Isula pensamentu de sa mia avrèschida
rosa palmuzza e auzzàra
fiore ch'ispùntat e chi nos lusìngat
fiore chi s'abbojat e chi donat disizu
Isula

Isula raighìna de sa vida mia
alenu de un'abba salina
basu lampàdu dae sos pizzinnos
basu falàdu dae sos bastimentos
Isula

Isula pensamentu de su viaggiu
de s'odissea ch'hapo a dever cùrrere
muccaloru lagrimosu de sos bisos mios
muccaloru infustu: e tue no ti nde birgonzas
Isula

Isula chelu pintàdu 'e sole
finzas cando una nue si che misciat
e mancari sa foza inghìriat in s'aera
comento una girandula 'e mariposa
Isula

Isula pensamentu de sas violeras mias
disizu inappagadu de sa patria
ojada illuminada de sole
ojada triste de s'amore mancàdu
Isula

Isula fadada chi no morit mai
foza sicca chi su 'entu recùit
a su logu pius segretu de su coro
inue s'ammentu no podet morrete mai
Isula