Versione :
Corsu

OMBRE DI GUERRA

OMBRE DI GUERRA, Albiana, 1u trimestru 2011

 

L’autore : Ghjuvan Iviu Acquaviva, hè presidente di u sindicatu di l’appellazione cuntrullata « Farina castagnina corsa ». Hè nantu à Lozzi duv’ellu face carne pecurina è farina di castagne. Questu quì hè u so primu rumanzu. Hè natu di decembre 1969, allevatu in Morbihan è po in Balagna è hà fattu a licenza di studii corsi in Corti.

OMBRE DI GUERRA hè u so primu rumanzu.
Sò 117 pagine spartute in 23 capituli. Ogni capitulu hà puchissime pagine (da 4 à 6), duie cunsequenze :
-faciliteghja a lettura
-a narrazione hè ritimata assai è e nutazione sò zeppe, corde è dirette. Una dicitura senza fiuriture inutile.

A storia: Simu in u 1958. Ghjuvan Tumasgiu, u persunagiu principale, hà persu I genitori: a mamma quand’ella hà parturitu issu zitellu è u babbu, Ghjuvan Polu hè mortu “pè a patria” in 1940. In u 1945, more dinò Ghjorghju, u maritu di Celestina, a mammona di G.Tum. Ciò chì face chì Celestina si ritrova sola à allevà un ciucciu di 6 anni . L’aiuterà Sicondu, fratellu di u babbone Ghjorghju.
Prestu prestu, filichendu custì è culà, u giuvanottu, chì face i studii di storia in Ecchisi, ma preferiscerebbe à stà in paese, trova currispundenze chì facenu pensà ch’ellu ci hè un misteru tamantu in a so famiglia. È truverà, dopu scupertu affari orrendi chì riguardanu una famiglia presentata à l’iniziu cum’è un mudellu patrimuniale. Scuperte chì purteranu u giuvanottu à alluntanà si è à ingagià si in Algeria duv’ellu averà un cumpurtamentu eroicu. Secreti di famiglia ch’ellu sarebbe statu megliu à lacà corre è dorme cum’elli eranu. A dice a 4 a di cuprendula..

I persunagi :
Ghjuvan Tumasgiu : figliolu di Ghjuvan Polu, figliulinu di Ghjorghju u giovanu
Celestina : innamurata di Gino, moglie di Ghjorghju u giovanu
Sicondu : zione di GT, cugnatu di Celestina, fratellu maiò di Ghjorghju è in fatti, ancu di Gino
Ghjorghju u vechju : arcibabbone di GT, soceru di Celestina, babbu legale di Sicondu è Ghjorghju u giovanu
Gino : figliolu di Primo, innamuratu di Celestina, tombu per isbagliu da Sicondu
Ghjorghju u giovanu : babbone di GT, maritu di Celestina, fratellu di Sicondu è in fatti, ancu di Gino ; cullaburatore cù i nasì è i Taliani (2nda guerra)
Ghjuvan Polu : babbu di GT, mortu in u 1945