U principiu di u turisimu

In Minorca u turisimu si hè sviluppatu à bastanza tardi di pettu à l’altre isule baleare. Fù un tempu chì à a ghjente ùn li paria necessariu di sviluppà u turisimu chì ne avianu à bastanza cù l’agricultura è l’industria di i scarpi. Dopu, u boom turisticu hà purtatu u benestà, ma ancu i danni nantu à l’ambiente. Ci sò e federazione di prutezzione di l’ambiente cum’è u GOB chì intendenu di fà firmà issu muvimentu è chì chjamanu à curà ch’ellu ùn si lachi andà u turisimu di massa senza cuntrollu. Ma u numeru di i turisti và sempre maiò tutti l’anni è cresce u numeru di e dumande di permessu di custruisce è dinù e custruzzione da duppià a capacità di accuglienza di i turisti

Grup Ornitològic Balear (GOB)

In e Baleare da ch’omu hà ricunnisciutu chì a natura intatta quantu ellu si pò hè « u capitale più maiò da sfruttà », si cerca cù un certu successu à prutege propiu l’ambiente. Custì, hè da ammintà l’impurtanza di u GOB (Grup Balear D'Ornitologia i Defensa De la Naturalesa) creatu in u 1973.

Appruvistà si in acqua

Da sempre l’acqua hè stata un prublema maiò per l’abitanti di Minorca. E riserve esistente in u paese facenu vede chì a ghjente si sò sempre primurati di cumplettà e poche risolse naturale fendu riserve di acqua piuvana. In u sud solu, duve a terra beie di più, si pò mette da cantu issa acqua piuvana chì và cun l’acque sutterranee.

Riserva di a Biusfera

Per mezu di una legislazione di prutezzione di l’ambiente di cumpetenza spagnola, l’isula hè quella più eculogica. 43 % di u territoriu sò sottu regulamentazione di prutezzione di a natura . Riguarda a zona umida S'Albufera, a costa à sud è à nordu è dinù e parte di a zona nordu infurestate. In u1993, l'UNESCO hà attribuitu u titulu più altu di prutezzione di l’ambiente : « Reserva de la Biosfera » (riserva di a biusfera). Cusì hè prutettu è prumossu un territoriu sanu. Ci si trovanu varii ecosistemi tipichi è u sviluppu si deve fà, per mezu di un sfruttamentu ragiunevule di e risolse, in modu chì u prugressu ecunomicu vachi inseme cù a prutezzione è u mantenimentu di l’ambiente.