Ducumentu
A Sana, a cità è u merri
![](https://interromania.com/sites/default/files/styles/image_548xx/public/santa_rosalia.jpg?itok=-rJspojJ)
U Festino di Santa Rosalia fù à l’epica di Leoluca Orlando un simbulu maiori, a tiatralizazioni di una utupia.
Un rinnovu hè natu in Palerma frà 1993 è 2000 quandu L. Orlando fù merri. Si primurighja mondi a so pulitica di l’iniziativi culturali. U fistivali Palermo di scena animaia i nuttati. I lodi pà a santa patrona, u Festino di Santa Rosalia, ani presu una impiezza tamanta. Quandu in l’anni uttanta u numaru di i parsoni prisenti pà sti manifestazioni ùn francaia trenta mila parsoni, à a mità di u nuvanta ci ni era più di cinqui centu mila.
A fonti hè di u 1624, Palermu era stirpatu da a pesta. A malatia si sparguddaia finu à chì Rosalia Sinibaldi apparischi in a parsona di un omu chì insignaia u locu induva ci erani i so ossa à nantu à una cima induva hè stata ritrova morta, in u 1170. L’autorità presini a dicisioni chì a salma di a ghjuvanetta fussi accantata in una scatuletta argentina sposta indrintu à a catidrali è chì u quindici di luddu, ghjornu di anniversariu di a scuparta di l’ossa, a scatuletta fussi purtata in prucissiò. L’epidimia calò. À parta si da u XVIIu seculu, nanzi a prucissiò sulenna di i riliqui di Santa Rusalia ci fù una festa prufana, u Festino. Com’è a cirimonia rilighjosa, u ritu prufanu mittia in scena u mitu di urighjini di u Festino, da a ghjunta di a malatia à a prucissiò miraculosa.
À parta si da u 1995 (duranti trè anni), L.Orlando hà fattu raprisintà a pesta in Palerma, utilizendu a cità com’è dicoru. A maffia spavintosa rimandaia u passatu in u prisenti. Trè volti, trà u 1995 è 1997, i citadini di Palerma sò duvintati spittatori di a so storia propia, quidda di u 1624 quandu un battellu di Tunisi chè fù prima arristatu, era suspettu di purtà a pesta è po’ accoltu da u vicirè chì aspittaia i rigala, feci scalà a pesta in Palerma. Era sempri un successu tamantonu. U paragonu da a pesta à a maffia hè evidenti.
S’hè prisintatu Leoluca Orlando com’è l’omu novu. Salvà a cità, valia à dì cavà la da u puteri maffiosu. A prisenza di cinqui centu milla parsoni in u Cassaro pà u festino hè stata a manifestazioni spittacularia di un riacquistu. In u 1997, a cumpagnia Ditirammu ci hà prisintatu i Triunfi di Santa Rosalia. Fendu u ribombu à u festino, ripiddaia canta è raconta tradiziunali di a verghjini, pà duvintà, iddu dinò, a tela di daretu induva u intuppu vitturiosu inghjinnatu da u merri contru à a criminalità mafiosa era missa à palesu. Comu imaghjinà una scena meddu chè issu munumentu « guaritu » pà raprisintà u « triunfu » di Santa Rosalia di pettu à l’epidimia è, à traversu à iddu, quiddu di L.Orlando di pettu à a maffia ?
À parta si da u 1998, u missaghju era cambiatu di sensu. In u so discursu, una volta a maffia vinta, a sfida era a intigrazioni di i diversi etnii à mezu à a una sucità multiculturali. In u 1999, u merri rializò una leia incù Cuba, l’isula di l’urighjini varii. Ma u spittaculu hè troppu alluntanatu da l’anima siciliana. Si sintia da tandu i prima disaccorda trà a pupulazioni è u merri. In u 2000, a intigrazioni era sempri a parolla di primura di u Festino, ma l’imaghjina di u stranghjeri si era quasgi duppiata. Da una parti, u nimicu chì ci vulia à caccià fora, da quidd’altra, l’alterità pusitiva ch’idda ci vulia à incurpurà à sè. Tanti anni fà i maffiosi erani cunsidarati da quiddi di u locu com’è quiddi chì pussedini i valori spartuti da tutti, di un codici cumunu, è ancu di a cultura siciliana sputica, si era à pocu à pocu trasfurmata in un « nimicu di a Sicilia ». À parta si da u 1998, L.Orlando hà cuminciatu à prumova u cultu di San Benedetto il moro patronu di Palerma dapo’ u 1652, ma squassatu da l’imaghjina di santa Rusalia. In u 1999, duranti i fistività di santa Rusalia, a statula di u santu neru hè stata surtita da a ghjesia induva idda era piattata.
U "sonniu d’Orlando" hè statu quiddu di ugni Palermitanu cridindu pudè vincia a maffia è campà in Palerma com’è in una "cità nurmali". Pudarà stu sonniu essa dino’ u mutori di u cambiamentu in a rialità cusì trista di u prisenti ?