru à tutte e cità siciliane, Agrigentu mettia fine à a so pudenza in u 262 prima di G.C; è Siracusa, l’ultima cità à resiste contru à i Rumani, puru bella difesa da u sapiente Archimede, cascò in u 212. Cù a disfatta di Siracusa, a Sicilia diventò una è firmò cusì per seculi è seculi.

Ma prima di trattà di l’occupazione Rumana, cunvene à parlà di dui tiranni chì fecenu a storia greca in Sicilia: Falàride di Agrigentu (à u pudere per sedeci anni, 570-554 prima di G.C., fù tombu à petrate) è Diunìsiu di Siracusa (à u pudere per trentottu anni, 405-367 prima di G.C.).

Falaride era un rè crudele chì gudia assistendu à l’esecuzione di i so nemici è opponenti, bruciati vivi in a panza di un toru di bronzu: i lamenti di i cundannati si trasfurmavanu in mughji di boi.

Pare chì issu strumentu di morte crudele era accunciatu nantu à a muntagna di Licata di nome Ecnomo, chì in a lingua greca avia u significatu di “scelleratu”.

A crudeltà di Falaride fù tale ch’ellu fece castigà drentu à u toru di bronzu quellu stessu chì l’avia inventatu, Perillo o Perilao di Atene.

STORIA DI A SICILIA-B

U pudere di Diunisiu, tirannu di Siracusa, durò quasi 40 anni, è durante issu tempu amministrò cun bon guvernu a Sicilia è difendendu la da e brame di Cartagine.

Cunfidenza, ùn ne avia per nimu, à tal puntu ch’ellu si facia rasà a barba solu da e so figliole.

Dice a legenda chì Diunisiu tenia i prigiunieri in una grotta in forma di arechja in modu à pudè li ascultà ciò ch’elli dicianu da a parte alta di a grotta, chjamata sempre oghje “Orecchio di Dionisio”.

Diventata pruvincia di Roma, a Sicilia perse a so impurtanza pulitica, diventendu u granaghju di a Cità.

U cumandu di l’Isula era cunfidatu à un Pretore stabilitu in Siracusa, capitale di tutta a pruvincia, assistutu da dui altri Questori, chì unu di quessi era residente in Siracusa; l’altru in Lelibeo, punta strema di a Sicilia occidentale.

À lavurà e terre, i Rumani purtonu in Sicilia assai schjavi da l’Asia.

Ma e rivolte eranu frequente; è trà queste, merita di esse citata a rivolta di Enna, scatenata da Euno di a Siria è chì si prulungò per settant’anni finu à l’annu 138 prima di G.C..

Sottu u duminiu di Roma, a Sicilia traversò ancu seculi di pace, a “pax romana” è, dopu à dui seculi da a nascita di l’imperu, in u 212 dopu à Cristu à i Siciliani li fù cuncessa “a citadinanza rumana”.

I primi seculi dopu à a nascita di Cristu funu pè a Sicilia l’anni di diffusione di u Cristianisimu. In Siracusa ebbe un effettu tamantu u martiriu di Santa Lucia, chì tutti i fideli onoranu sempre è ci s’arricumandanu pè a salvaguardia di a vista.

Dopu à a caduta di l’imperu Rumanu (476), a Sicilia fù occupata da i Bizantini chì a duminonu per quasi trè seculi da u 535. A duminazione bizantina si caratterizò per l’impusizione di tasse alte. Durante issu periudu i Saracini assaltavanu e cità di mare, à tal puntu chì in u 663 l’Imperatore d’Oriente Costante II trasferì a capitale di l’imperu bizantinu da Custantinopuli à Siracusa (era finu à l’annu 669).

L’assalti di l’Arabi purtonu à l’occupazione di una parte maiò di a Sicilia, iniziata cù a cità di Mazara in l’annu 827.

L’Arabi spartinu a Sicilia in trè unità amministrative: u Vallu di Mazara (à l’ueste), u Vallu di Demona (à nordeste) è u Vallu di Noto (à sudeste), cunsiderendu per cunfine a valle di u fiume Salso, cum’ellu era stalvatu quandu l’isula fù divisa frà Siculi è Sicani.

Palermu, per via di a so vicinanza cun l’Africa, diventò capitale cù a custruzzione di splendidi munimenti è centinaie di muschee.

L’Arabi purtonu in Sicilia numerose tecniche di a so civilizazione. Migliuronu i metudi di lavurazione di a terra; pratichendu un usu raziunale di e risolse idriche.

Assai termini è parolle di u linguaghju sicilianu sò di derivazione araba.

Ma cumandanti ed Emiri arabi eranu in lite trà d’elli. U signore di Siracusa, Ibn at Tumnah, dumandò aiutu à i Nurmandi, stallati da pocu in Calabria, per andà contru à Ibn Hawas, signore di Girgenti.

Quessa fù l’iniziu di a cunquesta nurmanda di a Sicilia. In l’Italia meridiunale c’era digià Roberto u Guiscardo, figliolu di Tancredi d’Altavilla, ed in Sicilia ghjunse un fratellu di soiu, Ruggeru, chì u Papa Urbanu II li avia cuncessu u titulu di Gran Conte di Sicilia (capitale di a Contea fù Troina, 1089) è in u 1098 a facultà di numinà Vescuvi, secondu a “Apostolica legatio”.

Un privilegiu simule fù stesu ancu à i so discendenti.

I Nurmandi avianu cacciatu da a Sicilia i Musulmani. Quessa rappresentava un meritu per u Papa.

À a morte di Roberto (1085) u Regno di l’Italia meridionale passò ad un figliu Ruggeru, chì era in lotta cù u fratellu Beomondo. U ziu Ruggeru, u Gran Conte, rifece in pace i nipoti, ricevendu in cambiu a metà di a Calabria ed i diritti cumpletti nantu à a Sicilia.

Quandu u Conte Ruggeru morse (Mileto 1101), lasciò erede, à l’età di sei anni, u figliolu Ruggeru, ch’ellu avia avutu da a terza moglie, Adelasia, detta ancu Adelaide.

U titulu di Cavaliere è Conte di Sicilia passò à u figliolu Ruggeru II, intornu à u 1112, quand’ellu avia 16 anni.

A so pulitica fù d’esse attente à ùn scuntentà tutte l’etnie presente in Sicilia, quelle di cultura araba, latina è bizantina.

Palermu diventò una cità ricca. In u 1127 à a morte di Guglielmu II, nipote di Robertu, cumu quessu ùn avia eredi, Ruggeru II diventò patrone di a Puglia è di a Calabria è, cun l’appoghju di a Chjesa, ricevì a Curona di Rè in l’annu 1130 in a Catedrale di Palermu, duv’ellu si leghje sempre “Prima Sedes Corona Regis et Regni Caput”.

Da issu mumentu cuminciò a storia di u “Regnum Siciliane”, durata quasi ottu seculi (1130-1860), chjamatu ancu “Regnum utriusque Siciliane”, citra pharum et ultra pharum.

Quand’ellu morse Ruggeru II (1154), li successe nantu à u tronu u figliolu Guglielmu I, dettu “il Malo”, quellu chì in u 1155 impunì l’acula da stemma di a cità di Palermu. Dopu à a so morte (1166), li successe u figliolu. Issu  Guglielmu II, dettu “il Buono”, guvernò cun ghjustizia è alluntanò da e cariche i malonesti è quelli atti à fà male. Fece custruisce una cità tamanta fora di Palermu nantu à una culletta cù una chjesa, chjamata “Mons Regalis” (oghje Monreale).

Guglielmu II, à l’età di 39 anni, prima di more (1189), ùn avendu figlioli ellu, fece numinà erede à u tronu a so zia Custanza, figliola di u so babbone Ruggeru II.

Custanza in u 1186 avia spusatu à Enricu VI di Germania ed era appughjata da u vescu di Palermu; ma fù incutunatu Rè Tancredi, figliolu di un mezu fratellu di Custanza, un altru Ruggeru duca di Puglia.

Tancredi muria in u 1194 è lasciava à u so postu u so figliolu chjucu, Guglielmu II .

Enricu VII di Germania, pretendendu à u tronu, mosse a guerra prima contru à u nipote Tancredi è dopu à Guglielmo III, chì debbe lacà a curona di u Regnu u ghjornu di Natale di u 1194.

Mentre chì a so moglie Custanza parturia di u figliolu Federicu, Enricu VII fece incatenà u picculu Rè spusessatu è tutti l’altri fratelli di Tancredi è i fece  trasferì in Germania à l’appiattu di a moglie.

In u 1197, pocu prima di more, Enricu VII fece massacrà tutti i figliulini.

Cù a morte di Ruggeru II (1154) a sterpa nurmanda, durata solu quaranta anni, debbe lacà u regnu à a dinastia sveva cù Enricu VI, mortu in u 1198.

À a morte di u babbu, Federicu II, à l’età di quattru anni, fù numinatu Rè ed Imperatore.

A mamma Custanza affidò u figliulettu Federicu à u Papa Innucenzu III, chì l’educò à a so corte finu à l’età di quattordeci anni quand’ellu pigliò i pieni puderi di Rè.

STORIA DI A SICILIA-C

Custanza morse in u 1198 pochi mesi dopu mortu u maritu, ma pocu prima, cù u Papa, avia pensatu di dà cume moglie à u figliolu a surella di u Rè d’Aragona, ancu ella Custanza, di dece anni più anziana chè Federicu.

U matrimoniu fù celebratu in u 1209, ma in u 1222 Custanza morse à Catania è, da tandu, Federicu si alluntanò sempre di più da Palermu, duv’ellu vultava di raru, benchì issa cità firmessi capitale di u Regnu.

Federicu preferia stà in in Puglia, vicinu à Foggia, vistu chì a so pulitica era principalmente ridotta à a Germania.

Fù un omu coltu è struitu, regnò cun saviezza è, sempre chjucu, fù cugnumatu “Stupor Mundi”. Parlava varie lingue: u tedescu, u “sicilianu”, u francese, u grecu è ancu l’arabu.

Un trattatu di soiu, nantu à a caccia cù u falcu, porta u titulu di “De arte venandi cum avibus”. In u 1231, racolse e lege di u Regnum in un vulume cun titulu “Liber Augustalis” (E Custituzione di Melfi).

Federicu ùn accettò di sottumette si à u pudere è cuntrollu papale. Ed hè per quessa chì ellu fù scumunicatu da i Papa Gregoriu IX ed Innucenzu IV.

Si dete à fà cunnosce a lingua di a so Corte è creò a “Scuola Siciliana”.

In u 1250  Federicu II morse è li successe nantu à u tronu u figliolu Curradu, mentre chì Manfredi, figliolu naturale di Federicu, si era messu à a guida di u Regnum Siciliane è avia fattu spusà a so figliola, anch’ella chjamata Custanza, à u Rè Petru d’Aragona.

L’Imperatore Curradu morse in u 1254 lascendu erede à u tronu u figliolu Curradinu.

Manfredi, apprufittendu chì Curradinu si era giovanu, si fece incurunà Rè in u 1258.

In u frattempu u Papa avia attribuitu a curona di Sicilia à Carlu d’Angiò. Issa situazione cagiunò guerre incruciate trà pretendenti svevi, chì si cumpiinu cù a scunfitta è a morte di Curradinu in u 1268. L’Imperatore era sempre zitellu senza eredi.

Cun ellu finisce a dinastia sveva.

 

L’Angioini, chjamati “francesi”, funu accettati male da i Siciliani, perchè ch’elli eranu auturitarii è preputenti.

U ghjornu di Pasqua di u 1282 scuppionu i Vesperi Siciliani.

La rivolta si sparse in furia ind’è tutta l’isula. I francesi funu riettati da u  populu sicilianu: d’issa situazione ne apprufittò Petru d’Aragona, numinatu Rè di Sicilia in u settembre di u 1282.

Mortu Petru (1285) u successore nantu à u tronu d’Aragona fù u figliolu Alfonsu, mentre chì u secondu figliolu, Ghjacumu, fù Rè di Sicilia sinu à a morte di u so fratellu (1291) è lasciò u guvernu di a Sicilia à u terzu fratellu, Federicu.

Ma i Siciliani, per evità di unisce a curona d’Aragona è quella di Sicilia, in u 1296 detenu a curona reale di Sicilia à Federicu III.

E guerre è i cuntrasti cun l’Angioini di Napoli ùn eranu mai calati. Solu in u 1302 fù firmata a pace di Caltabellotta, chì ci si ricunniscia à Federicu d’Aragona u Regnu di a Sicilia, mentre a parte cuntinentale “Ultra pharum” di l’anticu Regnum Siciliane era affidata à l’Angioini.

Federicu III attribuì funzioni à u parlamentu sicilianu è u spartì in trè sezzione: ecclesiastica, militare è demaniale. Fù propiu quella parte demaniale à cuncede diritti tamanti à i Baroni è cusì, mentre chì ind’è l’Italia settentriunale si spenghjia u feudalisimu, in Sicilia cuminciava un longu periodu di Sottumissione à i pudenti latifundisti.

Federicu III stabilì dinù chì l’acula sveva saria apposta nantu à i gunfaloni è i scudi di parechje Cumune, cumune chì, à i tempi di Federicu II, eranu chjamate “Universitas”.

Quand’ellu morse, in u 1337, diventò Rè u so figliolu Petru IV (1337-1342) è po u figliolu di quessu, Ludovicu, ch’avia solu cinque anni; morse giovanu dinù ellu, à dicessette anni, in u 1335, lascendu u Regnu à u fratellu Federicu IV, cugnumatu “Il Semplice”, di solu 13 anni,.

Vistu a so età, Federicu IV era sottu a tutela di a so surella Eufemia cù u titulu di Vicaria. In issu periudu turnonu e lite cun l’Angioini di Napoli è, quandu morse Federicu IV (1377), avendu una sola figliola, Maria, li lasciò u tronu è ella andò à spusà si cun Martinu d’Aragona, dettu “Il giovane”, in u 1390 (è morse in u 1402). Quand’ellu morse ellu, in u 1409, u pudere passò à issu Martinu u Vechju, Rè d’Aragona.

Da tandu a Sicilia fù privata di a so autunumia è di a libertà, passendu sottu à a duminazione spagnola.

Iniziò cusì u periudu di i vicerè. In u 1415 u novu Rè, Ferdinandu di Castiglia, Rè d’Aragona è di Sicilia, dettu “Il Giusto”, dete a prima carica di Vicerè à Juan de Panefiel.

Trà tutti i Rè di Spagna si ramenta u più à Alfonsu V (1416-1458), chjamatu “Il Magnanimo”, chì cun ellu turnonu à unì si  u Regnu di Napuli è quellu di Sicilia.

U Rè Alfonsu fundò a prima università siciliana in Catania in u 1434, chjamata “Siculorum Gymnasium”.

Altru Rè impurtante assai fù Ferdinandu u Catolicu, cugnumatu cusì chì in u 1492 avia liberatu, dopu à ottu seculi di duminazione saracina, a regione di Granata ed avia cacciatu fora di u so regnu tutti l’Ebrei chì ùn volsenu esse battizati Cristiani. Purtò in Sicilia in u 1487 u Tribunale d’Inquisizione, chì starà fino à u 1782, à u tempu di u Vicerè Dumenicu Caracciolo.

In issi trè seculi funu brusgiate 188 persone cunsiderate “eretiche” da a Chjesa. Tuttu quessa propiu in Sicilia, terra chì era stata capace di fà stà inseme pacificamente populi diversi per religione, lingua è usanze.

Ferdinandu u Catolicu morse in u 1516 è avia solu una figliola, Ghjuvanna, chì in u 1496 avia spusatu à Filippu u Bellu, figliolu di l’Imperatore Massimilianu d’Austria.

Ghjuvanna, quand’ella firmò veduva (1506), si ammalò e fù cunsiderata “pazza” finu à a so morte (1555).

Cusì, à a morte di Ferdinandu u Catolicu (1516) è Massimilianu d’Austria (1519), e duie curone passonu à u nipote Carlu. Issu giovanu Imperatore (1500-1558).era particulararmente ambiziosu: era Rè di Spagna, di Sicilia, Sardegna, Napuli, di i duminii taliani ed americani, di a Germania meridiunale, ed Imperatore d’Austria; si pudia vantà chì nantu à u so Regnu  mai tramuntava u sole.

Purtò in Sicilia l’acula bicapite uriginaria di l’Austria è, per affruntà e guerre numerose contru à i Turchi, vendia diritti à i nobili disposti à pacà.

Carlu V riuscì à cuntene l’espansione turca in Sicilia ed in Europa. Più di una volta li tuccò ad affruntà à Mohammed Dragut, chjamatu da u populu Mammo Drago: per seculi issu nome hè diventatu u sustitutu di l’orcu chì face tantu paura à e criature.

Carlu fece custruì parechje centinaie di torre nantu à a costa di a Sicilia, poste in i lochi da duve si pudia osservà da luntanu l’arrivu di i nemici ghjunti da u mare.

Carlu V abdicò in u 1556 è morse in u 1558.

Dopu à ellu u regnu tuccò à i so eredi Filippu II (1556-1598), Filippu III (1598-1621) è Filippu IV (1621-1665), chì volsenu difende a Sicilia da l’assalti di i Turchi.

Ci tocca à mette in evidenza chì durante u periudu di a duminazione spagnola u populu suffria assai è spuntonu varie insurrezzione pupulare, cume, per indettu, quelle guidate da Ghjuvanni Pollastra, dettu “Surciddu” (vene à dì “tupucciu”) in u 1511, da Ghjanluca Squarcialupo (1517) e da Ghjaseppu D’Alesi (1647).

U Vicerè, s’ellu muria mentre ch’ellu era in carica o s’ellu mancava per qualchì mutivu, u rimpiazzava un Presidente di u Regnu, in a persona di l’Arcivescu di Palermu o di u Locutenente Generale di l’arme in serviziu in Sicilia.

I Vicerè in Sicilia funu à pocu pressu settanta, finu à quandu, cun l’accordu di Utrecht (1713), u pudere passò prima à i Savoia (1713-1720), dopu à l’Austriachi (1720-1734) ed infine à i Burboni (1734-1860).

Sottu à i Burboni u Vicerè ebbe a funzione di Ministru è in u 1816 issa funzione sparì, chì tandu fù creatu u Regnu di e duie Sicilie ed à Palermu si assignò un Locutenente Generale chì, di solitu, era un Principe o un persunagiju ligatu per parentia à a casa reale.

U Rè chì fece issi cambiamenti (diventatu Rè in u 1759 à solu ottu anni) si chjamava Ferdinandu IV, da Rè di Napoli, Ferdinandu III da Rè di Sicilia è Ferdinandu I da Rè di u Regnu di e duie Sicilie.

Spessu i Siciliani anu accusatu i Burboni di esse elli soli rispunsevuli di a strettezza ecunomica di a Sicilia: in realità quessi in u 1734 avianu toccu una Sicilia puverissima.

In l’annu 1860 Garibaldi è i so “picciotti” (cusì eranu detti i giovani suldati dopu) ghjunsenu in Sicilia è battinu i Burboni, aprendu a strada à i Savoia di Vittoriu Emanuele II. Da issu mumentu a Sicilia fece parte di l’Italia unita (1861).

A Sicilia, chì u 12 di ghjennaghju di u 1848 era stata a prima regione à dà un chjassu à a rivuluzione europea, sperava cun angoscia di migliurà e cundizione pessime di vita di u populu. Ùn si passò cusì. U novu guvernu fece a leva ubligatoria, l’ordine di partenza di i giovani per u serviziu militare –ubligatoriu per quasi sette anni–; e cundizione socecunomiche di a ghjente ùn cambionu è in u 1866 e pusessione di a Chjesa e di i Cunventi, chì davanu travagliu à i paisani, funu vindute à i ricchi cù un guadagnu pè u statu di ingiru à 600 milioni di lire, denaru chì ùn ghjuvò à  migliurà e cundizione di vita di a ghjente in Sicilia.

Hè tandu ch’ella ebbe a Maffia una parte fundamentale in a gestione di u pudere, chì nata da difende i poveri, pigliò sempre di più l’aspettu di l’assuciazione di pudere è di cuntrollu à prò di i latifundisti è di i quelli chì stavanu bè.

L’annu 1892  spuntò in Sicilia a nascita di i “Fasci di i lavoratori” chì riclamavanu a distribuzione di e terre à i paisani.

E cundizione suciale, ecunomiche, igieniche è sanitarie di i minori in e zolfare eranu misere è pietose è i lochi eranu paragunati à a porta di l’infernu, duve omi è ciucci eranu trattati cume animali.

Solu dopu à a seconda guerra mundiale a Sicilia, chì mai si era scurdata di u significatu di a parolla “autunumia”, riuscì ad ottene, durante l’ultimi ghjorni di a Munarchia cù u Rè Umberto II di Savoia, una lege particulare chì cun quessa diventava a prima regione d’Italia à Statutu Speciale.

Duie settimane dopu à issa cuncessione custindi, in Italia si passava da a Munarchia à a Republica (1946).

À quasi sessanta anni da issi avvenimenti a ghjente continueghja ad emigrà, luntanu da a so terra in cerca di travagliu.

È e poche risorse, a puvertà di tanta ghjente è e ricchezze di pochi, l’intrecciu trà pudere puliticu è urganizazione criminale sò sempre tante quistioni da affruntà.

 


U MEDIEVU ARABU

In u V seculu dopu à G.C.Siracusa casca sottu à a minaccia di i barbari, visigoti è vandali, cristiani ma di fede ariana è tandu cunsiderati eretichi. À l’invasione barbariche fecenu sequitu a duminazione bizantina (da u 535) durata quasi trè seculi ma messa in periculu sempre sempre da l’incursione arabe. Per pochi anni, a cità fù ancu a sede di l’Imperu d'Oriente (da u 663 à u 668, cun l'Imperatore Custanzu). In u frattempu u vescu Zosimu avia trasferitu a catedrale da San Giovanni à a chjesa attuale, l'anticu tempiu di Atena trasfurmatu in chjesa cristiana in un’epica prima.

À u principiu di u IX seculu si intensificonu e razià di l’arabi. Un primu assediu à Siracusa fù tentatu in u 827 ma a cità cascò solu in u 878, dopu à suffrenze incridibule è privazione di i difensori, è ne avemu un ricensu propiu precisu in una lettera chì unu chì ci scappò, u monacu Teudosiu, scrisse à l’arcidiacunu Leone.

Teudosiu discrive cumu, scunvolti da a fame, l’assediati ne ghjunsenu à nutrì si ancu cun carne umana. L’Arabi, cumandati da Abû Isâ, si rapinu ogni ricchezza di a cità, strughjinu tuttu è messenu focu, lachendu daretu ad elli solu ruine fumacciulente. Si purtonu via un miglione di pezze d’oru. Terrurizati, i Siracusani circonu l’aggrottu ind’è l'isula di Ortigia.

Cum’è tutta a Sicilia urientale, Siracusa cascò in a cundizione più povera è culturalamente incolta più chè mai dapoi e so origine. U centru puliticu è culturale si spustò intornu à a corte di Palermu, mentre chì i capi arabi si luttavanu trà di elli è i Bizantini pruvavanu à pruvucà rivolte. Malgratu a prova di Maniace di custituì un centru di resistenza antiarabu, ci volse ad aspettà a duminazione nurmanda per avè i primi segni di ripresa.