Per voi beati chì site troppu giòvani per avè cunnisciutu a festa di a Cuminiò ind'i tempi in Bastia è quella di i Fucarè di san Ghjuvà, è per voi disgraziati chì ùn avete a furtuna d'esse bastiacci, u nostru Cunsiglieru generale di Terranova, Rispunsèvule municipale di u Patrimoniu è iniziatore di u magnificu Almanaccu di e tradizione di Bastia, Battì Raffalli (i so eletti hè megliu à alliscialli chì ponu ancu ghjuvà) hà sculunnatu quale hè chì sà induve stu filmettu chì vi mostra ste duie manifestazioni.

Vanessa ALBERTI, maestra di cunferenze in Storia hà studiatu u sviluppu di a stampa corsa sinu à u 20u seculu. Pocu fà hà fattu una cunferenza nantu issu tema da u 1760 à u 1919.
U so spostu mette in risaltu trè periudi maiò :
• 1760-1820
• 1830-1870
• 1870-1919
Longu à isse trè epiche, a stampa si vede ch’ella muta ogettu è primura, postu ch’ella serve à l’iniziu l’interessi di i puderi pulitichi è i tornaconti di i gruppi suciali chì i servenu. À pocu à pocu busca più libertà di spressione è attenzione più maiò pè a vita di a sucetà corsa.

In isse cundizione si impone à l’evidenza u cambiamentu di statutu pè a lingua corsa chì si deve pudè arrimbà à l’ufficialità per assicurà si in e pratiche è allargà u so campu di azzione. U statutu di cuufficialità hè, in isse cundizione, cunsideratu indispensevule puru s’ellu pare una misura necessaria ma chì ùn pò, da sola, purtà risultati subitu subitu.

In u 2011 L’Assemblea di Corsica disse a so primura di u corsu vutendu cù una bella magiurità à prò di a cuufficialità corsu è francese. A quistione venerà torna à esse discussa frà pocu. In dui anni o quasi, si ne hè parlatu assai è u tema, s’ellu move sempre qualchì dificultà, trova dinù un bellu accunsente.

L’ultima parte di a cunferenza alza a riflessione à cunsiderazione generale chì dumandanu di fighjà al dilà di i prugrami è di interrugà si in quantu à l’avvene, vole si dì e finalità di l’azzione pedagogica è pulitica. Stabilitu in tutta a prima parte chì a perennità di e lingue hè una necessità è una primura maiò, l’uratore ci porta à riflette à cumu si face nasce, cumu si crea una brama di corsu è invita u cumunu sanu sanu à fà si ad ogni mumentu issa dumanda.