U 16 di ottobre u gruppu Arapà passa à l’Olympia. Puru tamanta, a sala hè capita ch’ella ùn puderà accoglie à tutti. U gruppu a sà è ci permette di participà subitu avà è longu à a preparazione d’issu magnificu appuntamentu. Tenimu ci infurmati cunsultendu a so newsletter è barattendu idee è parè.
http://www.arapa.fr

Ultimamente hè stata inaugurata a mostra Donn’è Lettere pensata è prudotta in u quatru di Simana di a Lingua Corsa purtata tutti l’anni da a Cullettività Territuriale di Corsica. Si tratta di una vuluntà di mette in carrughju è in piazza a literatura corsa è di offre i so ritratti di l’imaginariu literariu ch’ella move a vita ma dinù a rapresentazione figurata di a cultura corsa per mezu di scene è di ritratti chì i studii critichi caratterizeghjanu da “strutture semiotiche” o “invarianti” o “schemi culturali”.

Marco CINI, autore di A VINDETTA, un drama rapresentatu da a Cumpagnia U TEATRINU, si hè ispiratu da e cronache ghjudiziarie di Salvatore VIALE. Un autore corsu chì Cini hà studiatu tutta l’opera è ne cunnosce tutti l’aspetti ecunomichi, culturale è pulitichi, ancu perchè chì Viale, in a so epica, era in relazione regulare cun parechji rapresentanti di l’elitte europee.

UN OSSERVATORE TALIANU FACE L’OCHJATA À I CORSI

In una messa à ghjornu precedente, avemu accinnatu à u libru di Stefano TOMASSINI, publicatu ind’è Feltrinelli in u 2000: Amor di Corsica. Hè piaciuta à unepochi chì a ci anu detta. Eccu dunque dui altri passi d’issu libru pienu à scuparte è insignamenti utili à tutti :
- un ritrattu attente è ironicu di Aiacciu
- un altru cun listessu versu in quantu à Corti.