L'ùltima pagina
Quandu u pèndulu di sala chjuccò òndeci volte, èranu quasi duie ore chì Anton Pàulu era nantu à i cartulari di a Merrìa. Avìa studiatu l’allargamentu di a strada di A Funtanichja, a custruzzione di un’altra riserva d’acqua, è l’accunciamentu di a sala di i giòvani. À dilla franca avìa fattu avanzà e cose è ne era cuntentu. Di più, u puttachju chì currìa in paese l’avìa arricatu u morbu à u core è ste duie orette di travagliu l’avìanu cacciatu u maccaleffu.