ACQUAVIVA Ghjuvan Iviu

Ghjuvan Iviu Acquaviva hè unu trà l’agricultori chì anu fattu a scelta di stallà si in paese. Face l’allevu in Lozzi è da issu bellu paese niulincu piglia pretesa cù a prufessione pè a labelizazione di a farina castagnina ; hè presidente di u sindicatu di difesa di issa appellazione.


Hè natu di decembre 1969 à Malestroit (Morbihan). Zzitellu hè statu in a regione d'Avignon è po hè turnatu in Corsica in u 1980, hè andatu à a scola in Balagna è in Corti duv’ellu hà fattu i studii di Lingua è Cultura Corsa.
Scrive in prosa è in puesia.


Ombre di guerra, Albiana, 2011, hè un librettu di un centu di pagine, cordu è forte di forma è d’ispirazione chì unisce amore di u populu corsu è sguardu acutu nantu à i so mendi di cultura.
Issu rumanzu hà ricevutu u “Premiu di I Lettori CTC” .

Tandu scrivu, racolta puetica, Albiana, cull. « E cunchiglie », 2011, 75 pagine