Eccu l'infurmazione publicate nantu à a Biennale di l’Isule 2003. Era quessa l'ultima edizione d'issu cuncorsu di nuvelle literarie purtatu da u nostru associu durante una decina d'anni. Issa initiativa hà arricatu tanti risultati è certe di l'azzione di oghje venenu da e relazione è scontri rializati tandu.

     I risultati di 2003 sò questi quì :

Albert Herrantz

- A ghjuria di E Baleare presiduta da Albert Herrantz (Palma) hà attribuitu un premiu à Miquel Ferrà i Martorell

Enzo Zappulla

- A ghjuria di Sicilia presiduta da Enzo Zappulla (Catania) hà attribuitu dui premii ex aequo à : Corrado Di Pietro è Finetta Guerrera

- A ghjuria di Corsica presiduta da Alanu Di Meglio hà attribuitu un premiu à : Ghjuvan Luigi Moracchini.

Niccola Tanda

- A ghjuria di Sardegna presiduta da Nicola Tanda ùn devia stà tantu à cumunicà i so risultati.

    Benchè incumpletti sti risultati facenu vede chì e ghjurie anu cuncentratu a so primura nantu à a qualità di i testi premiati chì spiccanu da l’altri, elli stessi di qualità. Issa tendenza marca un prugressu di a spressione in prosa, cum’ellu a ci dice Alanu Di Meglio cumentendu i risultati di Corsica.
   Ùn avemu micca vulsutu aspettà chì tutti i scritti sianu armunizati è messi in forma infurmatica da publicà li. Ci paria di interessu ch’è vo cunnoschite issa pruduzzione, ancu presentata pers ta volta in modu rozu, cù errori di stampittera è d’urtugrafia chì ùn si ponu schisà quand’ellu si travaglia cù pochi mezi è pocu tempu. Manu à manu ch’è no averemu i testi cumpletti è puliti, veneranu à rimpiazzà questi quì. Intantu speremu ch’è vo piglierete listessu piacè ch'è noi à leghje sta manata di pruduzzione chì sbuccaranu à esse publicate allocc’à a fine di u 2003.

A ghjuria cumposta da :

Di Meglio (MCF IUFM, Prisidenti)
E. Bonerandi (Cunsigliera d’orientazioni à a ritirata)
M. Versini( Prufissora di corsu in Portivechju)
D. Verdoni (MCF Università)
Ghj. Thiers (Prufissori Università)
Ghj.M. Arrighi (Ispittori Accademia, IPR di Corsu)
Ghj.M. Comiti (MCF IUFM)

si hè adunita u 5 di frivaghju in Corti di modu à valutà è primià un insemi di 16 testi ricivuti in u quadru di stu cuncursu (chì si faci di modu simultaneu trà Corsica, Sardegna, Sicilia è Baleari).
Si era dumandatu à principiu di rifletta nantu à a primiazioni di cinqui testi sicondu l’usu spartu duranti di i cuncursi passati. Una volta l’assestu di i scritti fattu in l’ordini di a sinsibulità glubali di a ghjuria, uni pochi d’elementi di valutazioni sò sbuccati :

- a poca prisenza feminili (una nantu à sedici) ;
- a prisenza di una generazioni ghjovana chì porghji scritti di qualità ma chì si prisenta di modu putinziali cù carattari di scrittura literaria sia da rifinì sia da maturà ;
- Un’evuluzioni di u scrittu « etnograficu » chì s’arricchisci d’intaressu è di qualità ma chì ferma accantu à l’attesi di u premiu più indiatu versu una literatura affrancata da una pratica mimuratoghja, cugnitiva o muralista, ma chì porghji è ammaestra un ambiu literariu di finzioni (puri arrimbatu à a mimoria) ;
- un autori chì si stacca di modu nettu in quantu à un fasciu di qualità di a prosa pruposta è propiu in lea cù l’attesa di a ghjuria (stili, sughjettu, storia, capacità à custruì un universu literariu…).

    Dui elementi sò stati cusì cacciati è ritinuti : quidda di issa sbucciata nova di scritti di qualità ma in duvintà è l’affirmazioni (o a cunferma) di un autori.
Si hè apartu tandu u dibatttitu in giru à u sensu à dà à a noscia primiazioni di modu à metta in risaltu i dui elementi impurtanti ricacciati. A quistioni di fondu hà giratu intornu à u fattu di mischià cinqui premii dendu un sensu glubali d’incuragimentu o d’impuntà, à traversu à un premiu unicu, l’autori chì si stacca di modu à porghja à a vista di tutti « u premiu di a prosa corsa 2003 ».
Fù a siconda a suluzioni scelta dendu priurità à l’emergenza di un testu chì adunisci propiu i qualità ricircati. Ma à tempu si hè prupostu un insemi d’azzioni di modu à valurizà è à prumova a generazioni nova :

- publicazioni di tutti i testi inediti chì ani cuncorsu pà sta IVa biennali (Albiana/CCU). U rispunsevuli di a publicazioni pigliarà bocca cù ogni autori in modu à urganizà un’edizioni degna di a qualità di i testi ricevuti. Ogni autori ricevarà 10 esemplari di u libru.
- participazioni à azzioni di dibattiti è prumuzioni (esempiu : ghjurnata di u 26 di frivaghju « Una ghjuvintù, una literatura » urganizata da l’associu Missaghju) ;
- pruposta di spazii di creazioni è di valutazioni cù a rivista Bonanova ;
- apartura di i cullizziò Albiana/CCU à prughjetti di publicazioni…

    L’insemi di issi custati è riflessioni hè statu ispostu à a stampa (Corse Matin è RCFM) in u quadru di un appuntamentu privistu ghjustu dopu à i deliberazioni. Par stu pocu, solu RCFM hà resu contu. Poni quissa u prublema di l’intaressu chjappu da i media lucali in generali in quantu à l’azzioni in giru à a literatura in corsu. Ùn solu di pata a mancanza d’analisi si pati ancu quì a trascurata di l’infurmazioni (1)
     In cunclusioni, si pò dì chì, al di là di u solu incuragimentu à a scrittura in prosa corsa, a premiata di a Biennali hà fattu quist’annu a scelta di staccà di modu chjaru l’attu di valurizazioni è l’azzioni di prumuzioni è di sviluppu. Segnu d’evuluzioni fattiva di a participazioni è di i scopi di issa premiazioni.
   A ghjuria brama di avè u sustegnu è l’appoghju di l’autori è li faci cumplimentu è ringraziu pà u piaceri di a so participazioni fruttifera.
Alanu Di Meglio

Dapoi stu resucontu a stampa hà fattu escia un articulu chì riveni ancu nantu à a manifestazioni di i studianti di l’associu MISSAGHJU (1) è un'intervista à Ghjuvan Luigi Moracchini.

(1) MISSAGHJU: un giurnale studiantinu curtinese publicatu à l'epica da una squatra diretta da Rumanu Colonna è Niculaiu Sorba)