A terza parte di a cunferenza rispechja u studiu assai sminuzzatu è precisu di l’analisi di issi testi literariu. Hè cunsacratu à e figure maiò di a storia di Corsica. Arrimbatu à e so riferenze ammintate più insù, u circatore prupone à u publicu a so lettura di parechji attori di a storia corsa, attente à disciuplicà ne a parte storica reale è a significazione metaforica o allegorica. Ùn cita tutte i ritratti insignati in a tesa, ma un listinu basta à palisà ne a divizia è u significatu à tempu sociopulitica è assiulogicu. Vittulu, Sampieru, Sambucucciu, Paoli, Circinellu, Napuleone, Pozzo di Borgo, è… Don Juan sòaffiancati da Santa Divota, Santa Ghjulia è tanti altri. Ammenta u valore simbolicu di certi cum’è un Sampieru chì face pensà à Achille, un Paoli à Ulisse è un Napuleone à… una figura sintetica trà Achille è Ulisse. Via, una galleria diviziosa di ritratti duv’ella s’illustra a storia di a Corsica è l’impronta ch’ella stampa in u nostru imaginariu di sempre.
Attente à tene contu di e dimensione, lucale è universale, u cunferenzeru allarga dinù u so ragionu à cunsiderazione chì avvicinanu e vicende di a storia corsa cun l’analisi di letture glubale, cum’è quella di Hannah Arendt disciuplichendu e finalità di e lotte rivuluziunarie in varie situazione. È cusì GG.TALAMONI sugerisce quantu, à so parè, a rivuluzione di una Corsica in u 18 u menu stratificata sucialamente chè certe più pudente ecunumicamente si assumiglia di più à quella americana in cerca di a libertà chè à quella francese bramosa in primu locu di egualità.

In isse cundizione, a cunclusione preparata da un accostu metodicu è chjaru assai, vene linda è chjara : à traversu e lingue latina, taliana, francese, è à un livellu più bassu inglese (G.Chiari), a literatura corsa porta in e so strutture prufonde a marca di un imaginariu in leia stretta cù a sucetà. Dunque si impone un doppiu fine : studiu è illustrazione cù e varie pratiche (lettura, scrittura, circulazione è spannamentu di l’opere).