Versione :

Campà

Emmu spartuddu meli a mangianili,
e, primma di bulialla l’unda,
la trasparenzia verdi di li secchi
undi la marea dassa
bucchja di ricciu e lugi chjara, emmu
spartuddu l’ora mala, di la bona
si ni perdi l’ammentu,
cumente a volti di lu ventu
chi puru ingraiddegghja rosa e attentu.

    Impari, linzoli di siccagna emmu
ummidaddu di la frebba chi battìa
la maragna che badda schinchiddendi
i l’impiddraddu, candu lu raiolu
brusgiava la rasgioni.
    Impari, amori, vinu e dulori emmu
frazzaddu, chena rivalìa, chena
rimpiantu, chena pinsà all’incrinu
chi tantu puru si no vi pensi attoppa,
dassèndimi di te solu un prufummu,
lu chi basta a assigurammi di no avè
              sunniaddu.

                      Palchì no semmu altru
che grani di piùaru in attesa
d’un buffiu più fugosu, semmu
guttigghji di lintori ruscighinendi
in una foglia, sabendi chi a ghi dhà
di l’ariggi verdi indarredu no si torra.