Inuve su pratu
imbenit sa carchera
s’abba rughiat

trona-trona

dae sa rocca ‘e s’astore

abba cantata
sutta bancales de ruvu.

Una die semus intratos
in s’iscuruluchente
illonghiatos contra a sos pontes
in s’ora imbreaca.
Poi no’ semus istatos
ateru che pantasimas
puppas
marias pettènas
surviles
mammotis
crapas a muilu
babbarrozzis

frichinatos
pro su tophet.

A su torrare ‘e sas carenas

Alma mater

terra
mela melagranata

atta a mesu luna
in custu sero de Sant’Andria
Chi non benit bene a precare.
Su Deus chi aimus creitu
izzu ostru izzu nostru

s’est aumbratu
affumatu
in bucca ‘e ziminea
braia mori mori
a sonos de caminata lepia.

So’ ispiritos
nche uran sos pizzinnos
nche los pican

intro de sa bertula

canno sa ninna nanna
sonat caddos de calentura

Indunu seculu sufferente
s'arcu de su tempus
tendet un'ammentu
subra su filu de sa memoria.
No isco dae cando
penso subra sos ojos de s'ateru
sa pupia mi leat:
unu bucu nieddu
unu puntu maravigliosu
un putu chèna fundu.
No isco dae cando
s'ojada abberit cunzàdos e chisuras

Comente una mariposa
chircat s'oro de su fiore
su silenziu meu 'olat
subra s'ischimùzu de s'avreschida
chirchende su nomene tou.
Sos ojos ti pissighint
addaenantis a sos tuos
s'isfidant a duèllu
si tardo
mi ferint
e non cumprendo.
Pibiristas piedosas
abbasciadàs a pagu a pagu mi salvant
dae unu disizu mai inchidu
affannu de nues.
Sas camineras mai connotas
diuentant frizzas de oro
pro colpire su Chelu.

Creo non m'ingannient
sos ojos tuos
cumpanzos serenos de sos silenzios tuos.
Creo ai cussu 'emmo'de su primu incontru
chi ata illuminadu sa carnera tottu su sera.
Creo a sos basos tuos
negados in su sagnile de su coro.
Creo in sa potenzia de s'amore
in su tempus nostru
in cussu chi no isco
ma intendo...

Ponzende fattu a s'oriente
comente un'abe reina
ses bennida in su chelu des'ojada mia
subra sos fiores de su tempus.
Sas aias tuas isfidant sas puntas
subra sa carte inferchis giaos de lagrimas
ligas peraulas e silenzios
a su suiu de sos eventos
a su colore de sos pilos
sògas pro sas manos de Eros.
Suspesa
ti moves cumpidende su momentu
preparende s'ignòtu a un'abbrazzu.
A sa lughe dia cherrer furare
s'alenu de sa notte
frimare s'ora.
Sa Gratia de onzi die
ata fauoridu s'incontru

Disizu
su nomene tou jamat
s'aera chi respiro
su sidis de vivere
pro t'ischire mia in sos annos.
Chircare a
tie pro t'aer in sos oios
comente in s'ammentu
feridu e consoladu
dae sa 'oghe tua.

Un isettu nos giughet a manu tenta
cun ojos 'elados de janna in janna.
A sa domo de sa die zoccàmos
at a essere s'ultima 'olta?
Niunu
nemàncu su pius illuminadu rispondet.
Cundunu sorrisu
solu tue...