Versione :

Ducumentu
Nant’à l’Etna

À chì atteppa nantu à l’Etna deve avè una bona cundizione fisica ed esse prudente assai chì hè u vulcanu maiò di l’Europa di l’Europa: hè altu più o menu 3300 m secondu l’eruzzione. I muntagnoli chì anu a pratica ponu piglia u risicu s’elli si sò infurmati capunanzu in quantu à u statu di i chjassi è po u tempu ch’ellu hà da fà. Ci vole à pensà chì ùn si pò andà di pettu à un fronte di lava senza guida. Invece, cù un guida, si pò andà in piena securità, à fighjulà un catastu di scurie, un crateriu spentu o vivu, o dinù qualchì lava chì core, una fronte lavica. Un bellu mezu hè di piglià u telefericu sinu à u rifugiu di Sapienza è di sequità qualchì visita guidata chì include un giru in minibus è po à pedi sinu à in cima. Si trova sopra à locu  in lucazione tuttu ciò chì ci vole.

Quandu a vittura ghjunghje sinu à e spallere di u vulcanu, ci vole à sequità l’indicazione Sud ì vi portanu à u puntu di accessu più à Sud, passendu per Zafferana Etnea, nantu à u latu Este. Solu à 500 da u crateriu di Monte Calvarina, in Zafferana ci sò spessu falamenti di terrenu è qualchì eruzzione di pocu tempu. U paese si rimettia ghjustu di u terramotu di u 1984 è di l’eruzzione di u 1986 ed eccu chì in u 1992 pè un mese sanu risicò di esse purtatu via da una culata lavica. Chjamonu aiutu è l’Americani ma,ndonu elicotteri cun blochi tamanti di cimentu armatu da pudè svià u fiume di focu. Nantu à a strada di a lava ci hè una scritta Colata Lavica 1992 à ramintà isse stonde dramatiche.

Da u 1997, u più di l’eruzzione sò in u crateriu sudeste. Da catania, di ferraghju 1999 si vidia u focu liquidu chì falava minacciosu. E cennere vulcaniche vensenu à rivuccà si nantu à a costa vicinu à Giarre è Riposto. Un annu dopu, di ferraghju, u crateriu si sbaccò in dui è ci fù tamanta splusione tremenda di bocce di focu è magma lfrumbulate à più di 600 m in l’aria.

Da Zafferana, più si colla ver’di Sapienza, nantu à a strada panoramica di a Casa Cantoniera, più si scoprenu ampii spazii di terra nuda chì rimpiazza furesta è piantazione di agrumi. Hè un decoru deserticu chì piglia culori quasi turchini sottu à a neve d’invernu è ti hà un versu stranu cù e scurie aggrancate in i pieghi di u magma petrificatu. U rifigiu-hôtel Sapienza à 1800 m di altu, gestitu da u Club alpinu talianu, hè statu rifattu dopu à l’eruzzione di u 9 di aprile di u 1983.

U telefericu parte da custì è và sinu à in cima. Strada facendu si vedenu tutte e tracce di l’eruzzione. Ghjuntu quassù, à chì hà pocu cicca puderà stà in caffè è viderà nantu à i scranii telè i filmi di e varie eruzzione. L’altri, chì sò atti à marchjà senza scomudu, puderanu andà sinu à a Torre del Filosofo, l'osservatoriu d'Empédocle. Dice chì in u 433 prima G.C. u filosofu d'Agrigentu averia spicca u saltu in u crateriu da fà a prova chì i gasi u pudianu mantene per aria. Altri dichjaranu chì quellu saltu era statu una fisica, in soma una figura metafisica di a morte. Ma, vistu ch’ellu si hè ritrovu una di e so sandule à l’arice, sarà cascatu senza vulè la ; à rombu di pensà, i filosofi sapete, certe volte…

Da in cima quassù a vista cambia secondu a forza di l’eruzzione, l’ora, trà pisà è ciuttà di u sole… U scrittore inglese Evelyn Waugh dice chì cum’è l’Etna ùn si ne vede nè ind’è l’arte nè in a natura: hè un spettaculu cumuvente chì ùn si pò crede, cù a so cima spampillulente chì si spechja nantu à un nulu di fume grisgiu mentre chì l’orizonte rosulu si schjarisce è po pianu pianu si strughje sottu un celu grisgiu pastellu.