Mariana, cità rumana, paleocristiana è medievale, hè situata ingiru à vinti chilometri à u meziornu di Bastia, oghje nantu à a cumuna di Lucciana. A cità, sempre sottuterra quasi sana hè nantu à a sponda manca di Golu  vicinu à u stagnu di Biguglia, chjamatu dinù Chjurlinu. A cità rumana chì averà u nome di à chì l’hà fatta, hè stata fundata in ver di 100 p.G.C., da u consule è generale rumanu Caius Marius.

I cuntorni di Mariana presentanu vantaghji naturali capaci à porghje a prusperità à una cità.  Una piaghja tamanta fertile è chì si pò cultivà, fureste è stagni vicinu, un fiume sempre presente, u Golu, chì a so bocca, assai larga permettia ch’elli accustessinu i battelli marcanti è di fà porti impurtanti in relazione cumerciale strette cù i porti italichi d’Ostia è Luni ; sò stati quessi caratteri primurosi da fà custindi a fundazione di Mariana. Ma u più hè stata  situazione geostrategica à decide ch’ella saria impiantata in issu locu a culunia.

À livellu mediterraneu, avè un portu impurtante in u nordu di a Corsicu face più faciule ch’omu ammaestri  e vie marittime in u mare Tirreniu. Da u 6 dopu à G.C.Mariana diventa, cù  Aleria, una di e duie base di a flotta di Misena in Corsica. Nantu à l’isulà creà un’altra culunia face più faciule u cuntrollu è a gestione di e cità di u nordu di l’isula è si face più in furia à rumanizà i lochi più luntani da Aleria.

Archeulugicamente, fora di unepoche munete da pudè si attribuisce à l’epuca republicana, e vistiche di l’acconci urbani di i tempi di a fundazione di Mariana sò ancu à scopre. È puru, i primi coloni essendu veterani di e legione, si pò dà chì u statu primitivu di a cità fussi statu quellu di un campu militare rumanu fattu in legnu. Pè isse epiche landane, ùn ci sò chè i scritti di l’autori antichi cum’è Pomponius Mela, Plinu u Vechju o dinù Seneca è Solinu à fà sitestmoni di issa culunia.

À u I^u è u II^u seculi sò alzate in Mariana custruzzione fatte à mattoni chì tenenu l’impalcatura di l’occupazione di prima, è in particulare u sistema ortonurmatu cumpostu di e vie di u Decumanus Maximus (via este-ueste) è di u Cardo Maximus (via nordu-meziornu). Secondu u geografu Ptolemeu hè dinù u II^u seculu à vede a cità perde a so situazione di culunia è à esse oramai cunsiderata una cità, vene à dì una polis.

Mariana pare ch’ella sia stata à u più altu durante u IV^u seculu. E scuperte archeulogiche insegnanu ch’ellu circulava denaru assai, ciò chì deve insignà una prusperità maiò. Hè dinù tandu ch’ellu si sviluppa u cristianisimu. Forse si pò dà a fine di u IV^u o i primi di u V^u seculu cumu data pè u primu inseme paleocristianu. . Dopu hè custindi a sede episcupale trà tutte l’altre di l’isula. Mariana tandu hè a cità isulana l’Antichità tardiva, è issa primura l’hà da tene longu à tutta l’Età di mezu.

Hè cusì chì dopu un bellu pezzu à esse stata cunsiderata secundaria di pettu à Aleria, capitale di a Corsica rumana, Mariana pare ch’ella avessi passatu megliu chè a so vicina a fine di l’Imperu, è ancu megliu dopu ch’ella sia stata lampata Aleria ver’di u 420. Issa pusizione duminante a cunfermanu i scritti di i geografi anziani (Tavula di Peutinger è Cosimugrafia di l’Anonimu di Ravenna).

Ma Mariana ùn si franca micca l’invasione nè e destruzzione. I Vandali, i Goti forse, i Bizantini, i Lombardi, i comti carulingiani è i Sarracini ci saranu passati unu dopu à l’altri trà a seconde metà di u V^u è u X^u seculu. In cor(di l’XI^u seculu e flotte taliane scartanu pè u sempre da u mare Tirreniu a minaccia sarracina.

Pisa s’impone propiu in Corsica da u 1077 è u cleru pisanu riface à modu soiu e strutture chjesale di l’isula. À l’iniziu di u XII^u seculu, a catedrale rumana di Mariana hè alzata vicinu à e ruine di a basilique paleocristiana. Ma a custruzzione di u palazzu vescuvile ùn a ci face à risuscità una cità à pocu à pocu sprufundata d i seculi d’insecurità è chì oramai si trova in un locu insalubriu.

U situ hè abandunatu per sempre à a fine di u XIII^u seculu quandu u vescu decide di purtà a so residenza in U Viscuvatu, è po dopu in Bastia in chjesa Santa Maria da u XVI^u seculu. Da tandu à issu locu li ferma solu un valore simbolicu in particulare pè i sgiò pumuntinchi amichi d’Aragone chì venenu à fà si fà comti di Corsica à uL’Età di mezu nova. Ma sinu à u XVIII^u seculu, i veschi di Mariana tenenu l’usu di vene à piglià pusessu di a so sede in i lochi stessi di a cità antica.

Oghje à chì s’affacca in visita pò sempre andà à vede duie chjese rumane , longu à a strada dipartimantale 107 vicinu à l’aeruportu di Bastia-uoretta. Di prima a catedrale medievale dedicata à Santa Maria Assunta ch’omu cunnosce megliu custì cun nome  « A Canonica ». A cunsacrò in u 1119 l’archivescu di Pisa. Issa catedrale di stile rumanu pisanu, cù a so l’architettura semplice è armuniosa è e so prupurzione perfette, misura 35 metri di lungura. A dividenu in trè nave duie infilarate di sette pilastri quatrati, à l’este a compie un’abside semicirculare cuperta da una volta in fondu di fornu. Oghje a catedrale ghjova pè u cultu una volta sola à l’annu,, u luni di a Pentecosta.

À 500 metri à sudueste di a Canonica ci hè a chjesa cimiterriale di San Parteu. Hè una chjesa rumana di a metà l’XI^u-principiu di u XII^u seculu, cù una nave sola è una abside chjuca ed aggarbata. Hè stata alzata fora di i limiti di a cità rumana nantu à i resti di un munumentu paleocristianu anteriore.

À cantu à i munimenti pisanu, e vistiche antiche, testimoni di a cità sparita cusì grande è ricca, Madama Geneviève Moracchini-Mazel l’hà scuperte ind’è l’anni sessanta. I scavi anu permessu in particulare di scopre e vistiche di una basilica è di un battisteru paleocristiani cun data di a fin di u IV^u-principiu V^u seculu di a nostra epica.

A basilica paleocristiana avia trè nave spiccate da duie infilarate di ottu culonne in granitu, cun base è cappelletti in marmeru cun prima è à l’ueste, un vestibulu. U coru di a basilica presenta un decoru in musaica cumpostu pè u più da mutivi geometrichi fora di trè scene illustrate nantu à a parte orientale di un podium situatu prima di l’abside semicirculare è distinatu à sustene l’altare. 

U battisteru paleocristianu si trova à u sudeste di l’abside. IAvia un pianu cruciforme, cù una piscina centrale, forse cupertu cù un picculu domu pusata à nantu à puntelli è culunette zuccate in u marmeru. U pavimentu in musaica, cumpostu cun mutivi chjappi in u ripertoriu tradiziunale di l’Antichità pè u più ammenta u mondu acquaticu.

Dunque ammintà u  situ di Mariana vole dì interessà si à quindeci seculi è più di a storia di a Corsica. Intantu ch’ellu sia forse creatu un museu di situ è un centru di ricerca in Mariana, a ducumentazione ghjunta da i vechji scavi à pocu àpocu si mette in ligna nantu à  Internet da i giovani circatori socii di u CERPAM de Mariana (Centru di studii rumani paleocristiani è d’archeulugia medievale) chì travaglianu in cullaburazione stretta cun l’Università di Corsica, a FAGEC (Federazione d’Associi è Gruppamenti pè i studii corsi) è l’Associu CURTIS (Associu chadunisce i studianti circatori de l’Università di Corsica esiuti da a filera Storia).

(U situ Internet : http://cerpam.multimania.com/)