O Ulì, da ghjunghje in Bunifaziu sì statu ubligatu à passà longu à Pertusatu. A ghjente di u lucale u chjamanu dinù Punta Sant'Antoniu. Hè un locu impastatu à calcina è straziatu da i venti. Ci eranu custì l'animali marini ch'omu chjamava «iogiu marin» in bunifaziincu, vale à dì «ochju marinu».

L’arcipelagu di i Lavezzi sariani sti sbrisgiuli di tarra chì finiscini a Corsica à u suttanu. I Ghjenuvesi chjamavani sti lochi : i carrugi, veni à dì u locu strettu trà mari è scogli di u passaghju, tantu chì francà i Bucchi di Bonifaziu custituisci da poi sempri un piriculu.

Bonifaziu hè issu locu à tempu cunfina è ponti. Cunfina chì ni veni à metta una cima à a Corsica prima di ciuttà in i Bucchi di tutti i piriculi par via di i so timpesti è i so scogli duva più di una navi si sprifundò. Com’è a Semillante in u 1855 chì ci lasciò 750 morti.

DUI AMICHI

Alanu Di Meglio è Ghjuvan Maria Comiti sò amichi da sempre. A so cità, a so cultura, e so funzione (sò tremindui prufessori à l’Università di Corsica), tuttu ci sarà per qualcosa.

I lochi di u piali bunifazincu sò senza paragonu. A so campagna hè tistimogna di a storia di una ghjenti di stantu è di pacenza da renda a so terra dancia è diviziosa. Orti, aliveti è vigneti sò curati da l’accunciamenti di a petra bianca di u locu.

I so carrughji (chjamati « carugi » in bunifaziincu) marcani un architettura stretta stretta par via di u spaziu monda cunfinatu da a penisula calcaria chì poni a sedia naturali di cità forti. Ma in ghjò, A Marina apri a citadella cù ghjenti è parlati diversi in a storia.

Locu storicu, Bonifaziu lascia a stampa di ugni piriudu da a preistoria (cù a Donna di Bonifaziu chì t’hà 9000 anni) à oghji. Da più di 1000 anni, a cità hè un forti fin’à essa issa citadella cù u so bastionu di u 16esimu seculu.