Erani tutti accolti davanti à i porti di a cità, omini, donni è ziteddi, pà veda l’arrivu di a cuorta. In testa di u stolu viniani i stendardi è i fieri aculi chì diciani a praputenza è a superbia di l’armata rumana. Ùn si muviani mai in darru quissi quì ed erani sempri pronti à fà corra u sangui à nomu di u Sinatu è di u Populu di a cità cù i setti poghji.
U so passu era dicisu è sicuru. Si carriaiani appressu tamantu nivulu di pulvariccia.

Maghju 25.
A guerra era compia dipoi setti anni ma i so diguasti è i so malanni ùn eranu finiti. U paesi, Turicettu annantu à i spondi di a Gravona avia persu a medità di i so omi, i giuvanotti ma ancu i più anziani è solu fermavanu, i stroppii, i donni è uni pochi di ziteddoni.
Marcu era unu di issi biscattoni ublicati, innanzi l’ora, à andà à stantà u so pani è quiddu di a so famiglia.

Oghje sò tarnalatu ! Impinsiritu ! È ancu imprimuratu !
Dipoi duie ore camingu pà isse strette, quelle strette di issa cità culurita, sapete ? Quandu à cinque ore di matina, s’è vo’ sete fora di lettu, vi vene una vampata colma di udore muscatellu chì v’infriddulisce l’ossi.
Fatta è fine, mi si pare d’esse avà nantu à u fronte di mare. Chì maraviglia quantunque ! Ùn v’aghju più issa curiusità è issu piacè di e billezze ch’e vecu agni ghjornu. Chì piccatu ! Noi altri semu quantunque scimintuliti !

Ave, ave, ave Maria ! cantanu Santa è Benedetta, sgranellendu i so paternostri .
A prucessiò si sparghje cume un sarpu maiò, losciu è incaluritu, chi u sole d’aostu tene e so prumesse. In testa, l’omi portanu a statula è strazianu, s’asciuvanu u fronte crosciu di sudore.
Oghje hè Santa Maria, festa di u paese. E donne sò in affannu, ognuna hà sceltu i so panni i più belli. Moglie è figliole di sgiò, carche di cullane è di pendini d’oru, parenu arburi di Natale chì spampiluleghjanu.

Un pezzuciu di vita paisana , in a Pieve di à Serra ,à u principiu di u vintesimu secculu.