S’era alzatu u ventu nantu à e culline di a Casinca. Un ventu seccu, nervosu, cum’è una voce chì chjama. In e strette di Borgu, e petre parianu ritene u so fiatu. E campane s’eranu zittate. E donne avianu chjosu l’alette. È in i boschi, l’omi aspettavanu.

Pasquale Paoli caminava in silenziu. À fiancu à ellu, Clemente, u fratellu, l’ochji versu e creste. Daretu, centinaie di passi, millaie di cori. Pastori, piscadori, vechji, giovani appena esciuti da a zitellina. Tutti cù a stessa luce in l’ochji : quella di quelli chì ùn anu più nunda à perde, fora di a dignità.

— Borgu hè u nostru, murmurò un vechju stringhjendu u so fucile.

L’ottu d’ottobre, à l’alba, i Corsi circundavanu u paese. I Francesi, scuntati, aspettavanu rinforzi. Ma Clemente Paoli avìa chjosu e strade. A trappula si chjudia.

I cumbatti funu longhi, aspri, senza riposu nè rifiatu. A terra tremava sottu à i gridi, i colpi, i canti. Si dicia chì Pasquale, drittu di tutta a so altura, avìa alzatu a manu è dettu :

« L’Auropa ci feghja. Siate a memoria di quelli chì veneranu. »

U dece d’ottobre, u silenziu vultò. Un silenziu pisante, attraversatu da i suspiri di i vivi è i murmuri di i moribondi. U culunellu Ludre capitulò. I Corsi avìanu vintu.

Per pocu.

In e strette di Borgu, e donne riaprianu l’alette. I zitelli currianu versu e culline. È in u ventu, si sintianu sempre i passi di quelli chì avianu lottatu per a libertà.

                                                                                 M.CLEMENTI