Chjesa San Carlu Bastia

Issa bella custruzzione barocca presenta una particularità rarissima –è forse sarà ancu unica- di ùn pudè porghje u dirittu d’asiliu. Di fatti fù u guvernatore genuvese di l’epica à mette issa cundizione custì prima di auturizà a custruzzione. Dedicata à Santu Ignaziu di Loyola, a chjesa cambiò nome quandu i cunfratelli di San Carlu si stabilinu ind’è issu santuariu dopu espulsa a Cumpagnia di Gesù in u 1768. Fù fundata in u 1640 a cunfraterna di San Carlu Borromeu (arcivescuvu di Milanu mortu in u 1584). A statula prucessiunale di a Vergine cù u Bambinu posta in a nichja vitrata hè d’epica XVIIIu. L’organu maiò è i battenti di a orta d’entrata posti in u 1886 venenu da a chjesa San Ghjuvà.