I fantasimi escenu da i cispugli

Induve u pratu
incontra a balchera
l’acqua falava
rimurosa
da a teppa di u falcu
acqua cantata
sottu à arcade di pruni.
Un ghjornu simu intrati
in l’oscuru lucente
allungati contru à i ponti
à l’ora briaca.
Eppoi ùn simu stati
altru chè fantasimi
puppas
marie pettene
surviles
mammotis
capre belante
babbarrozis
sbrusgiulati
per u tophet.
À u ripigliu di i corpi
emu betu acqua avvelenata
acqua di murzu
acqua sciuma d’oriu
acqua ch’ùn s’arricorda di i tempurali
è di e terre salvate.
Ci anu cunsignatu à u baal
à u sonnu di i malinconichi
à i calmanti cum’è preghera cutidiana.
Ùn esistimu più
pigliati à u lacciu
viaghjemu in l’assensu
briachi di gunfiore
boi ammansiti
à u limine
di u nostru
stà
arrimpicati
à a luce.