Cando t'appo 'idu torrende
a sa natura tua umile
de terra 'olada
(nemmancu sa chijina t'est restada)
e pustis terra riende
sutta s'isciallu tou de umbra
- Tando - appo nadu - si torrat?
Est unu sonnu sa vida
chi sonniat sa morte?
Tue frimma in sa jaga 'e su sonnu:
- Vida est su primu 'isu
morte tornare a sonniare

E tue immanniende
e deo inoghe
a t'abbaidare
chi mancu l'isco
chie sese
e si as a esser crasa
tue e deo
in calchi imbrogliu
de cussos
chi cando t'abbàido
s'accèrat custa néula
de barcas
e barchittas de canna
chi in Cambogia
bentu e randine
e nie a pianu
subra sos pizzinnos
pro b'arrivire
a bucca piena
morte

No est s'amore
che unu puzone
chi cìulat e bicculittat
e paret carignu
finas chi su biccu
no toccat sas carres bias

Tantas bortas nos semus
perdidos
chena ischire comente
in logos anzenos
pro torrare in caminu
aiamus bettadu sinnos
ma su coro istraccu
non lu giompiat lughe

Pustis de tantu caminu
s'òmine 'e sa lughe
si che tirat s'umbra 'e su monte
e che la 'ettat in mare
amiga mia est s'ora
chi su dolore
girat comente un'istella
in sa notte 'e su coro

Custu 'entu pedrosu
sa 'oghe tua limpia
no la 'ettes a palas de su sole
pianghet sa nue
s'attilibriu
crucifissu
a sa ventana 'e s'aera
ala 'oza 'e mi perdere
in custa siccanza
comente si perdet piùere
in su sole
chirchende su chiu 'e s'oro

Ell'e tando comente
su samben chi brincat
dae pedra in pedra
no l'azzendet s'oro?
ogni cosa fiorit e s'òmine
inue ruet morit?
ell'e tando comente
custa vida custa morte
s'abbrazzan a s'iscuru
carignos de leppas lughentes?
in s'oru 'e su mare nara
s'anzone sididu
che l'istrejit s'abba?
ogni pedra 'ettada
pedit reposu a s'umbra?

In custa lughe
si ruet ala profunda
est sa frisca foza
de sos ojos tuos
in custu riu
si pigat umbra
de tristura
est s'abba
de sos ojos tuos
in cust'abba 'e lughe
s'abbérit una nue
de risu:
sos ojos tuos

Lu córi è un ratu
sèccu chi si tronca
un cric chi caggi
in un póggiu d'èba
L'ipigni lu gòng
di lu sangu
i' l'óru
di lu ripiru
Una luzi sigrèta
s'acciara
"Sei tu
anima méa?
In un'ascia di canna
s'imbischa la mimória e allébia
bòzi d'èba
la firidda?"
Edda più lébia
d'un suipìru:
"Althru sònu no intèndi
lu ratu chi pèrdhi li fógli
nè intèndi la rastha
di la mórthi chi abbrazza"
Un lume sicretu

Deo non isco proite sa lughe
torrat a nos chircare
cumponet sos colores
contat matas e arvures
bettat galu coronas in sas fozas