TAORMINA È L’ARTISTI

Taormina hà duie cose famose : u so teatru anticu è i so oliandri. Hà ispiratu tanti scrittori rumantichi à u XIX seculu ed hè statu locu frequentatu assai da viaghjatori inglesi, francesi ed alemani. U so nome ammenta omossessualità antica, ma oghje si ritene sopra à tuttu u so clima dolce è serena è a bellezza di issi lochi.

In u 1787 Goethe cunsiderava u lucale “un pezzu di Paradisu nantu à sta terra”. Quasi un seculu dopu u pittore prussianu rinumatu Otto Goleng vense à stà ci. Vene da custindi a nomina è a passione per Taormina in i mezi colti parigini. A so casa vicinu à u teatru grecu turnò l’albergu più bonu di u locu. Era maritatu cù una Siciliana ma dicia chì e femine eranu fatte per figliulà invece i giovani adetti à i piacè sensuali.

Si venia da luntanu à gode a bellezza è a sensualità di i giovani Siciliani cusì vantata. Ci sò stati piscatori è pastori chì anu fattu furtuna à spese di i ricconi furesteri chì l’ammiravanu, ammasgiulati da a manera chì u pittore vantava a terra chì l’avia aduttatu. Spessu una parte di u patrimoniu sicilianu hè tuccatu dinù à u paese, vistu chì issi prutettori furesteri facianu lascita à issa giuventù cun cullezzione di arti è villà.

Wilhelm von Gloeden,cumpatriottu ed amicu di Geleng, vense ancu ellu à stà in Taormina in u 1880 è ci stete sinu à a so morte, cinquantanni dopu. Era ritrattaru è li piacia à ritrattà nudi i giovani pastori, è pratendia chì elli eranu belli quantu à i dii di a Grecia antica. A sucetà di Berlinu, benchè rivenuta da tuttu, si appassiunò pè u fisicu di issi giovani di Taormina, ritrattati cù à dossu una pella di pantera o allora à contralume in un sole di tramontu. I so « ritratti vivi” anu ispiratu puemi à modu à l’opere di Teucritu di Siracusa.

Oscar Wilde ci participava : mettia in capu à issi giovani curone di alloru o li facia piglià a posa cù un cialamellu di Panu. Von Gloeden dicia chì Wilde era bellu quant’è un diu grecu. Precursore di a talassoterapia si facia purtà, tutte e mane, stagnunate di acqua di mare. Cù a so influenza a piccula cità rumantica diventò un locu à a moda in tutta l’Europa. Somerset Maugham è Anatole France ci praticavanu ancu elli. Truman Capote è Tennessee Williams participonu bellu spessu à e feste offerte da Hauser in a so villà, è ci stetenu qualchì tempu à scrive. À Jean Cocteau, è po à Roger Peyrefitte u sugiornu li piacia, è po dinù à Thomas Mann. In u 1928, Lawrence ci si ritirò è scrisse L'Amant de Lady Chatterley.

Durante l’anni 1940 Gloria Vanderbilt, Marlène Dietrich, Rita Hayworth, Joan Crawford è po Greta Garbo vensenu à stà qualchì tempu in a casa di u dieteticu bavarese Gayelord Hauser, omu à a moda pè e stars d'Hollywood. «Un sugiornu in Taormina hè un incantu dicia Hauser, ma hè dinù una cura pè ingiuvanì.»