30 di Marzu di u 1884

À sette ore di mane passavamu davanti à a Dragonera. E muntagne di Puig de Torrelles è Puig Major eranu incurunate di nuli.

Chì vestitu bellu ch’elli anu à dossu issi monti, da cima sinu à i pedi chì ciottanu in u mare verde. È po isse cale trà i scogli, e forme nette, pure, varie quantu mai! U mare è a terra si ghjocanu à caccia è metti una dopu à l’altru, entrenu, sortenu è si lampanu una contru à l’altru cum’è dui zitelli chì si ghjocanu...

Mai aghju vistu una costa cusì bella in u mondu sanu.

Ogni monte quì hà i pedi in mare. Ognunu ti hà dui o trè puntali cum’è i maghji di un battellu è pendenu tutti ver’di nordu cum’è ghjimbati da u ventu di l’isula. È l’ombre chì si stinzanu parenu tante vele latine. Un pocu cum’è a squatra di vascelli ch’ellu purtava u Rè Jaume venendu à cunquistà l’isule.

Quì l’acelli di mare trovanu i lochi piatti da agruttà si è mette nidi.

Quì in tempi antichi a terra hà apertu e so bracce è po l’hà ristrinte per dà calate è agrotti pè i battelli.

Jacint Verdaguer