U 28 di aprile di u 1885 Jules Verne hà visitatu a cità di Palma à traversu i persunagi di u so rumanzu "Clovis Dardentor". U marcante riccone chì dà nome è casata à u libru face parte di un gruppu di turisti chì sò in battellu è, andendu ver’di l’Africa, si cansanu per 6 ore. U libru hè statu publicatu a prima volta ind’è Hetzel in Parigi in u 1896. Hè u primu esempiu cunnisciutu chì dà à e Baleare un’illustrazione literaria è e facenu vede degne di esse cunnisciute.

Stupisce quant’ellu sà cose di Mallorca Verne. I dolci, u vinu, i prudotti varii di a terra è di l’artisgianatu, l’alivetu, u sughjornu di George Sand è Chopin in Valldemossa, cum’elli sò almanaccati i carrughji è e strette, è po tante altre cose.

Cumu sarà ch’ellu pò sapè ch’ellu si vede à Cabrera da u castellu di Bellver cù u tempu chjaru s’ellu ùn ci hè mai ghjuntu in Mallorca? È po ciò ch’ellu li piace à i piscatori in Formentor? A risposta a ci dà in u capitulu 6 di u libru: “S’ellu ci hè un locu chì si possa cunnosce in tutti senza mai avè lu visitatu, hè propiu l’arcipelagu magnificu di e Baleare.... Basterebbe à chjode si in qualchì bibbiuteca è ch’ella ci abbia l’opera di u sgiò arciduca Luigi Salvadore d’Austria nantu à e Baleare. I capituli “maiurchini” di u "Clovis Dardentor" sò una maraviglia per via chì Verne ùn ci hà micca accatastatu i dati enciclupedichi di u "Die Balearen", ùn face trascrizzione literale di ciò ch’ellu leghje in u librone di l’arciduca, innò! L’intreccia in u filu stessu di u rumanzu, u salda in l’andatu di a ventura cù un’arte tale chì u lettore si ne insuchja è ùn si ne avvede mancu!"

Ùn si hè mai sappiutu cum’ellu l’avia avutu Verne u libru di l’arciduca trà e mani in a so bibbiuteca d’Amiens è po hè stata Honorine, a moglia di Jules Verne à dì ci cum’elli avianu fattu cunniscenza tremindui u rumanzeru è l’arciduca. Honorine era custindi in un hôtel di Napuli quand’ellu spuntò un persunagiu stranu cun pseudonimu di conte Naudorff. Pocu dopu si seppe quale ellu era in veru l’arciduca. U scontru si fece in piena estate 1884, durante a crucera chì Verne facia in u Mediterraneu cù a famiglia nantu à u so battellu u "Saint Michel III".

L’amicizia trà d’elli durò 13 anni omancu. A dicenu e lettere ch’elli si scrissenu unu è l’altru è chì sò tenute in a Société Jules Verne di Parigi chì tene tuttu à contu in quantu à u rumanzeru è a so opera.