Valldemossa hè un paisolu di muntagna, cun  2000 abitanti, situatu sta volta da a banda interna di a Sierra, vicinu vicinu à Palma. Hè sicuramente u paese maiurchinu più cunnisciutu à l’internaziunale è quessa per dui mutivi diferenti: una perchè chì hè nata custindi in u 1531 Catalina Tomás Gallard, l’unica santa maiurchina, chjamata in modu pupulare la Beateta; l’altra causa perchè chì in a Cartuja, fatta civile in u 1833, sò stati custì durante l’invernu 1838-39 a scrittora francese George Sand, cù i so figlioli è u musicante pulunese Frederic Chopin, chì ci cumpose i so preludii. Valldemossa hà sappiutu cunservà u carattaru tradiziunale di e so cellule è di e so case, è oghje ghjornu hè sicuramente u puntu più visitatu di Mallorca per l’inseme di u turisimu chì sbarca nantu à l’isula.