Passighjate à pedi o giru in 4X4

L’Etna, o ci cullate o ne fate u giru. Per istrada o in trenu. Partendu da Catania, u Circumetnea lega i paesi di i cuntorni etneani è finisce in Riposto, nantu à a costa. Issu trinnichellu permette di visità l’infilarata di paesi in petra di lava, è in particulare Adrano, cù u so castellu nurmandu è u so ponte sarracinu postu nantu à a lava, Maniace duv’ellu ci hè u castellu Nelson chì Ferdinandu III uffrì à u triunfatore di Trafalgar. È po ci hè Linguaglossa, da duv’ella parte a strada Mareneve chì permette di principià à attippà pè a parte nordu. L’Etna duv’ellu tira u ventu cutratu, si assumiglia à l’Alpe. Dopu francatu aranceti, ficareti, aliveti è vigneti, si entre in una furesta folta di amanduli, pistachjai è castagni è dopu, lecce, fai è pini pè u più, è po ghjinepari. À 1800m si ghjunghje in Piano Provenzana. E stallazione (casarone è coglimonti meccanichi) sò state rifatte dopu à l’eruzzione di 2001-2002. Più insù ùn ci hè più piante; solu qualchì ciuffu di spinosanto è po duie murze.

Da u latu sud omu si pò avvicinà per Zafferana Etnea o per Nicolosi. A strada chì lega i dui paesi colla sinu à u casarone Sapienza, à 1 900 metri dopu francatu un paisagiu lunariu, marcatu cun craterii, avale spenti, di  e bocche laterale è cun ghjetti recenti. Custì, i culori sò da u negrufume pè e più nove invece e più vechje sò grisgiu verdognu scialbidu : ci venenu i lichen nantu. Ghjuntu à u casarone, si cuntinueghja à attippà in telecabina sinu à 2 500 metri. Dopu, sia à pedi sia in 4x4 sinu à u crateriu sumitale. Da quì a vista, s’è u tempu hè bellu, porta da l’Euliane sinu à a punta meridiunale di a Sicilia, in Palerma.

A falata ver’di Nicolosi è po Ca­tania piglia una strada à trinca trinca custruita quasi tutta nantu à un ghjettu impressiunante di lava di u 1983. Quessu ricopre una parte di u ghjettu tremendu chì si hè fattu in u 1669 da un crateriu laterale è chì hà cupertu una bella parte di Catania.