A Sicilia hè tocca assai da a recessione ecunomica è da mille dificultà in campu suciale è puliticu. Da l’anni 2012 sò state chjappe misure di lotta contru à i varii impedimenti e prublemi. U guvernu Rosario Crocetta si hè fattu una nomina per via di a so lotta contru à a maffia.

Sò più di 12% a ghjente senza travagliu nantu à 5 miglioni d’abitanti. L’usine è i centri cumerciali chjodenu.

L’agricultura si mantene per via di l’aiuti eurupei: allevu di vaccine è pecurinu, pesca (hè sempre Mazara dell Vallo u primu portu di pesca d’Italia). E vigne di Trapani è Marsal sò e più famose. A speranza hè tamanta in u sviluppu di l’agricultura biulogica.

A crisa –hè capita- tocca assai u turisimu. In u 2013 i rivenuti d’issu settore tuccavanu i 25%, ma sò calati assai. U turisimu culturale hè toccu dinù ellu.

A quistione migratoria clandestina, oramai ampia è cuntinua, hè un veru castigu ch’ellu ci vole à trattà à livellu internaziunale. Hè una sfida impurtante chì u territoriu sicilianu hè un crucivia migratoriu. L’arrivu di rifugiati di guerra chì cercanu asiliu puliticu hà rimpiazzatu l’immigrazione ecunomica, Hè una fola cuntinua di disgraziati à sbarcà in Lampedusa.

È puru a Sicilia pussede un capitale culturale, patrimuniale, suciale è fisicu chì li pò permette di ripiglià si è di fà si la valè. Avemu da fà una fidighjata in u campu di a storia è a lascita patrimuniale chì hà da pudè esse afruttata è u sviluppu mantenutu è rinfurzatu.