Versione :

Ducumentu
Pupulazione è pruvince

A PUPULAZIONE DI A SICILIA

Cù i so 5 miglioni è più abitanti, a Sicilia hè pupulata assai, malgratu un’emigrazione di sempre. A densità di pupulazione di pettu à a superfice hè 2 volte è mezu più maiò chè in Sardegna è 6 volte di più chè in Corsica. U più di a pupulazione stà in e cità: Palermu, Catania,  Siracusa è parechje cità grande o più chjuche.

E NOVE PRUVINCE DI A SICILIA AGRIGENTE. 

A culunizazione greca antica ci hà lasciatu una stampa impurtantissima. A Valle di i Tempii hè un situ archeulogicu chì ùn si pò mancà. À misura ch’è vo ci pediate nantu, u tempu si allena è ùn si stà tantu à truvà si ciuttatu in piena mitulugia! Sopra à tuttu quandu di un colpu, omu si trova davanti à u Tempiu di a Cuncordia. È puru ùn si cappia u presente propiu attuale di a pruvincia d’Agrigente è a vita di i so 450.000 abitanti.

CALTANISSETTA. 

Saranu ingiru à 200.000 l’abitanti di issa Pruvincia. L’ecunumia hè stata sempre basata nantu à l’agricultura è l’estrazzione di l’inzolfanu. Trà nordu è sud di a pruvincia, oghje si vede una diferenza trà ecunumia agricula è attività di u settore terziariu. Caltanissetta hè u locu nativu di parechji scrittori (cum’è per esempiu Leonardo Sciascia chì hè di Racamulto) è persunalità storiche d’Italia.

CATANIA

Staremu à pena di più pè issi lochi custì duv’ellu ci hè una pupulazione di 1100000 abitanti. I paisaghji in issa pruvincia sò assai differenti. U monte più altu hè l’Etna (3.340m) u vulcanu più attivu d’Europa.

ENNA. 

Issa pruvincia hè in u centru, in u core di a Sicilia. Hè una campa di passighjà trà ruine di u passatu è quasi di sente sempre a vita di tandu. Marchjà in e fureste è scopre issi lochi chì vi incantanu. Hè dinù regione di lavi, di castelli è paesi di u Medievu, ma ancu di cucina squisita, dicenu una mansa di quelli chì ùn li dispiace à fà falà!.

MESSINA. 

A pruvincia face più di 10% di u territoriu sicilianu. Custindi sò dinù l’Isule Euliane, nantu à a cumuna di Lipari. Pè u più, hè terra di monti, fora di poche pianure. A cità di Messina è e piaghje ingiru tenenu à pocu pressu 500.000 habitants.

PALERMU

In tuttu sò ingiru à 1.300.000 abitanti in a pruvincia. Issu rughjone dà nantu à u mare Tirreniu, cù u so liturale à golfi (Carini, Palermu è Termini Imerese. Sò lochi frequentati assai da u turisimu Mondellu, Cefalù è Sferracavallu. .À u largu davanti à Palermu ci hè l’isula d’Ustica, duv’ellu ci fù un vulcanu. À chì li piace à ciumbà sottu mare, hè propiu un incantu. Ma ùn li manca a muntagna cù E Madonie chì và da a Valle di Pollina à a Valle d’Imera. Un ambiente prutettu cù u Parcu Regiunale di e Madonie. Ci sò dinù tante maraviglie artistiche d’eri è d’oghje: Solunto, Monte Jato, Monreale è di sicuru Palermu, duv’elle si mischjonu civilizazione europea ed araba. Hè dinù una terra di gastrunumia sputica, di tradizione è celebrazione pupulare 

RAGUSA

U locu hà attiratu assai i viaghjatori di l’epuca rumantica quand’elli facianu u « Giru maiò » è si ispiravanu di un paisaghju dedicatu tuttu à a Natura è à unepoche spezie animale. L’agricultura hè diviziosa ed appruvisiuneghja parechji grandi mercati cunnisciuti per l’Italia sana. Ci hè dinù un capitale di munimenti d’arte barocca significativu assai, pruduttu in e ricustruzzione dopu à un terramotu maiò à a fine di u XVIIesimu seculu.

SIRACUSA

Custì l’abitanti di a pruvincia saranu più di 400.000. Hè un lucale turisticu assai per via di u so interessu storicu, archeulogicu ed artisticu. Hè vicinissima a pruvincia di Catania è ancu l’Etna. A particularità vulcanica di u terrenu li hà fattu praticà da sempre a cultura di u sale in e padule piaghjinche.

TRAPANI. 

Hè a più occidentale di a regione è si stinza trà Tirreniu è Canale di Sicilia. Hè propiu un locu d’allusingu, cù i so paisaghji varii è e testimunianze archeulogiche. Hè dinù terra di tradizione sputiche assai. U patrimoniu naturale hè un vede. È marcanu e so isule Egade, l’isula vulcanica di Pantelleria, e riserve naturale prutette cum’è quelle di u Zingaru. Vicinu à a cità di Trapani è i so munimenti splendidi, ci sò lochi propiu particulari cù e so saline bianche bianche è i mulini à ventu spapersi pè u rughjone. Hè una riserva umida di primura, prutetta da a Riserva Naturale di Trapani è Paceco. Hè custindi dinù un locu predilettu da fà si qualchì viaghju in a memoria antica passendu trà tante vistighe archeulogiche (Selinunte, Mothia ed Erice).