Presentazione

QUAL’È NO SIMU...

L’Associu di Sustegnu di u Centru Culturale Universitariu, l’emu creatu vinti anni fà. In u 1991 di fatti, si trattava di vulè dà forma è mezi à l’attività chì si chjamanu « azzione culturale universitaria » in i stabilimenti d’insignamentu superiore. Dopu, à pocu à pocu l’Università di Corsica Pasquale Paoli (UCPP) si hà fattu un serviziu culturale, cumpunente amministrativa di a divisione di a vita studiantina (DVE). Da tandu, u nostru associu hà turnatu à definisce i so scopi è mudificatu i so statuti. Cusì, da u 1998, mira ogettivi d’animazione è diffusione sputichi soi. È puru l’Associu di Sustegnu di u CCU hè arradicatu forte nantu à u campus curtinese è hè partenariu di l’Università in parechje attività culturale.

AZZIONE ARTISTICA, CULTURALE, EDITURIALE

L’Associu di Sustegnu di u CCU hà trovu dinù u so locu d’azzione abituale : l’inseme di i lochi culturali di Corsica. A so persunalità ind’è issa rete hè marcata cun duie primure :
• u sviluppu di l’attività literarie, dramatiche è culturale in lingua corsa,
• l’azzione di partenariatu culturale trà istituzione è associi culturali interuniversitarii, à livellu europeu è mediterraneu.
Da purtà à fine u so prugrama, l’Associu travaglia cù unepochi partenarii istituziunali è assuciativi è ALBIANA, « editore in u Mediterraneu”, pè un prugrama di coedizione.

MEZI

L’Associu ùn hà nè impiegati, nè lucali è materiali sputichi soi.
Parechje attività di spressione artistica, ch’ellu sia cantu, teatru, puesia o varie iniziative si facenu in un lucale universitariu di spressione artistica è culturale : u Spaziu Natale Luciani in Corti.
Sala : Gradini: 77,5 m2 Circulazione: 25 m2 Sedie : 109
Scena : 153 m2 (intavulata ballarina).

 

creatu u 11.03.2012