U mitu ammenta à Demeter, u pudere ch’ella ti avia in Sicilia è a so figliola Korè rapita è purtata in u mondu sottuterra.

Affascinatu da a bellezza di issa giovana, u patrone di l’Inferni, Adès, sorte di una crepa, si piglia a figliola di Demeter è a si porta via in u so regnu.

Custì, assaghja a melingrana è si innamora di Adès. Da tandu eccu la regina di u mondu sottuterra cù u nome di Persefona.

Demeter è u populu sanu, da Enna in Sicilia sinu à Eleusis in Grecia, si addisperanu, pianghjenu a morte di a giuvanotta è ùn stanu tantu à vede si sparghje a sicchia è a scarsia.

Mancu Ghjove ùn a ci face à cunvince à Ades di cappià a zitella. Ottene solu ch’ella possa vultà in casa ind’è a mamma, A Terra, à l’epica chì tuttu fiurisce è matura, è ch’ella ùn avessi u dirittu di falà si ne dinù ind’è u maritu, chè ghjuntu l’invernu. Vultata Persefona, a Terra ritrova spannamentu è fertilità. A mamma in dolu vole dì sicchia è famina.

Hè cusì ch’elli sò ligati in a mitulugia greca u ciculu di e stagione è di a vegetazione cù a sorte di l’omu. “Demeter hè a Terra è a sumente, ma a figliola, in corpu à a Terra, chì vene fora di veranu è volta à interrà si torna ind’è Ades, in u prufondu piattu, quessa hè a crescita, a speranza è po dinù a morte. Dunque incarna dinù a speranza di l’omu di rinasce è di campà in eternu (Eckart Peterich, Sizilien)