Versione :

Ducumentu
Intervista

ALANU DI MEGLIO

Isule Literarie
Nouvelles de Méditerranée
Des Iles littéraires
page 67

Alanu Di Meglio hè natu in Marseglia in u 1959 è ci si hè allevatu. Stà in Bunifaziu. Hè appassiunatu pè i so lochi, u dialettu bunifaziincu, e tradizione di u locu è a “Cultura di E Bocche” chì lega u lucale cù a Gallura vicina, l’isule è al di là, u Mediterraniu sanu. Li ne vene un estru pueticu ed umanistu assignalatu. Cù i so amichi di l’associu Dighi di scè, hà fattu un CD (Bunifazziu in cantu, 1999). Prufessore certificatu di lingua è cultura corsa è Prufessore d’università in Scenze di l’Educazione, hè dinù duttore in sociolinguistica è dirige travagli di ricerca in didattica di u corsu. Pueta, hà publicatu Migraturi, un libru di estru fine. Prusatore dinù, in particulare cù a racolta di nuvelle Macagni. Hè statu direttore di a rivista Bonanova è di a Biennale di prosa literaria di u CCU.

In u 1989 vincia u primu premiu di u Cuncorsu di Nuvelle Radiufoniche Misteri da impennà cù u so testu Dopu à a bucata. Oghje aghjuntu pè a cultura di a so cità è direttore di u Centru Culturale Universitariu in Corti è bench’ellu sia chjappu assai, ùn pianta di scrive è di fà à prò di a lingua è di a cultura.