Lesia
Notte seta cincinata
Da e sirene annannata
È sbuccia lu misteru di terra chì trema
Purtata da un marosulu di sole
Struttu da un altru sole viulente è puru
Mughju à u spuntà di l’alba
Coltu à u cantu di e fate
Mossa chì disceta lu ghjornu
Forza appesa à lu mio sognu
Notte mele sussurata
Da li celi appaciata
È giranu li soli o magia celesta
Di l’universu persu è ritrovu
In un chjerchju infinitu viulente è puru
Mondi
Zocculi d’oru longu un raggiu di luna
Cavallu moru luccicheghija la chjoma
Chjoccu di e so ale flussu è riflussu di u mare
Slancciu di a so voce canta è c’incanta o cusì dolce
È fughjenu li mondi
Luna nuda
Luna imbalsamata
Sì la musa
Di sti celi
O Damicella fatata
Zocculi d’oru un manellu di stelle
Cavallu biancu soffiu di cialamelle
Celu ch’inganna spechju trafuratu da e speranze
Da tanti surisi di u ghjornu ferma lu to sguardu
È tandu m’innamoru
POLI Patrizia
Vulia solu
Vulia solu
apre l’albe
una cria.
Solu,
un fiatu di sole
nant’à u toiu
addurmintatu.
È, tepidinu,
quì duv’hè nudu
lu to spinu,
u nodu sfattu
da la to pelle à la so spira.
U Riposu
U riposu
nantu à una manu,
è sopr’à una rena
pettini a sirena
in un’ansciu allibratu
à la vita chì dorme.
Scioglieria
Scioglieria
d’amore
e sfiere
d’un turmentu :
u giru d’un mumentu
à l’ombra
di l’amanti...
Mi trica
Mi trica
È mi trica
la filetta
in lu to ochju
calmu.
Sottu à una sfiera
andata
femu ci
una vita
aghju bisognu eo
di u tempu
salvaticu
chì ti sbuccia
à le mani
mi trica
dumatina
u silenziu in dinochje
è l’albe
trà l’ombra è l’ombra micca
u riposu
levatu à lu so pettu
da ripiglià
di tondu à noi
a misura
ritimata
di u tremindue...
![](https://interromania.com/sites/default/files/styles/auteur_200x/public/sonia_moretti_0.jpg?itok=zIe2Cmmj)
MORETTI Sonia
Sonia Moretti est professeur certifiée de langue et culture corses et enseigne à Bastia. Originaire de Lentu, elle est née à Ajaccio en 1976.
Très tôt, elle affirme des dispositions pour la langue corse (Prix Andria Fazi en 1994) qu’elle utilise pour ses poèmes. Elle étonnera le professeur Jacques Thiers lorsqu’elle participera lors de ses premières années d’études aux ateliers d’écriture du Centre culturel universitaire.
Tandu l’omi
Tandu l’omi s’arrughjavanu.
À passi abbiadati maghjincavanu e cunfine.
À mani baldanzose impitravanu sonnii.
È l’ochji ammannillati adurnavanu l’aghje.
San Martinu !
Tandu frumbavanu e voce.
Strapazzi di u ventu, acri suspiri
lamenti !
Nanna di u zitellu, chjuchjulimi d’acelli
paghjelle !
Celu alliculatu pè cori appicciulati
è dalli à i serinati !
Sacri versi.
Gloria à u Supranu !
Degne sequie à l’appaghjatu umanu.
CANTU !
Cantu colmu, appatriatu,
scama ardente è di l’orbe u fiatu.