Versione :

Ducumentu
Etna focu, acqua, terra è divizia

L’Antichi si eranu accorti chì a cennera vulcanica face a terra più pruduttiva. In i lochi ingiru à i vulcani, pè a vegetazione ci hè un modu particulare di spianà si è dinù di cultivà la, nantu à trè piani. Da una certa altura secondu à ogni vulcanu, a terra hè sterile per via chì a cima hè troppu carca à cennera o fatta à petra nuda. In quantu à l’Etna eccu cum’ellu dice Strabone u geografu: Quassù, e terre sò spugliate, michjate di cennere è cuparte à neve d’invernu. È Procopu insegna chì u Visuviu hè à livelli : a parte suttana hè cuparta sana sana da a vegetazione, ma a parte sopra hè accidentata è, da ghjunghje ci nantu, difficilissima ch’ùn si pò dì.

Issa dispusizione à scala dipende da quant’ellu hè altu u vulcanu è intensa l’attività eruttiva : prima di u 79, per l’Etna a zona sterile pare più impurtante chè pè u Visuviu chì à sente à Strabone, saria statu cultivatu quasi sinu à in cima, fora di a punta stessa : «  U Visuviu, duv’ellu ci hè fora di a punta, bellissime terre di culture sposte intonde. A punta stessa hè pè u più spianata, ma ùn ci hè cresce nunda nunda

A maiò parte di e descrizzione antiche insegnanu pè u paisaghju vulcanicu, una scalera almenu binaria : sottu à a punta, a fertilità di i terreni vulcanichi ghjova solu pè i livelli sottu à a punta sterile, è spessu a vegetazione dipende da a pussibilità d’accessu è à l’umanizazione.

Ma si hè pussutu definisce a scalera in modu più precisu cun trè livelli: sottu à a punta, e custere sò cuparte à fureste, è po più inghjò sò « piantazione varie » cum’ellu l’insegna Strabone parlendu di l’Etna : sottu à a punta, e fureste sò à cantu à e piantazione più varie. Si pò fà u paragone trà issa spartera è a realità attuale di l’occupazione vegetale di u vulcanu, chì sarà vicinu vicinu à ciò ch’ella fù in tempi antichi : una zona di cultura (à l’inghjò sin’à 1000 m) cù a vigna pè u più, una zona di furesta (trà i 1000 è 2000 m), è po una zona troppu alta è ghjalata, bella cuparta à neve d’inguernu (trà 2000 m è 3313 m).

In fatti hè spessu a vigna à truvà si u più inghjò chì hè unu trà i puntelli maiò di l’agricultura antica. L’Antichi avianu capitu quant’ellu hè prupiziu u terrenu vulcanicu, da mette ci a vigna nantu. Hè cusì ch’elli eranu famosi i i vini di u Visuviu è di l’Etna, purtendu divizia à  e cità d’issi cuntorni. L’Expositio vanta i vini di altissima qualità prudotti in i vigneti di l’Etna : Issa muntagna si porta nantu à e so custere tanti vigneti chì danu i vini più celebri.  In Pompei è puru for’di Campania, sò state ritrove l’anfore cù u nome di u vinu di u Visuviu.