NASU TAGLIATU DI U PRETI

 

Vicinu à Casalabriva  campaiani trè  frateddi in un caseddu cupartu di flasca, un fuconu à meza pezza chì facia fulena à vulintà, è pà via di lumu, a sera accindiani un pezzu di deda di pinu ficcata in u muru di petri secchi.

In un scornu,  c’erani trè sacconi pièni di casci di granonu  chì sirviani di strapunta. 

Si capisci chì soldi ùn ci n’era ! Puvareddi è malandati, eccu a vita di i trè frateddi, è peghju ùn ci n’era in u rughjonu.

 

U più maiὸ, Andriareddu, ùn pudia più suppurtà issa vita mischinedda è una mani  d’aostu si metti in viaghju, à pedi ben’intesu, incù a spirenza di fà furtuna.

 

In viaghju scuntrὸ un preti nant’à un samireddu.

-« Salut’ὸ sgiὸ Curà, beddu tempu oghji, ùn hè ? »

-« Iè u me ziteddu. Indù va’ pà issi caldamoni? »

-« Socu senza travagliu , allora cercu qualchissia chì mi pigliaria à u so serviziu,

     chì socu bonu à fà tanti cosi ! »

-« Ti possu piglià incù mecu à u prisbiteriu ; »

-« Si pὸ fà, ma dumandu una paga di centu scudi u mesi, nutrit’è allughjatu. »

-« Tù sè gurmandu ! Allora, faremu cusì si tù sè d’accunsentu : ti docu centu scudi

    ma devi fà tuttu ciὸ chè ti dumandu . A prima volta ch’è tù dici chè nὸ,

    ti tagliaraghju u nasu.  Semu intesi cusì ?

-«  Semu intesi. Prumettu di ubidiscia. »

 

U prima ghjornu, tuttu và bè. Andriareddu dà capu à tutt’à casa chì ci hè dinὸ a mamma è trè nipoti, è u preti hè cuntenti.

À u mumenti di manghjà, li dici :

-«  Tè ὸ Andriarè,  sciacca ti un piattu d’issu brennu, chì piaci tantu à i me purceddi » .

-«  Ùn ci hè paùra ch’e manghjessi issa rubbacia ! Ùn socu micca un porcu ! »

-«  Attenti chì t’aghju da taglià u nasu ! Ti n’inveni di u nosciu accordu ? »

-«  Aghju dittu chè nὸ è basta ! »

 

U preti piglia un pinnatu è li taglia u nasu, comu avia dettu !

 

Tuttu sanguinosu, Andriareddu  si mett’à fughja è ghjunghji in casa soia à cuntà

à i so frateddi ciὸ chì li hè accadutu !

U mizanu, Franciscolu, ùn pὸ accità un tal’fattu !

-« Vogliu andà anch’eiu à fà furtuna, ma sè scontru issu pritacciu  maladettu, li tagliu

      u coddu  incù u so pinnatu. Và puri o Andriarè, ch’è tù sarè vindicatu !

 

Ma Franciscolu  hà scuntratu anch’eddu u preti, anu avutu u stessu discorsu, s’hè truvatu in a stessa situazioni chè u so frateddu,  ùn hà anch’eddu vulsutu manghjà u brennu di i porchi , è ben’intesu s’hè fattu taglià u nasu pà u preti !

 

Vultatu in a so casa si pὸ pinsà comu i so frateddi sὸ  stati à l’addisperu !

Ma u più chjucu, ch’eddi chjamavani Pidiolu, parchì avia i pedi tamantini, s’hè missu  in una zerga nera ! 

-« Comu, vi seti lacati fà da issu pritanchjonu, senza dì nè fà nudda ?

     Lacheti mi andà à truvà lu è l’affari saranu in francese ! «

-« Farii megliu à stà quì, parchì issu preti hè più forti chè tè ! »

-«  Vidaremu. Vultaraghju da quì à un annu pà cuntà vi a storia « .

 

Pidiolu anch’eddu hà scontru u preti è comu i so frateddi, hè divintatu servu di u preti, chì l’hà datu i stessi cundizioni : fà i so capricci ὸ avè u nasu tagliatu !

-« Sὸ d’accunsentu o sgiὸ Curà, ma anch’eiu aghju una cundizioni.Di noi dui, u prima chì si mittarà in zerga avarà l’arechji tagliati  è devi dà à l’altru tutta a so furtuna ! »

-« Eccu una cundizioni strana ! Pudariù perda cusì i me arechji è a me furtuna ? »

-« Aveti capitu bè ! Soca vi piglia a paùra ? «

-« Ùn  aghju paùra di nudda chì sὸ pruttetu pà u celi ! Allora socu d’accunsentu !»

 

U prima ghjornu, Pidiolu faci in neci di manghjà u brennu di u porcu, ma u lindumani, purteti  tutti i porchi à u maccedu , i si feci pacà un bon’prezzu  è dumandeti à purtà si i codi di i purceddi.

 

In un stagnu vicinu, metti i codi in a pantaniccia è volta currendu indè u preti briunendu :

-« Viniti subitu chì tutt’i purceddi sὸ cascati in u stagnu ! ùn’affaca chè i codi ! »

 

Corrini à u stagnu è  tirani nant’à i codi pà salvà i purceddi,  ma solu i codi li fermani in manu !

-« Abruttitu ch’è tù sè ! Tutti i me purceddi sὸ annicati pà via di tè ! »

-« O sgiὸ Curà, mi pari ch’è vo seti in zerga, o mi sbagliu »

-« Nὸ nὸ, sὸ cuntenti, più chè cuntenti u me chjucu » !

Soca u preti s’hè ramintatu di i cundizioni è tinia à i so arechji è à a so furtuna !

 

Qualchì ghjorni dopu, Pidiolu era incaricatu di muntanà  a banda di capri di u preti

quassù nant’à u monti  San Petru. Si scanza pà Ulmetu, vendi tutt’i capri à un incitaghju, unu d’issi marcanti chì viniani dà luntanu è chì i francesi chjamavani i « maquignons ».

 

Ma  una capra a si  teni, a metti nant’à punta di una lecci vicin’à u prisbiteriu,  è a teni pà a coda, è  po si dà à i brioni :

« O sgiὸ Curà, aghju bisognu d’aiutu, tutt’i vostri capri bulani pà cuddà in celi ! »

 

Quandu ghjunsi u preti, vedi à Pidiolu nant’à l’alburi, chì tinia di a capra pà  a coda.:

-«  Hè troppu tardi ! ùn n’aghju salvatu chè  una in punta à issa lecci , è a tengu pà a coda, viniti à u me succorsu ! »

U preti era mantacatu . quissu zitiddacciu a mi ficca ! Bisogna ch’eddu parti via !

-« Fala da quì, bruttu samiracciu, t’aghju d’accapà eiu ! »

-«  Mì  mì chì hè in zerga, u preti !  O sgiὸ Curà, sariati cuntenti chì ùn mi stunaria

     mancu stampa ! Ùn hè vera ? »

U preti hà capitu u sensu d’issi paroli :

-«  Iè chì socu cuntenti ! Fideghja : mi mettu à baddà di cuntinteza ! » lampà rungnichendu.

 

Pà caccià lu  da mezu à i pedi, invia Pidiolu à cavaddu   in una furesta vicin’à Cuzzà,

 à circà un’eddara incantata pà i Fati,  in una  muntagna  pièna di banditi è di latri, incù a speranza ch’eddu ci lachi a vita.

Ma Pidiolu era malignu.  Piatta u cavaddu daret’à un chjapponu, è dici à i banditi chì l’avianu dumandatu ciὸ ch’eddu facia :

-« Aspettu u me cavaddu ch’hè cuddatu in celi. Ùn vulia fà  chè di u so capu, allora ,l’aghju

     datu un calciu è mandatu di colpu in i nivuli ! Ma hà da vultà ! »

 

I banditi,  videndu un omu cusì capaci è di una forza di u diavuli,  sὸ scappati prestu.

 

Una volta coltu l’eddaru incatatu, Pidiolu si n’hè vultatu indè u preti ch’un hà micca capitu comu issu diavuli hà pussutu scappà da i mani di i banditi ! 

-«  Sὸ po miraculi ! Hè vultatu sanu sanu ! truvaremu un’altra manera di fà lu parta ! »

 -« Sè bonu à taglia a vigna ? »

-«  Iè o sgiὸ Curà ! l’aghju fatta tanti volti ! »

-« Allora spicciati d’andà,  chì à mezionu tutt’à vigna devi essa tagliata ».

 

Pidiolu hà tagliatu a vigna, ma di chì manera! Ùn firmaia più tanti calzi ! U preti

volsi andà à veda u risultatu è anch’un pocu si ni veni menu !

-“Allora o Sgiὸ curà, sò cuntenti di veda ch’è vo seti cuntintissimu ! »

-“ Iè sὸ cuntenti . Saraghu ancu più cuntenti s’è tù va’ subitu à taglià u legnu

     pà fà u focu !Aghju da vena incù tè pà veda s’è tù sè bonu ! »»

 

Pidiolu si metti à sciappà u legnu è faci neci di ùn pudè caccià a piola inchjuvata in un grossu ceppu, po’ dumanda à u preti d’aiutà lu  incù i dui mani pà allargà u tagliu.U preti  l’ascolta è tandu Pidiolu caccia a piola di colpu,  è u preti si trova incù i dui mani presi in u ceppu, beddi strinti !

 

-« Ohimè chì morgu ! Corri subitu à piglià trè cozzi pà libarà i me mani !    Sὸ  in a me camara  »

-« Hè sarratu u presbiteru ! Comu devu fà pà entrà in  camara ? »

-« Hè apartu,  chì i me trè nipoti sὸ in casa. Spiciati ὸ samirὸ,  è porta mi i trè cozzi. ! »

 

Di sicuru hè andatu in casa, ma micca pà piglià i cozzi ! Dici à i trè sureddi chì ù diavuli  voli tumbà u preti, u quali  dumandà,  pà salva a so vita,  ch’i sὸ trè nipoti dormini incù  Pidiolu .

I ghjuvanetti si ni sὸ risi d’una dumanda simula ! ma Pidiolu si metti à briunà  à u balconu :

- « O sgiὸ Curà, mi ci volini i trè, n’hè vera ? »

-« Ma sicura ! Piglia i trè à spiccera  chì mi sentu mora !»

 

Una di i nipoti dumanda à u preti :

-«  Aveti dittu in a vostra camara, tutt’è trè ? »

-« Iè, ma fatti aspicera,  chì ùn ni possu più ! »

 

I trè ghjuvanetti ùn poni chè acità è eccu à Pidiolu in u lettu di u preti incù eddi !

 

Un’ora dopu, piglia i trè cozzi è corri à libarà i mani di u preti presi in u ceppu !

Ghjuntu in casa, i trè nipoti li facini u rimprovaru  d’avè li fatti chjinà incù un servu !

 

 U preti hè à l’addisperu :

-« Comu ! vedi i me purceddi, i me capri, si chjina incù i me nipoti, è sè mi

    mettu in zerga,mi taglia l’arechji è si piglia à me furtuna ! Ci voli à sbarrazzà mi

    d’issu banditu subitu subitu ! Sta sera, quand’eddu dormi, l’aghju da incocia d’acqua calda ! »

È si metti à carrià tineddi d’acqua di a funtana. Pidiolu hà capitu ch’issa acqua ùn era  catolica, è saria megliu pà eddu di piattà si ! Allora a sera,  piuttosti chè di dorma in u so lettu,

si metti piatu piatu  in un scornu  di a cantina,

 

Dopu mezanotti,  u preti piglia una paghjola d’acqua buddenti è in u bughju,  a lampa nant’à u lettu  di u servu.

 

Issa volta, hè mortu di sicuru !

Ma a mani di bon’ora, Pidiolu entri in cucina è à u preti chì u cridia mortu, dissi chì sta notti , i topi avianu pisciatu in u so lettu chì hè tuttu trosciu !

 

Ùn hè micca mortu !! Ma comu fà , ma comu fà !

 

-«  Ma quandu ti ni và d’issa casa ? »

-« Mi n’andaraghju quandu u cuccu vinarà à cantà nant’à u chjarasgiu di l’ortu ! »

 

U preti corri ind’è a so mamma è li dumanda di appuddà si nant’à u chjarasgiu  è di fà u cantu di u cuccu. Quidda si metti à  cantà cusì bè chì Pidiolu hè tuttu cuntenti.

-«  Allora, u cuccu hà cantatu, l’a’ intesu ? Ti ni po’ andà subitu.

-« Iè ma prima vulariu andà à caccia pà l’ultima volta. Pristeti mi u vostru fucili,  ùn vi dispiaci micca ? »

-«  Eccu u fucili, ma dopu , ti ni và ! »

 

Pidiolu s’aviccina di u chjarasgiu incù u fucili, lenta una fucilata  è chjama u preti !

-« Viniti subitu, aghju tombu u cuccu ma s’assumiglia à vostra mamma ! »

-«  Mì chì a tombu a me mamma ! Sè scimitu ? »

-« Innò aghju tombu u cuccu, ma hà  a facia di a vostra mamma ! »

- « Ti dicu ch’è tù a’ tombu a me mamma ! »

-« Mi dispiaci, ma diti mi ch’è vo seti cuntenti ! »

-« Comu aghju da essa cuntenti ! Veni quì ch’è ti tagli u coddu ! »

-« Allora, vi devu taglià i dui arechji è piglià tuttu ciò ch’è vo aveti . Casa, soldi, chjosi è cetera.  Sὸ i cundizioni ! »

 

Arechji tagliati è senza più nudda, u povaru preti s’hè impiccatu.

 

-«  L’hè custat’ à eddu di taglià i nasi di i me frateddi » dissi Pidiolu !

- « L’aghju chjamati à vena quì incù mecu in a casa di u preti chì avà hè a mea. 

   Di più ci sὸ soldi in quantità,  hè finita à scunghjura, pudaremu tutti campà felici. »

 

I trè nipoti di u preti, i tintareddi  anch’eddi senza casa nè tettu nè ancu manghjuscula, di paura di batt’a fami, anu pinsatu chì u megliu saria di spusà i trè frateddi è campà incù eddi .

Eccu una bona idea ! Beddi ziteddi erani, astuti è comu si devi !

 

È  cusì si sὸ tutti  maritati un beddu ghjornu  di u mesi di maghju, è mi pari di senta anc’avà a ciccona di Casalabriva chì annunciava à tutti a bona nutizia.