STORIA DI LA SICILIA

(a cura di Giovanni Scala)

 

Quannu u Patri Eternu criau tuttu u munnu, fici tanti cosi beddi e buoni ni la terra: u mari ccu li pisci, l’aria ccu li ucedda, a terra ccu l’armali e l’uomini e mentri ca s’arripusava, taliava a Terra e si fici accussì cuntentu ca la vosi teniri ni li manu e ci vosi dari un vasuni. Propria unni i so labbra tuccaru, spuntau la Sicilia.

Sta biniditta terra a statu desidirata di tutti i puopuli antichi , anchi di genti ammintati di la fantasia popolari quannu si cuntava ca c’eranu giganti comu li Cicaluòpi e li Lestrìgoni, una cosa è sicuramenti accertata ca la nostra terra era abitata di popolazioni ca appartinivanu a cchiù di dumila anni prima ca vinissi nno munnu u Signuri Gesù Cristu.

Chista genti abitava nne grutti ca matri natura avìa datu all’uomini e iddi si sappiru adattari a ddi spaccazzi di la petra e l’allargarru cu tanta pacienza fin’a falli addivintari comu li stanzi di li casi.

Ma nunn’è ca si putiva stari sempri nni li caverni e si resinu viersu a sistimarisi ansiemi e fari casi ca puoi addiventanu paisi nichi e ranni.

A ddi tiempi l’abitanti nun eranu assai e vinniru genti di livanti e di ponenti ppi stari in Sicilia.

Arrivarru Sicàni e Sìculi, ma nun sempri tutti sunu d’accordiu di unni vinniru precisamente e, ccu prima e ccu duoppu, ansiemi a iddi ci fuorru l’Èlimi e li Fenici ca nun eranu assai e si sistimarru nni la parti occidentali.

 Chiddi ca eranu sparsi nta tutta la Sicilia eranu i Sicàni e quannu arrivaru i Sìculi ficiru tanti sciarri e muorti ca a la fini s’accurdarru spartiennisi a Sicilia a mità: a manu manca , versu unni cala u suli, cci ierru i Sicàni e a manu dritta, unni spunta u suli, si ci misiru i Sìculi.

Ppi fari sta divisioni pigghiarru comu finàita u sciumi c’avìa ppi nomu Himera: na parti di chistu scurrìa versu u mari supra la Sicilia e n’autra parti, tantu cchiù longa, scurrìa versu sutta e siccomu era tanticchia salatu lu chiamarru Salsu. Di dda vota stu sciumi ha separatu chidda ca ancora si chiama  Sicilia occidentali e Sicilia orientali.

Ma la natura di l’omu è chidda ca nun av’a stari mai fermu e quannu ottucentu anni prima di Cristu sbarcarru, comu l’emigranti di li tiempi nuosci, uòmini ca vinìvanu di la Grecia, unni cci stavanu mali pirchì suppurtàvanu picca a chiddi ca cumannàvanu nni li so terri.

Lu 734 prima di Cristu fu l’annu quannu chisti avventurieri e curaggiusi si sistimarru sutta na muntagna ca oggi è truoppu mpurtanti na tuttu u munnu cco nomu di Taormina, nta na bedda spiaggia ca chiamarru Naxos.

Mancu buoni si sistimarru, ca l’annu appiersu, 733, n’autra puocu di uomini, ca vinìvanu di Corintu, si ni ierru versu sutta e si firmarru nta mpuostu ca era n’incantu e dduocu ci fabbricaru casi e nascìu Siracusa (Saraùsa).

Fuorru chisti li primi paisi di li Greci emigranti c’accuminciarru a dari fastidiu a li Siculi ca ci stavanu tranquillamenti prima d’iddi.

Si continuau nta picca tiempu la sistemazioni di tanti Greci ni li puosti di Missina 730, di Megara Hiblea 726, di Catania e Lentini 727, completannu accussì tutta la costa di lu mari Ioniu, ca era nfacci a la terra ca iddi avievinu lassatu, la Grecia, ppi spustarisi in Sicilia.

Lu seculu appriessu ci fu n’autru malustari ni la Grecia c’attorna scapparru autri pirsuni, ca ppi nun dari fastidiu a chiddi di prima, circarru puostu nill’isoletti, Lipari nill’annu 680, supra la Sicilia a manu manca di Missina, ni la stessa costa di supra e a manu a manu tutta la costa di sutta di la Sicilia ca s’affaccia versu l’Africa d’unni vinièvinu li Fenici di Cartagini.

Tra li nuovi paisi c’àppiru tanta fortuna, amm’a ricurdari Gela 688, Selinunte 628, Akrai 623, Camarina 598 e Akragas 580.

Li genti di Missina, c’a ddi tiempi si chiamava Zancle, ficiru nàsciri prima Milazzu e puoi Imera (vicinu a ddu sciumi Himera di supra).

Tutti sti città nne primi tiempi si governàvanu suli, amici tra iddi, ognuna ccu li so guvirnanti, accussì com’era nni li città di la Grecia ( Polis ) c’avièvinu lassatu qualchi annu prima. Li liggi vinievinu fatti e discurruti davanti a lu pòpulu e ppi putiri aviri na giusta ricompensa, ogni città avìa la so moneta ca circulava senza tanti storii e pirìculi.

“Tiranni“ eranu chiamati chiddi c’avièvinu arricivutu di lu populu l’incaricu di guvirnari.

A mprincipiu tirannu era na parola bona ca significava “re“ o “signore“ ca tinì a frienu lu putiri di li ricchi, ma duoppu picca tiempu stu persunaggiu fu consideratu na pirsuna tinta pirchì facìa tantu mali a lu populu e si n’apprufittava assai di la so posizioni.   

 Mentri ca li discendenti di li Greci guvirnàvinu ni tutti li città, li poviri Sìculi nunn’eranu sempri  cuntenti ni la so terra e fu accussì ca versu l’annu 452 lu re di li Sìculi, Ducèziu, s’armau di curaggiu e ccu tanti uomini si scatinau contru li Greci.

Stu re fu vulutu beni da tanta popolazioni, pirchì pinsava ca si putìvanu ittàri fora di la Sicilia li Greci e ppi stu fattu Duceziu fu consideratu ribelli di li nemici. Iddu tiniva lu cumannu a Notu, ca era lu so paisi di nascita, anchi si qualcunu dici ca era di Mineu, e chiddi ca cci ierru contra fuorru li surdati di Agrigento e di Siracusa ca erano città assai putenti.

Duoppu ca fu sconfittu,Duceziu fu mannatu a Corintu, nni la Grecia, ca era la città di unni vinievinu chiddi ca fabbricarru Siracusa, ccu lu pattu ca nunn’avìa a riturnari in Sicilia , ma, passati appena cinc’anni, arriturnau in Sicilia pirchì n’oràculu ci avìa dittu c’avìa a fari nàsciri na città nova cco nomu di Calatta ( oggi Caronìa ) ni la fascia di lu mari supra la Sicilia.

Picca tiempu ci stesi, ca murìu nill’annu 440 a sulu 48 anni. Tutta la storia di Duceziu durau mancu quattr’anni, ma stu persunaggiu arristau nni la storia di la Sicilia, no comu a chiddu ca nun vulìa la civiltà di la Grecia ma comu a chiddu ca nun suppurtava lu malu guviernu e li prepotenzi di un populu ca vinìa ppi giunta di n’àutra terra.

Chidda di Duceziu fu l’urtima possibilità ca àppiru i Siculi di liberàrisi e, di stu mumentu in poi, iddi s’accuminciàrru a “ellenizzarisi“.

Mancu tri seculi avièvinu passatu ca c’eranu li Greci in Sicilia e tanti e tanti fuorru li pirsuni ca passarru a la storia chidda mpurtanti e li città ca cumannavanu ppi tantu tiempu fuorru Siracusa e Agrigentu.

Tanti guerri fuorru fatti da tutti li città siciliani e vinni anchi lu mumentu di li Fenici di Cartagini ca nun eranu tantu luntanu di la Sicilia.

Himera fu distrutta all’iniziu di lu quintu seculu, mentri anchi Gela, ca era priparata pp’addifènnirisi di li Cartaginisi, nni lu 405 fu abbunnanàta di l’abitanti ppi ghiri a Sarausa, secunnu l’òrdini di Dionìsiu e scumpariu completamenti nill’annu 282.

Si dici ca li genti ca scapparru di Gela, si spostarru versu occidenti, ma di picca pirchì si firmarru nta na muntagna, Ecnomo, propria davanti unnu u sciumi Salsu si ietta nni lu mari e, nni lu 1606, supra na porta d’entrata di la città di Licata,ca prima si chiamava Finzìada, c’era scrittu “Hic Gela”, ca significava ca dduocu s’avia mpiantatu la popolazioni di Gela.

Non tutti su d’accuordu ccu sta teoria; na cosa è sicura, ca u populu di Gela si sparpagliau na tanti banni.

A jurnata d’oggi stu puostu è chiddu di Licata ( EKNOMO ), città tantu mpurtanti ppi tutti li seculi ca viéninu.

Li guerri contra i Cartaginisi ci fuorru finu a quannu i Romani arrivarru vicinu a Missina e fu tannu ca i Cartaginisi addivintarru eterni nimici di li Romani.

A chisti la Sicilia ci piacìa assai, e duoppu tanti guerri ccu li Cartaginisi e ccu tutti li città siciliani, Agrigentu finìu la so potenza nill’annu 262 prima di Cristu e Saraùsa, ca fu l’urtima città a resistiri a li Romani anchi si era addifinnuta di lu scienziatu Archimedi, nill’annu 212.

Iddu avìa ammintatu tanti strumenti pp’addifènniri la so città e veni oggi arricurdatu ccu sta frasi latina “invento speculo naves romanas incendit”, frasi ca secunnu certi pirsuni istruiti nun è vera. Ccu la caduta di Sarausa, la Sicilia addivintau na provincia di Roma ppi tanti e tanti seculi.

Prima di passari a chiddu ca fuorru li Romani, mi pari na cosa giusta ammintuvari du tiranni ca fìciru la storia greca in Sicilia: Falàridi di Agrigentu (a lu putìri ppi sìdici anni, 570-554 a.C., e ammazzatu a cuorpi di petri) e Dionìsiu di Sarausa (a lu putìri ppi trentuott’anni, 405-367 a.C.).

Falàridi ristau nni la storia comu un cumannanti ca s’addivirtìa a fari arrùstiri nni la panza d’un voi, fattu di brunzu, chiddi ca iddu cunsiderava traditura e ddi pòviri mischini ca cci capitàvanu, quannu si lamintàvinu ppi lu fuocu ardenti, ittàvanu tanti vuci ppi lu duluri ca parìvanu li lamenta di li voi.

Si dici ca stu strumentu di morti turmintata era sistimatu nni la muntagna di Licata ca ancora oggi si chiama Èknomo, ca nni la lingua greca significava “scilliratu”.

Falàridi fu tantu tintu di carattiri ca la prima pirsuna ca fici arrùstiri nna stu toru, fu lu stessu fabbricanti ca si chiamava Perillo o Perilao d’Ateni.

L’àutru persunaggiu fu Dionìsiu di Sarausa. Lu so cumannu durau quasi quarant’anni e fici tanti cosi buoni, ca se nun era ppi iddu tutta la Sicilia putìa addivintari na provincia di Cartagini.

Iddu nun avìa firùcia di nuddu, tantu ca si facia fari la varba di li sa figghi fìmmini. Fuorsi nun è tantu veru, ma si dici ca tinia certi prigiunieri nta na grutta a forma di urìcchia e, quannu i prigiunieri parlavano, iddu li sintìa ni la parti iàuta di sta grutta, chiamata “Orecchiu di Dionisiu”.      

Duoppu cincu seculi di storia fatta di li Greci, ca vinièvinu puru chiamata Sicilioti, la Sicilia persi tutta la so putenza e addivintau na provincia di Roma, na terra senza mportanza, ca sirvìa sulu ppi coltivari furmientu ppi l’esercitu romanu.

U cumannu fu datu a un Preturi c’abitava a Sarausa, capitali di tutta la provincia e stu Preturi era aiutatu di àutri dui pirsuni ca si chiamavanu Questuri, unu stava a Sarausa e n’autru a Lilibeu, la punta cchiù luntanu di la Sicilia occidentali.

A travagghiari li terri, li Romani purtarru tanti pòviri schiavi di l’Asia e ppi nu beddu piezzu sta pòvira parti di l’umanità detti tantu cchi fari a li Romani ccu rivoluzioni e ccu tantu sangu ppi li paisi.

La rivoluzioni di Enna mèrita èssiri ammintuviata ca fu chidda scatinata di Euno di la Siria e duràu sittant’anni finu all’annu 138 prima di Cristu.

La Sicilia sutta Roma passàu tanti seculi di paci, chiamata “ pax romana”, e duoppu dui seculi di la nàscita di l’imperu, Roma appi tanticchia di considerazioni ppi li Siciliani e sulu nill’annu 212 duoppu Cristu ci fu data “la cittadinanza romana”, propria quannu stu privileggiu nun sirvìa a tantu: era lu tiempu di l’imperaturi Caracalla.

Sti primi seculi, duoppu la nascita di Cristu, ppi la Sicilia fuorru li tiempi di lu Cristinesimu e a Sarausa àppi grandi significatu lu martìriu di Santa Lucia, a cui tutti li fedeli n’arraccumannàmu ppi la vista di l’uòcchi.

A picca a picca l’imperu persi putenza e duoppu la so “caduta” (476), la Sicilia fu pigghiata di li  Bizantini, a partiri di l’annu 535, ppi quasi tri seculi e na stu perìodu li siciliani pagàvanu truoppu tassi.

Chistu fu anchi lu tiempu di li Saracini ca attaccàvanu tutti li paisi di mari, tantu ca ni lu 663 l’imperaturi d’orienti Costante II trasferìu la capitali di l’imperu bizantinu di Costantinopoli a Sarausa finu all’annu 669.

Assai fuorru l’attacchi di l’Arabi, chiamati puru Saracini, ca, ccu la scusa di purtari la nova religioni ni lu munnu, occuparru la Sicilia accuminciannu di Mazara nill’annu 827.

Fuorru propria l’Arabi ca divìsiru la Sicilia nta tri parti ppi putilla guvirnari miegghiu e precisamenti Vallo di Mazara (a ovest) , Vallo di Dèmona (a Nord - Est)  e Vallo di Noto                (a Sud – Est), considerannu ppi confini la vallata di lu sciumi Salsu, accussì comu avìa successu quannu la Sicilia fu spartuta tra Siculi e Sicani.

Palermu, ca era vicinu all’Africa, fu fatta capitali ccu splendidi monumenti e cintinara di moschee e tanti maistri ca nsignàvanu la scola a li picciriddi.

Quannu si parla di la dominazioni araba, pinsamu ca nun fuorru sempri tiempi tinti, anzi iddi migliorarru li modi ppi travagghiari la terra in Sicilia e n’ansignarru comu si putia usari l’acqua a tutti banni senza sfardalla ammàtula. Pinsamu ca, ancora a li tiempi nuosci, ci sunu paroli ni lu dialettu sicilianu ca ricòrdanu la lingua araba.

L’Arabi si cumpurtarru tinti tra iddi cumannanti e si sciarriàvinu spissu, finu a quannu lu signuri di Sarausa, Ibn at Tumnah, addumannau aiutu a li Normanni, sistimati di picca tiempu finu a la Calabria, ppi ghiri contra a Ibn-Havas, cumannanti di Girgenti.

Fu chistu l’inìziu di la conquista normanna.

Nna l’Italia meridionali c’era Robertu lu Guiscardu, figghiu di Tancredi d’Altavilla (Francia), e in Sicilia vinni n’àutru frati d’iddu ca si chiamava Ruggeru, e lu Papa Urbanu II ci detti u tìtulu di Gran Conti di Sicilia (1089) (e capitali di la Contea fu Troìna) e ni lu 1098 u fici patruni di la Chiesa siciliana, pirchi putìa nominari li visca, secunnu la “ apostolica legatio”. Sta concessioni e stu privilegiu eranu validi ppi iddu e tutti li so discindenti.

Li Normanni avièvinu avutu u mèritu di ittari fora di la Sicilia i Musulmani, chiamati anchi Saracini (comu discindenti di Sara mugghieri di Abramu di la Bibbia).

Tuttu chistu fici tantu piaciri a lu Papa.

A la morti di Robertu (1085), lu regnu di l’Italia meridionali passau a un figghiu di nomu Ruggeru, ca si sciarriava ccu lu frati Beomondo, e ppi stu motivu lu Gran Conti misi mpaci li niputi, ma ricivìu ppi ricompenza menza Calabria e tutti li diritti supra la Sicilia.

A la so morti u Conti Ruggeru (Mileto 1101) lassàu, a l’età di sei anni, Ruggeru II c’avia avutu di la terza mugghieri di nnomu Adelasia, chiamata puru Adelaide.

Ruggeru II versu l’annu 1112, quannu avìa 16 anni, pigghiau u tìtulu di Cavalieri e Conti di Sicilia e appi u putiri in manu.

La so politica fu mpostata in modu c’accuntintava tutti li razzi ca c’eranu in Sicilia, ca eranu di cultura araba, latina e bizantina. Palermu addivintau na città ricca.

Ruggeru II, ni lu 1127, a la morti di so cuscinu Guglielmu II, niputi di Robertu, siennu senza eredi, addivintau patruni di Puglia e Calabria e ccu l’appoggiu di la Chiesa arricivìu la corona di Re nill’annu 1130 nni la Cattedrali di Palermu, unni è scrittu ancora “ Prima Sedes, Corona Regis et Regni Caput”.

Di stu mumentu in poi lu Regnum Siciliae accuminciau la so storia ca durau quasi ottu seculi (1130 – 1860), chiamatu Regnu di li dui Sicili (citra pharum e ultra pharum o utriusque Siciliae).

Quannu murìu Ruggeru II (1154) ci succidìu nni lu tronu sa figghiu Guglielmu I, chiamatu “u Malu”, chiddu ca nni lu 1155 ppi liggi misi l’aquila comu stemma di la città di Palermu, e duoppu la so morti (1166) ancora u figghiu di chistu Guglielmu II, ca i Siciliani, duoppu tantu tiempu, chiamarru “u Buonu”, pirchì sappi guvirnari ccu giustizia e alluntanau di lu governu tutti li disonesti e tutti chiddi tinti e fici fabbricari na bedda chiesa fora Palermu supra na muntagna chiamata Mons Regalis (oggi Monreale).

Iddu all’età di 39 anni, prima di muriri (1189 ), nun’aviennu figghi, fici nominari eredi a lu so tronu sa zia Custanza, figghia di so nonnu Ruggeru II.

A stu puntu li cosi si fìciru ‘mbrugghiati, pirchì Custanza, ca nni lu 1186 s’avìa maritatu ccu Enricu VI di Germania, era favuruta di lu viscu di Palermu e ammeci a re di Sicilia fu nominatu Tancredi, figghiu d’un fratastru di Custanza, n’àutru Ruggeru duca di Puglia, finu a la sa morti (1194 ), ma lassava a lu so puostu lu figghiu Guglielmu III, ca era ancora carusieddu.

Nni lu mentri Enricu VI, tintu di carattiri, fici guerra o so niputi Tancredi e duoppu chistu a lu niputieddu e si fici cunsignari la corona di lu Regnu lu juornu di Natali 1194.

Mentri ca sa mugghieri Custanza parturìa u fìgghiu Federicu, iddu fici ncatinari lu Re picciriddu e tutti l’autri fratuzzi fìgghi di Tancredi e li strascinau in Germania, a l’ammucciùni di sa mugghieri Custanza.

Dduoppu la morti di Ruggeru II (1154), la stirpi normanna avìa duratu appena appena quarant’anni, ppi passari a la stirpi sveva ccu Enricu VI (1195 ), ca murìu nni lu 1198.

Federicu II, c’avìa quattr’anni, a la morti di so patri Enricu fu nominatu re e imperaturi.

Custanza, sistimati li cosi in Germania, affidau so fìgghiu picciriddu a lu papa Nnuccènziu III, ca lu guidau finu all’età di 14 anni, e accussì nnì lu 1208 Federicu II - c’avìa ppi secunnu nomu Ruggeru ppi quarcunu, mentri secunnu autri Custantinu (ppi la matri Custanza ), Federicu ( ppi so nonnu  “Barbarossa” ), Guglielmu (ppi lu frati di sa matri Guglielmu I d’Altavilla ) - appi in manu tuttu lu putiri di Re.

Sa matri Custanza murìu nni lu 1198 comu lu maritu, ma prima avìa pinsatu, ansiemi a lu Papa Nnuccènziu III, di priparàricci la mugghieri ca si chiamava anchi idda Custanza, suoru di lu re d’Aragona, c’avia 10 anni cchiù di Federicu.

Stu matrimòniu fu fattu nni lu 1209, ma nni lu 1222 Custanza, mugghieri di Federicu, murìu a Catania e di tannu ‘npoi Federicu s’alluntanau di Palermu e, anchi si era la capitali di lu Regnu, cci turnava ogni tantu, stannu assai nni la Puglia, versu Foggia, vistu ca la so politica pinnìa cchiù versu la Germania ca versu la Sicilia.

Federicu fu n’omu istruìtu, guvirnau ccu tanta saggizza e di picciriddu fu chiamatu “stupor mundi”, canuscìa tanti linguaggi, oltri ca lu tedescu e lu “sicilianu”, sapìa parlari francisi, grecu e arabu.

Scrissi un libru ca parlava di la caccia cco falcuni ca s’antitulava “De arte venandi cum avibus” e, nni lu 1231, fici pubblicari na raccolta di liggi ca s’antitulava “Liber Augustalis” (Le Costituzioni di Melfi).

Federicu s’anteressava picca di religioni e fu anchi scomunicatu di li Papa Gregoriu IX e   Nuccenziu IV e ppi qualcunu fu consideratu anchi sanguinàriu.

Iddu cci misi tantu ‘mpegnu a fari canùsciri la lingua di la so Corti, ca fici nàsciri la “ Scola Siciliana”; nni l’affacciata di lu Palazzu riali a Palermu, ppi ricurdari li setti sèculi di la morti di Federicu II, li pueti di l’annu 1950 sistimarru na làpidi dedicata a li pueti di lu 1250, unni si rapprisenta l’Imperaturi circondatu di pueti e pirsuni allittrati, n’àutra pirsuna ca teni un falcu e di sutta c’è un cani ccu lu significatu ca Federicu II era n’àbili cacciaturi, a la so dritta c’è la prisenza di na dama c’avissi a èssiri la mugghieri Custanza d’Aragona e vicinu a idda dui pirsuni di la Corti.

L’annu 1250 Federicu II murìu e lu fìgghiu Corrado pigghiau lu so puostu di ‘mperaturi, mentri lu sa fratastru Manfredi, ca s’avìa misu a la guida di lu Regnum Siciliae, fici maritari na fìgghia sua, ca si chiamava puru Custanza, a lu re Pietru d’Aragona.

L’imperaturi Corradu murìu nni lu 1254 e ccu la mugghieri, fìgghia di lu Duca di Baviera, avìa avutu un figghiu, Corradinu.

Manfredi, apprufittannu ca lu niputi Corradinu era carusu, ccu l’ingannu si fici ‘ncoronari Re nni lu 1258.

Nni lu stessu tiempu lu Papa avìa datu la corona di Sicilia a Carlu d’Angiò, e ppi stu mutivu cci fuorru tanti battagli, fin’à quannu Corradinu fu ammazzatu nni lu 1268. L’imperaturi era ancora carusu quannu murìu e accussì finìu la discinnenza di la Casa Sveva.

L’Angioini, ca ‘n Sicilia eranu chiamati “li francisi”, nun fuorru suppurtati di li Siciliani, pirchì eranu maleducati e priputenti e lu jornu di Pasqua di lu 1282 scoppiarru li Vespri siciliani.

Lu fattu si sappi ‘nta picca tiempu nni tutta la Sicilia e cci fu na gran carnificina di francisi ccu l’aiutu di Pietru d’Aragona, nominatu Re di Sicilia a settembri di lu 1282 .

A la morti di Pietru (1285), sa fìgghiu Alfonsu addivintau re d’Aragona, mentri lu secunnu fìgghiu, Giàcumu, fu re di Sicilia finu a quannu so frati Alfonsu murìu (1291); tannu iddu lassau la dèlega ppi governari la Sicilia a lu terzu frati Federicu ppi pigghiàrisi la corona d’Aragona.

Ma li Siciliani, ppi scansiari di mèttiri ansiemi la corona d’Aragona e chidda di la Sicilia, nni lu 1296 ‘ncoronarru Federicu III Re di Sicilia.

Li sciarri ccu li francisi angioini di Napuli eranu sempri vivi e sulu nni lu 1302 si firmau la paci a Caltabellotta: ccu stu pattu s’arricanuscìa a Federicu III d’Aragona lu Regnu di la Sicilia, mentri la parti continentali “ultra pharum” di l’anticu Regnum Siciliae era sutta l’Angioini di Napuli.

Federicu III fici funzionari lu Parlamentu sicilianu e lu divisi nta tri sezioni: ecclesiastica, militari e demaniali; fu propria chidda demaniali ca detti tantu putiri a li baruna e, mentri ca nta l’Italia settentrionali finìa lu perìodu ca si chiamava di lu feudalesimu, in Sicilia ammèci accuminciava na vita longa di brutta suttamissiòni.

Mi pari giustu arricurdari ca fu Federicu III a stabiliri ca l’aquila avìa a èssiri nta tanti bannèri di li Comuna siciliani, Comuna ca a lu tiempu di l’imperaturi Federicu II, ca era lu bisnonnu, si chiamavinu  “Universitas”.

A la morti di Federicu III (1337) li tiempi fuorru tristi e addivintau re so fìgghiu Pietru IV                ( 1337 – 1342), e poi lu fìgghiu di chistu, Luduvicu, c’avìa appena 5 anni di età; anchi chistu murìu carusu nni lu 1355 a 17 anni e lassau lu Regnu a so frati di 13 anni Federicu IV ‘ntisu U Semplici.

Data la so età, Federicu IV fu aiutatu nni lu governu di so suoru Eufemia ccu lu titulu di Vicària. Nta stu perìodu arriturnarru li sciarri ccu l’Angioini di Napuli e quannu Federicu IV murìu  ( 1377 ), aviennu na sula fìgghia, lassàu lu tronu a idda, Maria, ca si maritàu ccu Martinu “lu Giùvini” d’Aragona nni lu 1390 (ma morta nni lu 1402) e quannu chistu murìu, ancora picciuottu, nni lu 1409, lu putiri passàu a so patri Martinu “lu Viecchiu” ca era Re d’Aragona.

Di stu mumentu in poi la Sicilia persi autonomia e libertà e passau sutta li Spagnola.

Accussì accuminciau u periodu di li Vicirè e nni lu 1415 lu nuovu Re Firdinannu di Castiglia, re d’Aragona e di Sicilia, ‘ntisu  “ u Giustu” , nnominau Juan de Panefiel comu primu Vicirè.            

Tra tutti li Re di Spagna si ricòrdanu di cchiù Alfonso V (1416 – 1458 ) chiamatu “lu  Magnànimu” e ccu chistu re arriturnarru ansiemi lu Regnu di Napuli ccu chiddu di Sicilia, comu na vota.

Re Alfonso fici nàsciri a Catania, nni lu 1434, la prima Università di la Sicilia, chiamata “Siculorum Gymnasium” ( mentri a Missina ppi vuluntà di lu Papa Paolo III, nni lu 1548, nascìu la “Studiorum Universitas” e a Palermu la Reali Accademia di li Studi - fatta nni lu 1778 a lu puostu di lu Colleggiu Massimu di li Gesuiti (1552), chiusu da dieci anni - fu trasfurmata nni lu 1806 in “Regia Studiorum Universitas” ppi vuluntà di lu Re Firdinannu III di Burbuni ).

N’àutru Re mpurtanti fu Firdinannu “u Cattolicu”, chiamatu accussì pirchì nni lu 1492 avìa liberatu, duoppu ottu seculi, lu territoriu di Granada di li Saracini e avìa alluntanatu di lu so Regnu tutti l’Ebrei ca nun si vosinu battiari comu li Cristiani.

Stu Re purtau in Sicilia lu Tribunali di l’Inquisizioni nni lu 1487 ca durerà finu all’annu 1782 a li tiempi di lu Vicerè Domenicu Caràcciolo. Nta sti tri seculi fuorru abbruciati vivi 188 pirsuni cunsiderati “eretici” ppi la Chiesa, propria in Sicilia ca era dda terra c’avìa statu capaci di fari campari tutti ansiemi populi di tanti religioni, linguaggi e usanzi.

Firdinannu u Cattolicu muriu nni lu 1516 e avia ‘na fìgghia sula, Giovanna, ca s’avia maritatu nni lu 1496 ccu Filippu u Beddu, fìgghiu di l’imperaturi Massimilianu d’Austria.

Giovanna, quannu cci murìu so maritu (1506), cadìu malata e ppi tutta la so vita fu considerata foddi finu a la so morti (1555).

Accussì a la morti di Firdinannu u Cattolicu (1516) e a la morti di Massimilianu d’Austria (1519) lu putiri di li dui coroni passau a lu niputi Carlu V (1500-1558).

Chistu imperaturi picciuottu fu un tipu tantu combattivu, ca oltri a essiri re di Spagna, di Sicilia, Sardegna, Napuli, di li domini italiani e americani, di la Germania meridionali, di li Paesi Bassi, fu anchi imperaturi d’Austria, tantu ca s’avantava ca nni li so terri lu suli nun si nni iva mai.

Carlu V purtau in Sicilia l’aquila a dui testi ca pruvinìa di l’Austria e siccomu avìa bisuognu di sordi a causa di li guerri contra li Turchi, vinnìa tanti diritti a tutti ddi Signori nobili ca eranu disposti a paiari.

Un grandi mièritu di Carlu V fu chiddu ca bloccau l’espansioni saracina in Sicilia e nna tanti parti di lu Mediterraneu e appi tanti scuontri ccu Mohammed Dragut, chiamatu di lu puopulu Mammu Drau, ammintuviatu ppi tanti sèculi comu unu ca facìa scantari i piccirìddi quannu facièvinu i capriccia.

Carlu, ppi nun si fari pigghiari a la ‘mpinsata di li Saracini, fici sistimari e costruiri cintinara di torri nuovi ‘ntuornu a la Sicilia, ca eranu puosti d’unni si putìa taliari di luntanu si arrivàvanu nemici di lu mari.

Nni lu 1556 s’arritirau di la politica e murìu nni lu 1558. Duoppu d’iddu rignarru li sa eredi Filippu II (1556-1598), Filippu III (1598 – 1621) e Filippu IV (1621 – 1665) c’addifinnierru la Sicilia di li pirati turchi.

Bisogna diri ca nna tuttu lu perìodu spagnuolu la genti stava assai mali e si verificarru diversi protesti pupulari, comu per esempiu chidda di Giovanni Pollastra, ‘ntisu Surciddu (1511), chidda di Gianluca Squarcialupo (1517) e chidda di Giuseppi d’Alessi o d’Alesi (1647).

Lu Vicirè, quannu murìa duranti la so carica o quannu era assenti ppi qualchi àutra scusa, vinìa sostituìtu d’un Prisidenti di lu Regnu, ca putìa essiri o l’Arciviscu di Palermu o lu Luogutenenti Generali di l’Armi in serviziu in Sicilia.

Li Vicerè in Sicilia fuorru na sittantina, finu a quannu, ccu l’accuordu di Utrecht (1713), lu cumannu passau prima a li Savoia (1713 – 1720), puoi a l’Austriaci (1720 – 1734) e alla fini a li Burbuna (1734 – 1860).

Sutta li Burbuna lu Vicirè appi la funzioni d’un Ministru e nni lu 1816 sta figura governativa scumparìu, pirchì fu criatu lu Regnu di li Dui Sicili e vinìa ‘ncarricatu un Luogutenenti Generali ca di solitu era un Principi di la Casa Reali o qualchi àutru personaggiu mpurtanti.

Lu Re ca fici sti cambiamenta (c’addivintau Re nni lu 1759 a ottu anni) si chiamava Firdinannu IV comu Re di Napuli, Firdinannu III comu Re di Sicilia e quannu fici lu Regnu di li Dui Sicili pigghiau lu nnomu di Firdinannu I.

Tanti voti li Siciliani am’accusatu li Re Burbuna  -Firdinannu I ( 1759 – 1825), Franciscu I (1825 – 1830), Firdinannu II (1830 – 1859), Franciscu II (1859 – 1860) - c’arruvinarru la Sicilia, ma veramenti iddi nun avièvinu tutti li curpi, pirchì ereditarru nni lu 1734 na Sicilia mali riddutta e sicuramenti putièvinu fari qualchi cosa di miegghiu, finu all’annu 1860 quannu Garibaldi ccu li so picciotti livau li Burbuna e cci rapìu la strada a li Savoia di Vittoriu Emanueli II: di ddu mumentu la Sicilia fici parti di l’Italia unita (1861).

La Sicilia, ca lu 12 Innaru 1848 avìa statu la prima a fari pàrtiri la grandi rivoluzioni europea di lu 1848, s’aspittava tanti cosi buoni di l’Italia e ammeci appi grandi rispiaciri: la partenza di tutti li picciuotti ppi lu serviziu militari, obbligatoriu e ca durava quasi sett’anni; li condizioni pòviri di la genti nun fuorru cangiati e nni lu 1866 tutti li terri di Chiesi e Cummenta, ca dàvanu tantu travagghiu a la pòvira genti, fuorru vinnuti a li ricchi e lu Statu cci guadagnàu qualchi cosa comu 600 miliuna di liri, ca tannu avièvinu grandi valuri e ppi giunta nun fuorru spisi mancu in Sicilia ppi migliorari li condizioni di l’abitanti.

Allura pigghiau putiri chidda ca ancora oggi si chiama Mafia, ca ‘mprincipiu avìà nasciutu pp’addifènniri li puvirieddi e a picca a picca addivintau n’associazioni di criminala ccu li fiocchi.

L’annu 1892 vitti in Sicilia la nàscita di li “Fasci di li lavoratura” ca reclamàvanu li terri ppi li contadina, ma tuttu fu inùtili.

Tinti e pietusi eranu li condizioni di li minatura nni li surfari, paragunati a la porta di lu ’nfiernu, e l’uomini trattati comu armali di strapazzu.

Sulu duoppu la secunna guerra mondiali la Sicilia, ca mai s’avìa scurdatu lu significatu di la parola  “autonomia”, riniscìu a capitari, nni l’urtimi jorna di la Monarchia ccu lu Re Umbertu II, na liggi particulari ca la facìa la prima regioni italiana a Statutu speciali.

Duoppu appena dui simani, l’Italia passava di la Monarchia a la Repubblica (1946).

Ora anu passatu quasi sissant’anni e la genti continua a gghiri luntanu di la propria terra ppi circari travàgghiu, àutru ca Statutu speciali.

Ccu tanta bedda Storia ca la Sicilia po’ cuntari, l’usanzi e l’abitùdini di l’àutri s’av’amparàri.

 

Arringràziu ccu tuttu lu cori li prifissùra Luigi Falletta e Salvatore Falsone ppi l’aiutu ca m’annu datu ccu lu computer.

 

BIBLIOGRAFIA

 

T. Fazello – Storia di Sicilia (De rebus siculis)                              Regione Siciliana – Palermo, 1990

S. Policastro – La Sicilia                                                                            Tip. Idonea – Catania, 1961

P. Sanfilippo – Storia di Sicilia – ristampa                          GEB – San Giovanni La Punta (ed. 1859)

J. Hurè – Storia della Sicilia                                                                        ED.RI.SI. – Palermo, 1982

G. Scarcella – La Sicilia                                                                                    Mursia – Milano, 1985

S. Correnti – Breve Storia della Sicilia                                              Newton Compton – Roma, 1997

M. Amari – I Musulmani in Sicilia                                                                 Antares – Palermo, 1996

R. Papa Algozino – La Sicilia Araba                                            GEB- San Giovanni La Punta, 1996

AA.VV. – Sikanie                                                                                           Garzanti – Milano, 1985

L. Giuliano – Storia di Siracusa antica                                        GEB – San Giovanni La Punta, 1996

L. D’Asaro – Elimi (I Miti e la Storia)                                     Archeoclub Corleone - Corleone, 1995

C.Ciccia – Il Mito di Ibla                                                                             Pellegrini – Cosenza, 1998

F. Carlotta – Breve storia della Sicilia antica                                              Flaccovio – Palermo, 1998

AA.VV. – La Necropoli di Agrigento                                                                L’Erma – Roma, 1988

AA.VV. – Omaggio a Gela                                                                              Portoria – Milano, 1997

R. Panvini – Gela ()                                                                                      SEI – Torino, 1996

AA.VV. – Da Gela ad Akragas                                          Lions Agrigento e Gela – Agrigento, 1998

G. Cannarozzi – Gela e Finziata (Dissertazione) (rist.1870)                        La Vedetta – Licata, 1998

 L. Vitali – Licata Città Demaniale (rist. 1909)                                            La Vedetta – Licata, 1998

C. Carità – Alicata Dilecta                                                                             La Vedetta – Licata 1988

S. Moscati – La bottega del mercante (Fenici)                                                        SEI – Torino, 1996

S. Spoto – Sicilia antica                                                                      Newton Compton – Roma, 2002

W. Agnesi – Breve storia dei Normanni in Sicilia                                      Flaccovio – Palermo, 1995

G. Tessitore – Ruggero II                                                                            Flaccovio – Palermo, 1995

U. Falcando – Il Libro del Regno di Sicilia                                                Pellegrini – Cosenza, 1994

Idrisi – Il Libro di Ruggero                                                                         Flaccovio – Palermo, 1994

R. Giuffrida – Il Palazzo dei Normanni di Palermo                      Accademia S.L.A. – Palermo, 1985

AA.VV. - L’età Normanna e Sveva in Sicilia                                                  A.R.S. – Palermo, 1994

Federico II di Hohenstaufen – Liber Augustalis (rist. ed 1773 – P.Piccolo)                                  Lions Club Napoli Svevo –                                                                                 Napoli, 2001

F. Galasso – Medioevo del Diritto                                                                    Giuffrè – Milano, 1954

AA.VV. – Storia dei Comuni del Mezzogiorno                                         Lions 108Y – Napoli, 1990

G. De Vita – I Graffiti Geografici del Carcere dell’Inquisizione in Palermo (rist. ed. 1910 – R. Giuffrida)                                                                                                 Accademia S.L.A. – Palermo

C. Carità – Castelli e Torri della Provincia di Agrigento                             Banca Popolare S. Angelo                                                                                                     –Palermo, 1982

F. Maurici – Castelli Medievali in Sicilia                                                       Sellerio – Palermo, 1992

A. Drago Beltrandi – Castelli di Sicilia                                       GEB – San Giovanni La Punta, 2000

Mozzarella-Zanca – Castelli di Sicilia                                                            Sellerio – Palermo, 1985

N. Muccioli – Breve storia di Palermo                                               Newton Compton – Roma, 1995

S. De Majo – Ferdinando IV di Borbone                                           Newton Compton – Roma, 1996

Savarino-Milceri – Rosolini 1712-1812                                    Archeoclub Rosolini – Rosolini, 1995

V. Fardella di Torrearsa – Ricordi su la Rivoluzione Siciliana 1848-1849   Sellerio – Palermo, 1988

S. Bertoldi – Savoia Album dei Re d’Italia                                                      Rizzoli – Milano, 1996

G. Oliva – I Savoia                                                                                       Mondatori – Milano, 1998

G. Giarrizzo – Siciliae Studium Generale                                                     Maimone – Catania, 1991

G. Silvestri – Cenni storici Università di Messina

L. Sampolo – Real Accademia degli Studi di Palermo (1888)                   ED.RI.SI. – Palermo, 1976

V. Prestigiacomo – La Sicilia (l’aquila) del 07/01/2000                                                  Catania, 2000

G. Fumia – La Sicilia (l’Inquisizione) del 23/04/2000                                                    Catania, 2000