Federicu II è i so pueti

Un capimachja medievale, rè germanicu è imperatore: ind’è un omu simule, omu si aspetta à truvà ci  qualità marziale è auturitarie. À a puesia, ci si pensa pocu è micca.

Federicu II hè più cunnisciutu pè u so trattatu di urnitulugia «De arte venandi cum avibus » vene à dì “Modu di caccighjà cun l’acelli.

À a corte di issu munarca insignamentu, arte è scenze avianu un postu impurtantissimu.

À l’università di Napuli ci si accolsenu sapienti di nomina di ogni cunfessione: arabi, ghjudei è cristiani. I so studii tradutti in latinu anu permessu di fà cunnosce in Occidente u pensà è l’arte di u Levante.

A cultura di a Rinnascita à u XV seculu si marca cù e scole di traduzzione castigliane in Tuleda, a corte di Federicu II in Palermu è po u gruppu di i so sapienti ch’ellu adunisce in Napuli.

A puesia hà a so spannata in a corte chì accoglie l’inseme di i pueti di u regnu di Staufen di l’Italia suttana. Una puesia siciliana autonuma nasce tandu, appughjata nantu à l’influenza di u Minnesang alemanu è di a puesia lirica di i truvatori pruvenzali, in i primi decennii di u XIII seculu.

Ùn si accuntentavanu di cupià i mudelli francesi o alemani, si attalentavanu à usà u Volgare, a lingua isciuta da u sicilianu anticu. Diventò cusì pè a prima volta una lingua pulita, di a corte. À pocu à pocu si fece cusì una puesia lirica in dialettu sicilianu apulianu. Era in un certu modu a prima lingua tuscana è taliana.

Dante Alighieri dete à issi pueti custì u so nome : « Scuola poetica siciliana » è insignò quant’ellu avia meritu Federicu II  è u figliolu Manfred.

Issu chjerchju di i pueti di Federicu ùn hè venutu chè tardi di pettu à a puesia lirica di a corte chì digià avia pigliatu a falata in tuttu u regnu. Di fatti u più di a puesia alemana mittelhochdeutsch, cù i studii di Hartmann von Aue, Wolfram von Eschenbach o di un pueta Minnesänger cum’è Walther von der Vogelweide si hè fattu nantu à u periodu 1170 à 1220. tandu Federicu II chì era rè da u 1212 fù incurunatu imperatore in Roma è messe à furtificà u so pudere in tuttu u regnu.

Di issi pueti ùn si sà tante cose. Più di a metà di i so 320 puemi ùn portanu nome di autore.

Federicu II ùn hè statu propiu pueta ellu stessu malgradu certe croniche, ma t’hà avutu gran meritu di avè datu postu à a puesia in a so corte è di avè ci cultivatu a lingua siciliana dendu li rangu di nubiltà.