Scioglieria
Scioglieria
d’amore
e sfiere
d’un turmentu :
u giru d’un mumentu
à l’ombra
di l’amanti...
Mi trica
Mi trica
È mi trica
la filetta
in lu to ochju
calmu.
Sottu à una sfiera
andata
femu ci
una vita
aghju bisognu eo
di u tempu
salvaticu
chì ti sbuccia
à le mani
mi trica
dumatina
u silenziu in dinochje
è l’albe
trà l’ombra è l’ombra micca
u riposu
levatu à lu so pettu
da ripiglià
di tondu à noi
a misura
ritimata
di u tremindue...
MORETTI Sonia
Sonia Moretti est professeur certifiée de langue et culture corses et enseigne à Bastia. Originaire de Lentu, elle est née à Ajaccio en 1976.
Très tôt, elle affirme des dispositions pour la langue corse (Prix Andria Fazi en 1994) qu’elle utilise pour ses poèmes. Elle étonnera le professeur Jacques Thiers lorsqu’elle participera lors de ses premières années d’études aux ateliers d’écriture du Centre culturel universitaire.
Tandu l’omi
Tandu l’omi s’arrughjavanu.
À passi abbiadati maghjincavanu e cunfine.
À mani baldanzose impitravanu sonnii.
È l’ochji ammannillati adurnavanu l’aghje.
San Martinu !
Tandu frumbavanu e voce.
Strapazzi di u ventu, acri suspiri
lamenti !
Nanna di u zitellu, chjuchjulimi d’acelli
paghjelle !
Celu alliculatu pè cori appicciulati
è dalli à i serinati !
Sacri versi.
Gloria à u Supranu !
Degne sequie à l’appaghjatu umanu.
CANTU !
Cantu colmu, appatriatu,
scama ardente è di l’orbe u fiatu.
MASSIANI Santu
Surella
Cum’è tè sò di quelle
Chì ne vanu à l’attrachju
Ad abraccià le stelle
Puru à celu spachju ;
À l’ora chì mi smachju
Per piglià le chjappelle
Di primure ribelle
È stampà l’armunia
In l’anima una cria
Di silenzi sulleni,
Cù a notte annannata
Da li venti sereni
Surella mea amata.
Mira
Mira, Veranu spampaneghja
Sottu à li celi matuttini;
Senti sbuccià le so canzone
In la notte chì viculeghja...
È lu to marosulu in core
Cù lu so stranu rutulime
Sfiora la sponda per cuntà
Quella fola ch’ùn vole more...
Intricciati sò li camini
Ma voltanu tutti à l’agnone
Chì a to machja ti trascini...
È tramezu à lu petrichime
Cù lu to ritornu à spuntà,
E viole seranu prime !
GATTACECA Patrizia
Di L’Acquatella, dopu i studii in Bastia è in Ecchisi hà ottenutu a maestria di lingua è literatura taliana. Direttrice di Centru Suciale è animatrice in parechje discipline di cumunicazione, hà passatu u CAPES di corsu ed hè oghje prufessora di Lingua è Cultura Corsa.
Patrizia hè stata trà e prime alleve di i corsi di lingua corsa di l’anni 1975. Subitu subitu si hè fatta rimarcà da e so qualità di equilibriu, d’armunia trà a cultura corsa di a tradizione è una ricerca cuntinua di mudernità creativa.
À a sbunurata
A valle s’hè croscia
Di bazza calata
A notte s’hà lasciatu
Quì è culà duie ombre
Sott’à i castagni insunnuliti
A machja ùn parla ancu
È u celu s’hè grisgiu
A mio stradella ciotta è passa
Longu à fiume diciulone
È leva ogni vistica
È muschi zitellini
Una tintenna persa
Trinneca qualchì tirlu
Sottu à a filetta azeza
È v’anscia in faccia una aria
Chì parturisce fole :
Stamane mi ne vò
Ad aspettà u sole...
Paghjella
Paghjella chì ne veni
da l’Oriente eternu
nata quale hè chì sà
da chì lettu maternu
arrembatu à chì voce
o nantu à chì quaternu
da fà lu cantu altieru
è liatu è fraternu
Paghjella chì viaghji
è ne franchi frontiere
di lochi assulanati
è di terre primiere
di paesi landani
è di centu manere
di piaghje à vista d’ochju
è di muntagne fiere